«شابىت» حالىقارالىق شىعارماشىل جاستار فەستيۆالى بيىل قاتارىنان ون توعىزىنشى جىل ۇيىمداستىرىلىپ وتىر.
3 قاراشادا باستالىپ, كىل تالانتتىڭ باسىن قوساتىن بىرەگەي كونكۋرستا بۇل جولى 644 قاتىسۋشى باق سىنايدى.
ۇزدىك شىعارمالارعا بۇگىننەن باستاپ باعا بەرىلەدى. جاستار «بەينەلەۋ ونەر», «ۇزدىك ادەبي شىعارما», «حورەوگرافيا», «حالىق مۋزىكاسى», «كلاسسيكالىق مۋزىكا» جانە «ەسترادالىق ۆوكال» اتالىمدارى بويىنشا شەبەرلىكتەرىن بايقاتادى.
بايقاۋ باستالماستان بۇرىن بىزگە قالالىق مادەنيەت, مۇراعاتتار جانە قۇجاتتاما باسقارماسىنىڭ باسشىسى بولات ماجاعۇلوۆتان بيىلعى «شابىتتىڭ» ەرەكشەلىگى تۋرالى سۇراپ بىلدىك.
– فەستيۆالدىڭ اۋقىمى جىل وتكەن سايىن كەڭەيىپ كەلەدى. بيىل باس جۇلدەنى ەلىمىزدىڭ تالانتتارى عانا ەمەس, ازەربايجان, بۋرياتيا, قىتاي, قىرعىزستان, رەسەي, وزبەكستان جانە ۋكراينا سەكىلدى ەلدەردىڭ وكىلدەرى ساراپقا سالادى. وسى جولى «بەينەلەۋ ونەرى» اتالىمى بويىنشا باق سىنايتىندار ەداۋىر كوپ. ولاردىڭ سانى – 192. ودان كەيىن «حورەوگرافيا» مەن «حالىق مۋزىكاسى» جانرلارىندا ونەر كورسەتەتىندەر جەتەرلىك. بىلتىرعى «شابىتتىڭ» جاڭالىعى – «تسيرك ونەرى» ساناتى بولعان. بۇل بايقاۋدا ءار اتالىمنىڭ جۇلدەگەرلەرى عانا انىقتالىپ قويماي, باستى جۇلدە – پرەزيدەنت كۋبوگى تابىستالادى, – دەدى باسقارما باسشىسى.
فەستيۆال قاراشانىڭ 8-ىنە دەيىن جالعاسادى.
