100 مىڭعا جۋىق تال-تەرەگى جايقالعان استانانىڭ بوتانيكالىق باعى 1 ماۋسىمدا اشىلادى.
ارقانىڭ سۋىق كليماتىنا بەيىمدى كەلەتىن قارا قايىڭ, قىزىل ۇيەڭكى, وزەن جاعاسىندا وسەتىن ۇيەڭكى, ۇشكىر جاپىراقتى ۇيەڭكى, دالا ۇيەڭكىسى, بوز ارشا, مانچجۋريا جاڭعاعى, ءسىبىر مايقاراعايى, قاراعاي, ءبۇرلى اعاش, ۆيرگين مويىلى جانە تاعى باسقا اعاشتاردىڭ ءتۇرى باقتىڭ كوركىن اشا تۇسپەك.
وسىدان ەكى جىل بۇرىن باستالعان بوتانيكا باعىنىڭ قۇرىلىسى ۇلكەن كەشەنگە اينالىپ وتىر. مۇندا كىرەبەرىس الاڭقايى اجارىن اشىپ تۇراتىن بولسا, جابىق جىلىجاي, جاساندى سۋ قويماسى, اقپارات ورتالىعى, جاياۋ جۇرگىنشىلەر كوپىرى دە جوبادا قاراستىرىلعان.
مۇندا قورشاعان ورتانى قورعاۋعا قاتىستى عىلىمي زەرتتەۋلەر, تانىمدىق, وقۋ-اعارتۋ, ويىن-ساۋىق, ەكولوگيا جانە تابيعاتتى قورعايتىن ءىس-شارالار وتكىزىلىپ تۇرادى. استانا تۇرعىندارى مەن قوناقتارى باققا جىلدىڭ بارلىق مەزگىلىندە سايرانداپ, سەيىلدەي الادى.
100 گەكتار ايماقتى الىپ جاتقان باقتىڭ كوركەمدەلۋىنە شىعىسقازاقستاندىقتار دا ءوز ۇلەسىن قوسىپ وتىر. بوتانيكالىق باقتاعى ءتۇرلى ءتۇستى جارىقپەن كوركەمدەلگەن سازدى سۋبۇرقاق وسى وبلىستىڭ استانا مەرەيتويىنا ارنالعان تارتۋىنىڭ ءبىرى بولماق.
