پرەمەر-ءمينيستردىڭ ورىنباسارى تامارا دۇيسەنوۆانىڭ توراعالىعىمەن ۇكىمەت ۇيىندە وتكەن كەڭەستە وتاندىق ءدارى-دارمەك جانە ۆاكتسينامەن قامتۋ ماسەلەلەرى تالقىلاندى. باسقوسۋعا دەنساۋلىق ساقتاۋ, اۋىل شارۋاشىلىعى مينيسترلىكتەرىنىڭ, «QazBioPharm» ۇلتتىق حولدينگىنىڭ وكىلدەرى قاتىستى.
بيىل دەنساۋلىق ساقتاۋ مينيسترلىگى «QazVac» ۆاكتسيناسىنىڭ 50 مىڭ دوزاسىنا تاپسىرىس بەرۋدى جوسپارلاعان. «QazBioPharm» ۆەتەرينارلىق باعىتتاعى پرەپاراتتاردى دا شىعارادى. ونى ءوندىرۋ كولەمى ارتادى. اۋىل شارۋاشىلىعى مينيسترلىگى ۇلتتىق حولدينگتەن ۆەتەرينارلىق ءدارى-دارمەكتەر مەن دياگنوستيكۋمداردىڭ 25,8 ملن دوزاسىن الۋدى جوسپارلاپ وتىر.
ءوز كەزەگىندە «QazBioPharm» باسشىسى ەرعالي ءابدىرايىموۆ مەملەكەتتىك ورگاندارمەن اتالعان ءونىمدى وندىرۋگە جانە جەتكىزۋگە ۇزاقمەرزىمدى كەلىسىمشارتتاردى بەكىتۋگە نيەت ءبىلدىردى. اتالعان ماسەلە ءتيىستى مەملەكەتتىك ورگاندارمەن بىرلەسە قاراستىرىلادى.
«وتاندىق ءوندىرۋشىنى قولداۋ شارالارىنىڭ ماڭىزى زور. الايدا ۇسىنىلاتىن پرەپاراتتار ساپاسىنا باسا ءمان بەرىلگەنى ءجون. ول ءۇشىن «QazBioPharm» ۇلتتىق حولدينگى باسشىلىعى تىكەلەي جاۋاپتى. ءدارى-دارمەكتەردى ءوندىرۋ جانە جەتكىزۋ مەرزىمى بويىنشا بەكىتىلگەن كەستەنى قاتاڭ ساقتاۋ قاجەت» دەپ اتاپ ءوتتى تامارا دۇيسەنوۆا.
