بوگەنباي باتىر ەسكەرتكىشى

بۇقار جىراۋ بابامىز «قازاقتىڭ قامال قورعانى» دەپ باعالاعان, جوڭعار شاپقىنشىلىعىندا قازاق اسكەرىنىڭ قولباسشىسى بولعان بوگەنباي باتىرعا باس قالاداعى قويىلعان ەسكەرتكىش 2007 جىلى 5 شىلدەدە اشىلعان. ول داڭقتى تۇلعا ەسىمىمەن اتالعان داڭعىلدا ورنالاسقان. ەسكەرتكىشتە باتىر ات ۇستىندە بەينەلەنگەن. ءبىر قولىن جوعارى كوتەرىپ, ەل شەتىنە كەلگەن جاۋدى بوگەپ تۇرعانداي. ال ەكىنشى قولىنداعى الداسپان سول كەزەڭنىڭ الماستاي قىلپىعان قاۋىپ-قاتەرىن اڭعارتىپ تۇرعانداي كورىنەدى. ەسكەرتكىش تۇعىرىنىڭ بيىكتىگى 11,3 م بولسا, ات ۇستىندەگى باتىر ءمۇسىنىنىڭ بيىكتىگى – 6,3 مەتر. اۆتورى – بەلگىلى ءمۇسىنشى توقتار ەرمەكوۆ.
ءبىز ءسوزىمىزدىڭ باسىندا بۇقار بابامىزدى بەكەر ايتقان جوقپىز, قازاق ەلىنىڭ تىرەگى بولعان ءباھادۇر ومىردەن وتكەندە ارۋاقتى جىراۋ, ءۇش ءجۇزدىڭ باسىن قوسقان ابىلاي حانعا باتىردىڭ ءولىمىن:
– قازاقتىڭ حانى ابىلاي,
ابىلاي حانىم, بۇل قالاي؟
اقيىقتى اسپانعا
ۇشپاستاي عىپ تورلادى.
قۇلاعانعا ۇقسايدى
قازاقتىڭ قامال-قورعانى.
قايعىرماڭىز, حانزادام,
ايتپاسىما بولمادى,
باتىرىڭ ءوتتى – بوگەنباي!
قيادان قيقۋ توگىلسە,
اتتىڭ باسىن تارتپاعان,
قيساپسىز قول كورىنسە,
قورقىپ جاۋدان قايتپاعان,
قازاق دەگەن حالقىنان,
باتىر شىققان داڭقىنان,
قارسىلاسقان اسىلدار
قورعاسىنداي بالقىعان,
باتىرىڭ ءوتتى – بوگەنباي!, – دەپ جەتكىزىپتى.