تاعى ءبىر وقۋ جىلى اياقتالۋعا جاقىن. دەمەك, وقۋشىلاردىڭ ون ءبىر جىل بويى العان ءبىلىمىن سىندارلى سىناققا سالاتىن كەز دە كەلىپ جەتتى. وسىعان وراي بيىلعى تۇلەكتەر ماۋسىمنىڭ 1-ءى كۇنى باستالاتىن ۇلتتىق بىرىڭعاي تەستىلەۋگە قىزۋ دايىندالۋدا.
وقۋشىنىڭ بىلىمىنە – باعا, بولاشاعىنا باعدار بەرەتىن ۇلتتىق بىرىڭعاي تەستىلەۋ وسىمەن توعىزىنشى رەت وتكىزىلگەلى وتىر. ۇبت تاپسىراتىن ءسات جاقىنداعان سايىن وقۋشىلار عانا ەمەس, اتا-انالار مەن ۇستازداردىڭ دا كوڭىلى قوبالجىپ, ەرەكشە تولقۋلى. «باق شابا ما, باپ شابا ما؟». دەگەنمەن, جىل بويعى دايىندىقتىڭ ءوز ناتيجەسىن كورسەتەرى انىق.
بيىل استانا قالاسى بويىنشا 4267 وقۋشى مەكتەپ بىتىرگەلى وتىر. ولاردىڭ 1888-ءى – قازاق, 2379-ى ورىس سىنىپتارىن تامامداماقشى. ءبىلىم جانە عىلىم مينيسترلىگى ۇلتتىق تەستىلەۋ ورتالىعىنىڭ مالىمەتتەرى بويىنشا, بارلىق تۇلەكتەردىڭ 3708-ءى (1660 – قازاقشا, 2048 – ورىسشا), ياعني 87 پايىزى ۇلتتىق بىرىڭعاي تەستىلەۋ تاپسىرۋعا ءوتىنىش بەرگەن.
بيىلعى ۇبت-نىڭ ەرەكشەلىكتەرىنە توقتالار بولساق, 2012 جىلعى سىناق ۇلتتىق بىرىڭعاي تەستىلەۋدى ۇيىمداستىرۋ مەن وتكىزۋدىڭ ورنىققان تەحنولوگياسى بويىنشا جۇرگىزىلەدى. الدىمەن وعان قاتىسۋشى ءار وقۋشىعا بارىنشا جاعداي جاسالادى. پسيحولوگتاردىڭ زەرتتەۋىنشە, باقىلاۋشى تاراپ نەعۇرلىم كوپ بولسا, وقۋشىلار دا سوعۇرلىم سابىرسىزدانادى. سوندىقتان, بۇل جولى ءار وقۋشى سىناق كەزىندە اۋىزسۋمەن قامتاماسىز ەتىلەدى.
ۇلتتىق ۋنيۆەرسيتەتكە تۇسەتىن ۇمىتكەر ەندى 70 بالل جيناماسا, ارمانىمەن قوش ايتىسادى. بۇدان بولەك ۋنيۆەرسيتەتتەردىڭ تابالدىرىعىنان اتتاۋ ءۇشىن تۇلەكتەر كەم دەگەندە 50 بالل جيناۋعا ءتيىس. ەندى كوللەدج بىتىرگەندەر جوعارى وقۋ ورنىنا ءتۇسۋ ءۇشىن ۇبت تاپسىرادى. سونداي-اق, مينيسترلىك مەملەكەتتىك كوميسسيا مۇشەلەرىنىڭ سانىن 11-دەن 5 ادامعا دەيىن قىسقارتتى. بۇل رەتتە, كوميسسيا قۇرامىنا بىلىكتىلىگى جوعارى, ومىردەن تۇيگەنى مول, تاجىريبەلى ادامدار كوبىرەك تارتىلاتىن بولادى.
سونداي-اق, ۇبت-نىڭ وتكىزىلۋىنە باقىلاۋ جاساۋعا العاش رەت ەلباسىنىڭ تاپسىرماسىمەن قۇرىلعان ءبىلىم ساپاسىن باقىلايتىن وڭىرلىك دەپارتامەنتتەردىڭ شتاتتاعى قىزمەتكەرلەرى قاتىسادى. ولار تەستىلەۋدىڭ ءادىل دە اشىق ءوتۋىن قامتاماسىز ەتىپ, جەرگىلىكتى باسقارۋ ورگاندارىمەن بىرلەسىپ جۇمىس ىستەيتىن بولادى. سىناق جۇرگىزىلەتىن عيماراتتا مىندەتتى تۇردە قاۋىپسىزدىك شارالارى قولعا الىنادى, ال اپەللياتسيالىق شاعىم-ارىزدار قابىلداناتىن مەرزىم تەستىلەۋ قورىتىندىلارى جاريالانعان كۇننىڭ ەرتەڭىندە ساعات 14.00-گە دەيىن ۇزارتىلدى.
بيىل ەنگىزىلگەن وزگەرىستەردىڭ ءبىرى – ماتەماتيكالىق تەستىلەۋدە لوگيكالىق سيپاتتاعى ءبىر تاپسىرما. ۇبت-نى وتكىزۋ پۋنكتتەرىنىڭ بارلىعىندا ۇيالى بايلانىس تەلەفوندارىنىڭ سيگنالدارىن وشىرەتىن جانە بەينەباقىلاۋ جاسايتىن قۇرالدار پايدالانىلادى. تەستىلەۋدى وتكىزۋ مەرزىمى ماۋسىمنىڭ 1-ىنەن 15-ىنە دەيىن ۇزارتىلدى. استانالىق تۇلەكتەر ءۇشىن سىناق جىلداعىداي 5 پاننەن, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە, س.سەيفۋللين اتىنداعى قازاق اگروتەحنيكالىق ۋنيۆەرسيتەتتە جانە قازاق گۋمانيتارلىق زاڭ ۋنيۆەرسيتەتىندە وتكىزىلەدى.
گۇلبارشىن وكەشقىزى
