ەلوردادا حالىقارالىق ايەلدەر كۇنى قارساڭىندا «كۇمىس حانىمدار» بايقاۋى ءوتتى.
قارتتاردىڭ قوعامدىق ءىس-شارالارعا قاتىسۋ بەلسەندىلىگىن ارتتىرىپ, وتباسىلىق قازاقى ءداستۇر جالعاستىعى مەن ۇرپاقتار ساباقتاستىعىن نىعايتۋ ماقساتىندا وتكەن اۋدانارالىق بايقاۋدى استانا قالاسى اكىمدىگىنىڭ «بەلسەندى ۇزاق ءومىر ءسۇرۋ ورتالىعى» ۇيىمداستىرىپ وتكىزدى.
بايقاۋعا قالاداعى ءار اۋداننان ەكى ۇمىتكەر قاتىستى. ولاردىڭ اراسىنداعى ەڭ ەگدەسى 78 جاستا بولسا, ەڭ جاسى – 58 جاستا. ولار بىرنەشە كەزەڭ بويىنشا ء(وزىن تانىستىرۋ, ونەر كورسەتۋ, ءدامدى اس دايىنداۋ) سىنعا ءتۇستى. بايقاۋ سوڭىندا ۇزدىكتەر انىقتالىپ, باس جۇلدە الماتى اۋدانىنىڭ اجەلەرىنە بۇيىردى. ءبىرىنشى ورىنعا – بايقوڭىر اۋدانى, ەكىنشى ورىنعا – نۇرا اۋدانى, ءۇشىنشى ورىنعا سارىارقا اۋدانى يە بولدى. «كورەرمەن كوزايىمى» نوميناتسياسىمەن ەسىل اۋدانىنىڭ اجەلەرى ماراپاتتالدى. ولارعا دەمەۋشىلەر كومەگىمەن ارنايى سىيلىقتار بەرىلدى.
ءىس-شارانىڭ ۇرپاقتارعا حالقىمىزدىڭ سالت-ءداستۇرىن دارىپتەۋ تۇرعىسىنان ءمان-ماڭىزى ايىرىقشا ەكەنىن اتاپ ايتقان ءجون. سەبەبى بايقاۋعا قاتىسقان اجەلەر ءبىر جاعىنان, حالقىمىزدىڭ ۇلتتىق كيىم-كەشەك, قولونەر بۇيىمدار مادەنيەتىمىزدى دارىپتەسە, ەكىنشى جاقتان, «ايەلدىڭ ءبىر ونەرى – اس ءپىسىرۋ» دەگەندەي, قازاقتىڭ تاعام مادەنيەتىن دە كورسەتىپ, قازىر ۇمىت بولىپ بارا جاتقان «ۇلپەرشەك», «قارىنبۇرمە», «مايسوك» سياقتى تاعامداردى ازىرلەپ اكەلىپ, ولاردى دايىنداۋ ادىستەرىن ءتۇسىندىردى. وسى تۇرعىدان العاندا, بۇل تەك ونەر بايقاۋى عانا ەمەس, ۇلتتىق ءداستۇردى دارىپتەگەن ماڭىزدى ءىس-شارا بولادى.
– قۇرىلعانىنا ەكى جىل ۋاقىت بولعان ورتالىعىمىز قالاداعى قارتتارىمىزدىڭ تانىنە قۋات, جانىنا شۋاق سىيلادى دەپ ايتساق قاتەلەسپەيمىز. ويتكەنى بۇل ورتالىق زەينەتكە شىققاننان كەيىنگى ءومىردى دە ءماندى, ماعىنالى وتكىزۋگە جاڭاشا مۇمكىندىك سىيلادى. بۇگىنگى بايقاۋ – سونىڭ جاندى ايعاعى. ۇلتتىق ءداستۇرىمىزدىڭ, ۇلتتىق قۇندىلىقتارىمىزدىڭ بايقاۋدىڭ باستى ارقاۋى بولعانى دا «قارتى بار ءۇيدىڭ سالتى بار» دەگەن ءسوزدىڭ دايەكتى دالەلى بولدى, – دەدى «بەلسەندى ۇزاق ءومىر ءسۇرۋ ورتالىعى» كمم ديرەكتورى مۇحتار ەركەتاەۆ.
