قازاقستاندا 1 قاڭتاردان باستاپ مەملەكەتتىك قولداۋ شارالارىن پرواكتيۆتى تاعايىنداۋ ءۇشىن جۇمىس رەجيمىندە وتباسىنىڭ تسيفرلىق كارتاسى (وتسك) قولدانىسقا ەنگىزىلدى. تسيفرلىق كارتادا ەلىمىزدىڭ 19,5 ملن ازاماتى نەمەسە 6,3 ملن وتباسى تۋرالى اقپارات جيناقتالعان. ول «Smart Data Ukimet» اناليتيكالىق جۇيەسىمەن ينتەگراتسيالانعان, بۇل جۇيەدە مەملەكەتتىك ورگانداردىڭ بارلىق دەرەكقورى جيناقتالعان. وندا تۇرعىنداردىڭ تابىس دەڭگەيى, جىلجىمالى جانە جىلجىمايتىن مۇلىكتىڭ بولۋى, وتباسى قۇرامى, نەسيەنىڭ بولۋى جانە تاعى باسقا ءارتۇرلى اقپارات قامتىلعان.
قولدا بار دەرەكتەر نەگىزىندە ەكونوميكالىق, الەۋمەتتىك, تۇرعىن ءۇي جاعدايلارى, دەنساۋلىق پەن ءبىلىم بويىنشا وتباسىنىڭ ءال-اۋقات دەڭگەيىن باعالاۋعا جانە قاداعالاۋعا مۇمكىندىك بەرەتىن تالداۋلار جۇرگىزىلەدى, ال الەۋمەتتىك تاۋەكەل تۋىنداعان جاعدايدا وتباسىنىڭ تسيفرلىق كارتاسى جاردەماقى نەمەسە الەۋمەتتىك تولەمدى پرواكتيۆتى تۇردە الۋعا مۇمكىندىك بەرەدى. ول ءۇشىن وتسك ارقىلى الەۋەتتى جاردەماقى الۋشىعا SMS-حابارلاما جىبەرىلەدى جانە وڭ جاۋاپ بولعان جاعدايدا وعان ءتيىستى تولەم تاعايىندالىپ, ءتيىستى قاراجات بانكتىك شوتىنا اۋدارىلادى.
قازىرگى تاڭدا وتسك-دا جاردەماقىلار مەن الەۋمەتتىك تولەمدەردىڭ 9 ءتۇرى بويىنشا قىزمەتتەر الۋ مۇمكىندىگى بەرىلگەن: جۇكتىلىككە جانە بوسانۋعا بايلانىستى تابىسىنان ايىرىلعان جاعدايدا الەۋمەتتىك تولەمدەر; بالا كۇتىمىنە بايلانىستى تابىسىنان ايىرىلعان جاعدايدا الەۋمەتتىك تولەمدەر; جۇمىسىنان ايىرىلعان جاعدايداعى الەۋمەتتىك تولەمدەر; اسىراۋشىسىنان ايىرىلعان جاعدايداعى الەۋمەتتىك تولەمدەر; مۇگەدەكتىگى بار بالا تاربيەلەپ وتىرعان اتا-اناعا (قامقورشىعا) بەرىلەتىن جاردەماقىلار, مۇگەدەكتىگى بويىنشا جاردەماقىلار; كوپبالالى وتباسىلارعا بەرىلەتىن جاردەماقىلار; «كۇمىس القا» نەمەسە «التىن القا» القالارىمەن ماراپاتتالعان كوپبالالى انالارعا بەرىلەتىن جاردەماقىلار; اتاۋلى الەۋمەتتىك كومەك. سونداي-اق ازاماتتارعا وتسك ارقىلى زەينەتاقى تولەمدەرىن الۋ مۇمكىندىگى تۋرالى اۆتوماتتى حابارلاما جىبەرىلەدى.
2023 جىلى الەۋمەتتىك قورعاۋ سالاسىنداعى قىزمەتتەر تىزبەسى كەڭەيتىلەدى. 2024 جىلعى 1 قاڭتاردان باستاپ دەنساۋلىق ساقتاۋ جانە ءبىلىم بەرۋ سالالارىنداعى مەملەكەتتىك كەپىلدىكتەر ەنگىزىلەدى. 2025 جىلدان باستاپ جوعارىدا اتالعان ءۇش سالادا مەملەكەتتىك كەپىلدىكتەردىڭ بارلىق تۇرلەرى قامتىلماق. الاياقتىق تاۋەكەلىن بولدىرماۋ ماقساتىندا 1414 بىرىڭعاي بايلانىس ورتالىعىنان كەلىپ تۇسكەن SMS-كە جاۋاپ بەرۋ قاجەت.
