ۋەفا-نىڭ چەمپيوندار ليگاسىنىڭ توپتىق ءتۋرنيرىنىڭ ءتورتىنشى تۋرىندا «استانا» كارى قۇرلىقتاعى اتاقتى كوماندالاردىڭ ءبىرى «اتلەتيكو» كومانداسىن قابىلدايدى. ماتچ بۇگىن كەشكى 21.00-دە «استانا ارەنا» ستاديونىندا باستالادى.
قازاقستان چەمپيونى ءۇشىن بۇل توپتىق تۋرنيردەگى ءتورتىنشى ويىن بولماق. وسىعان دەيىن استانالىقتار سىرت الاڭدا «بەنفيكا» جانە «اتلەتيكو» كوماندالارىنا جول بەرسە, استانا تورىندە ستامبۇلدىڭ «گالاتاساراي» كومانداسىمەن تەڭ تۇسكەن ەدى.
ەندى, مىنە, قارىمتا ويىنداردىڭ كەزەگى كەلدى. كەشە باس باپكەر ستانيمير ستويلوۆ پەن رودجەر كانياس ءباسپاسوز ءماسليحاتىن وتكىزدى. «استانا» بۇل ويىندا «اتلەتيكونىڭ» اتاعىنان دا, فۋتبولشىلارىنىڭ اتىنان دا قورىقپايدى. ءبىزدىڭ جىگىتتەردىڭ ءبارى دە قايرالىپ تۇر. جانكۇيەرلەرىمىز ءۇشىن جاقسى ويىن كورسەتۋگە بارىمىزدى سالامىز» دەدى باس باپكەر. «مەن ءوزىمنىڭ اتىمدى دا, «استانا» كومانداسىنىڭ داڭقىن دا تاريحتا قالدىرعىم كەلەدى. سول ءۇشىن دە بۇل تۋرنيردە ەرەكشە ءبىر ويىن كورسەتكىم كەلەدى» دەپ, اعىنان جارىلدى كولۋمبيالىق رودجەر كانياس.
سونىمەن, بۇگىن كەشكە «استانا ارەنا» الاڭىندا فۋتبول دوداسى. ولاي بولسا, ەل نامىسىن ارقالاعان «استانا» كومانداسىنا قولداۋ كورسەتەيىك, قادىرلى جانكۇيەر!
عالىم قوجابەكوۆ
