ەلوردادا جەڭىس كۇنى قارساڭىندا «استانا جاستارى» جاستار رەسۋرستىق ورتالىعى ۇلى وتان سوعىسىنىڭ تاريحىن بىلۋگە ارنالعان بليتس-ساۋالناما ۇيىمداستىردى, , دەپ حابارلايدى astana-akshamy.kz
«استانا جاستارى» ەرىكتىلەرى وسى مەرەكە كۇندەرى ەلوردا تۇرعىندارى مەن قوناقتارى اراسىندا ەسىل وزەنىنىڭ جاعاسىنداعى جاياۋ جۇرگىنشىلەر كوشەسىندە, ساياباقتاردا, قوعامدىق ورىنداردا ساۋالناما جۇرگىزەدى. دۇرىس جاۋاپ بەرگەندەرگە «جەڭىس لەنتاسى» بەرىلەدى.
ازاماتتاردىڭ كوپشىلىگى قويىلعان ساۋالدارعا دۇرىس جاۋاپ بەردى. مىسالى, «ۇلى وتان سوعىسى قاي جىلى باستالدى؟» دەگەن ساۋالناماعا قاتىسقانداردىڭ كوپشىلىگى 1941 جىلى باستالدى دەپ جاۋاپ بەردى.
ساۋالنامانىڭ بارلىق قاتىسۋشىلارى كەڭەس وداعىنىڭ ايگىلى نازىك جاندى باتىرلارى ءاليا مولداعۇلوۆا مەن مانشۇك مامەتوۆانى دۇرىس اتادى.
سونداي-اق, وتانداستارىمىزدىڭ قايسىسى بەرليندەگى رەيحستاگ قابىرعاسىندا جەڭىس تۋىن ورناتتى دەگەن سۇراققا كوبىسى دۇرىس جاۋاپ بەرە الدى, ياعني ول – راقىمجان قوشقارباەۆ.
سونداي-اق, كوبىسى «ەل دەگەندە ەمىرەنىپ, جۇرت دەگەندە جۇگىنىپ قىزمەت ەتكەن!» سوزدەرى اتى اڭىزعا اينالعان باۋىرجان مومىشۇلىنا تيەسىلى ەكەنىن دە بىلەدى.
«مۇنداي بليتس-ساۋالنامالار تاريحي فاكتىلەردى بىلۋگە, سونداي-اق باتىرلاردىڭ ەسىمدەرى مەن ولاردىڭ بەيبىتشىلىك جولىنداعى ەرلىكتەرىن قانشالىقتى ەسىمىزدە ساقتايتىنىمىزدى بايقاۋعا كومەكتەسەدى», – دەيدى «استانا جاستارى» ەرىكتىسى.
ەستەرىڭىزگە سالا كەتەيىك, «جەڭىس لەنتاسى» اكتسياسى 6 مامىردا باستالىپ, 9 مامىرعا دەيىن جالعاسادى.
بارلىعى 40 مىڭنان استام لەنتا تاراتۋ جوسپارلانىپ وتىر. بارلىق تۇرعىندار سۇراقتارعا ەرەكشە ىقىلاسپەن جاۋاپ بەرەدى جانە ۇوس داتالارى مەن باتىرلارى تۋرالى حاباردار بولادى.
ەرىكتىلەردىڭ ايتۋىنشا, وسىلايشا ولار ۇلى وتان سوعىسىنىڭ ارداگەرلەرىنە العىس بىلدىرەدى.
