ۇلىبريتانيانىڭ ازاماتتىق اۆياتسيا اگەنتتىگى مەن قازاقستاننىڭ اۆياتسيالىق اكىمشىلىگى وسى سالانى رەتتەۋدىڭ بريتانيالىق ۇلگىسىنە كوشۋ بويىنشا بىرلەسكەن جوبانى باستادى.
اتالعان جوبا اياسىندا بىرىككەن كورولدىكتەن كەلگەن ماماندار وتاندىق ازاماتتىق اۆياتسيا اكىمشىلىگىنىڭ نورماتيۆتىك-قۇقىقتىق اكتىلەرىنە EASA (اۆياتسيالىق قاۋىپسىزدىك جونىندەگى ەۋروپالىق اگەنتتىك) جانە ەو نورماتيۆتەرىن ەنگىزۋ جولدارىن ۇسىنىپ, ۇشۋ قاۋىپسىزدىگىن قاداعالاۋدىڭ قۇقىقتىق قۇرىلىمىنا تالداۋ جاسايدى.
«بۇل ىنتىماقتاستىق قازاقستاننىڭ اۆياتسيالىق اكىمشىلىگى قىزمەتكەرلەرىنىڭ بىلىكتىلىگىن ارتتىرۋعا جانە ۇلىبريتانيانىڭ اۆياتسيا سالاسىنداعى ۇزدىك ۇردىستەردى ۇيرەنۋگە مۇمكىندىك بەرەدى, قازاقستاننىڭ اۆياتسيا سالاسىن مەملەكەتتىك رەتتەۋدىڭ حالىقارالىق تاجىريبەگە كوشۋىن جىلدامداتادى, مۇنىمەن قوسا ۇشۋ قاۋىپسىزدىگىنىڭ دەڭگەيىن حالىقارالىق ازاماتتىق اۆياتسيا ۇيىمىنىڭ تالاپتارىنا ساي كەلەتىندەي ەتىپ جوعارىلاتادى, – دەدى قازاقستاننىڭ اۆياتسيالىق اكىمشىلىگىنىڭ باس ديرەكتورى پيتەر گريففيتس.
ال ۇلىبريتانيانىڭ ازاماتتىق اۆياتسيا اگەنتتىگىنىڭ ازيا-تىنىق مۇحيتى ايماعى بويىنشا حالىقارالىق وپەراتسيالار جەتەكشىسى روب ەرسكايننىڭ ايتۋىنشا, جاڭا جوبانىڭ ىسكە قوسىلۋى قازاقستان ارقىلى جۇزەگە اساتىن اۋە ءترانزيتىنىڭ تارتىمدىلىعىن ارتتىرۋعا دا جول اشادى.
قازىرگى تاڭدا اۆياتسيالىق اكىمشىلىك قىزمەتىنىڭ باعىتتارى (ۇشۋدى پايدالانۋ, ۇشۋ جارامدىلىعى, اەرودرومدا جانە جەردە قىزمەت كورسەتۋ, اەروناۆيگاتسيا, اۆياتسيالىق قاۋىپسىزدىك, اۆياتسيالىق زاڭناما, اۆياپەرسونالمەن جۇمىس ىستەۋ) بويىنشا شەتەلدىك جانە وتاندىق ساراپشىلاردان بىرلەسكەن جوبالاۋ توبى قۇرىلدى.
