ەرتە زامانداردا ادام بالاسىنىڭ جىلى ۇياسى بولعان وتباسى قۇندىلىعى بۇگىندە دەۆالۆاتسياعا اينالىپ بارا جاتقانىن بايقاۋعا بولادى.
وكىنىشتىسى سول, باتىستاعى ەلدەردىڭ كوپشىلىگىن رۋحاني داعدارىسقا ۇشىراتىپ وتىرعان وسىنداي سالتسىزدىق, داستۇرسىزدىك ءبىزدىڭ دە قوعامىمىزدا قىلاڭ بەرىپ قالادى. جاسىنىڭ ۇلعايعانىنا قاراماي, تۇرمىس قۇرماي, قىزمەت قۋىپ, كارەرا جاساپ جۇرگەن قىزدارىمىز, قىرىققا تولسا دا ۇيلەنبەي, سۇر بويداق اتانىپ جۇرگەن ۇلدارىمىز سونىڭ دالەلى سياقتى.
جۋىردا پسيحولوگ رەتىندە ءبىر وتباسىنا قوناققا باردىم. مەنى شاقىرعان كىسى وتىز التى جاستاعى قىزىنىڭ تۇرمىس قۇرماي, قىرىقتان اسقان ۇلىنىڭ ۇيلەنبەي جۇرگەنىن ايتىپ, سولارعا ىقپال ەتۋىمدى سۇراعان ەدى. الايدا, اسۇيدە جايىلعان داستارحانعا ءۇي يەلەرى ۇلىن دا, قىزىن دا كەلتىرە العان جوق. ولار ءبىر-ءبىر تارەلكەگە تاماق سالىپ الدى دا, بولمەلەرىنە كىرىپ كەتتى. ازدان سوڭ تاماقتانىپ بولعان وتاعاسى دا تۇرىپ, ءوز جايىنا كەتتى. سوندا داستارحان باسىندا ەكى ادام عانا قالدىق. مەن سوندا بۇل ءۇيدىڭ قاسىرەتى داستارحاندى سىيلاۋ ءداستۇرىنىڭ بولماۋىندا دەپ ءتۇسىندىم. ءۇي يەسىنە دە ەرتەرەكتەن وسىنداي بىرگە وتىرىپ تاماقتانۋ, داستارحان باسىندا اسىقپاي, ءشاي ءىشىپ وتىرىپ, اڭگىمە-دۇكەن قۇرۋ, تاماقتان سوڭ اس قايىرىلماي, ۇستەلدەن تۇرماۋ سەكىلدى ىزگى سالتتى ساقتاماعاندىقتان, رۋحاني بايلانىس السىرەپ كەتكەنىن ايتتىم.
جالپى, ءار وتباسىنىڭ ەڭ باستى بايلىعى – بالالارى بولۋعا ءتيىس. قوعامداعى وتباسى ينستيتۋتىنىڭ نەگىزگى مىندەتى دە – بالا تاربيەلەپ, ەلگە دۇرىس ازاماتتار ءوسىرىپ, قوسۋ. الايدا, بۇگىن ماتەريالدىق جاعداي مەن ءمانساپتى ءبىرىنشى كەزەككە قويعان زامانداستارىمىزدىڭ كوپشىلىگى بالانى وتباسىنىڭ بايلىعى دەپ سانامايدى. سول سەبەپتى, بۇرىنعى اتالارىمىزداي بالاسىنىڭ سانىمەن ەمەس, دۇنيەمەن عانا ماقتانۋعا تىرىسادى.
باتىر اتامىز باۋىرجان مومىشۇلى بۇرىنىراقتا «بەسىك جىرىن جىرلايتىن كەلىندەرىمىز, ەرتەگى ايتاتىن اجەلەرىمىز ازايىپ بارا جاتىر» دەپ نالىعان. مىنە, سول قاۋىپ بۇگىن ءومىردىڭ ءوز كورىنىسىنە اينالىپ وتىر. سونىڭ سالدارىنان ءداستۇردى سىيلامايتىن ۇرپاق ءوسىپ كەلەدى. بالالار دا اتا-انا مەيىرىنە قانا الماي كەلەدى. ويتكەنى, جاس وتباسىلاردىڭ كوبى سابيلەرىن بالا باعۋشىعا تاپسىرىپ قويا بەرەدى. ونىڭ شىققان تەگى مەن العان تاربيەسىنە قاراماي, كىم ازىراق اقشا سۇراسا, سوعان بالاسىن سەنىپ تاپسىرادى. بۇل, ارينە, تۇرمىستىق تاپشىلىقتان بولۋى مۇمكىن. بىراق, مەنىڭ پسيحولوگ رەتىندە ايتقىم كەلگەنى, بالانىڭ تاربيەسى مەن ونىڭ ءوسىپ-قالىپتاسۋى ءبىرىنشى كەزەكتە بولۋى كەرەك.
بۇل ورايدا, تىم بولماسا, اپتانىڭ ءبىر كۇنى وتباسىنا ارنالىپ, اس ءۇي ءبارىمىزدىڭ باس قوسىپ, ەمەن-جارقىن وتىراتىن ورتامىزعا اينالۋعا ءتيىس. داستارحان باسى تولماي, ءۇي يەلەرىنىڭ بالالارىمەن باسى قوسىلا بەرمەيتىن وتباسىن ادامنىڭ جىلى ۇياسى دەۋگە كەلمەيدى. ال, وتباسىندا جىلىلىق كورىپ, مەيىرگە قانىپ وسپەگەن بالادان مەيىرىم كۇتۋگە بولمايدى.
ليمانا قويشيەۆا,
پسيحولوگيالىق داعدارىس ورتالىعىنىڭ جەتەكشىسى
