قازاقستان پرەمەر-ليگاسىنىڭ 10-تۋرىندا «اتىراۋ» ءوز الاڭىندا «استانا» كومانداسىنا 0:2 ەسەبىمەن جول بەردى.
كەزدەسۋدەن ءبىر كۇن بۇرىن «مۇنايشى» ستاديونىندا جاتتىعۋ وتكىزگەن قوناق كوماندا بىردەن الاڭنىڭ ساپاسى سىن كوتەرمەيتىنىن ايتىپ, تازدىڭ سيرەگەن شاشىنداي بوپ تۇرعان كوگالدا دوپ تەبۋدەن باس تارتتى. «اتىراۋ» كومانداسىنىڭ ءوزى دە بۇل پىكىردى قوستاپ, باسقا الاڭدا ويناۋدان كەت ءارى بولمادى. ءسويتىپ, جەرگىلىكتى كلۋب ويىندى جاساندى كوگالى بار قوسالقى الاڭ – «تومارلى» ستاديونىندا وتكىزۋ جونىندە شەشىم قابىلدادى.
2 مىڭ جانكۇيەر جينالعان كەزدەسۋدە «استانانىڭ» ابىرويى استى. العاشقى مينۋتتا قوس كوماندا ءبىر-ءبىرىنىڭ وسال تۇسىن تاپپادى. ماتچ تاعدىرىن شەشكەن ەكى گول دا ەكىنشى تايمدا سوعىلدى. ەسەپتى الدىمەن پاتريك تۆۋماسي اشتى. كوپتىڭ اراسىنان سىتىلىپ ءوتىپ, ايىپ الاڭىنا ەنگەن ونى قورعاۋشى ارتىنان ءىلىپ شالدى. تورەشى ويلانباستان دوپتى 11 مەترلىك نۇكتەگە قويدى. سوققىنى تۆۋماسيدىڭ ءوزى جاسادى جانە ونىسى ءساتتى شىقتى. ول وسىمەن قپل-دە التىنشى گولىن سوعىپ, ازىرگە ۇزدىك بومباردير بولىپ تۇر. ءبىرىنشى گولدان سوڭ اراعا ءۇش مينۋت ۋاقىت سالىپ, 64-مينۋتتا مارين توماسوۆ ەسەپتى ەسەلەدى. ول الاڭنىڭ ورتاسىنان باستاپ دوپپەن بىرگە ۇشىپ بارىپ, دىتتەگەنىنە جەتتى. ەسەپ – 0:2.
وسىلايشا «استانا» تۋرنير كەستەسىندەگى «بيلىگىن» ءۇش ۇپايعا ۇزارتىپ, 28 ۇپايمەن توپ باستاپ تۇر. ونىڭ ءىزىن قۋىپ كەلە جاتقان «قايرات» سىرت الاڭدا قوستانايدىڭ «توبىلىنان» 0:1 ەسەبىمەن جەڭىلىپ, كوشتەن بەس ۇپاي قالىپ قويدى. ال «توبىل» 19 ۇپايمەن ءۇشىنشى ورىنعا تۇراقتادى. «اقتوبە» –«اقجايىق» ماتچىندا 5:3 ەسەبى تىركەلىپ, تۋردىڭ ەڭ ناتيجەلى ويىنى بولدى. «شاحتەر» ءوز جەرىندە «ەرتىسكە» 0:1 ەسەبىمەن ەسە جىبەرسە, «قىزىل-جار» مەن «قايسار» گولسىز تارقاپ, «جەتىسۋ» «ورداباسىنى» 4:2 ەتىپ جەڭدى.
