اكىمدىكتە وتكەن دوڭگەلەك ۇستەلدە مىندەتتى الەۋمەتتىك مەديتسينالىق ساقتاندىرۋ جۇيەسىنە ءوتۋدىڭ دايارلىق جۇمىستارىن قورىتىندىلادى.
جاڭا جىلدىڭ 1 قاڭتارىنان باستاپ جۇزەگە اسىرىلاتىن جاڭا جۇيەنىڭ تيىمدىلىگىن حالىق اراسىندا ءتۇسىندىرۋ بۇگىنگى كۇنگە دەيىن ءوز جالعاسىن تابۋدا. جىل باسىنان بەرى 11 مىڭنان استام كەزدەسۋ ۇيىمداستىرىلىپ, ونىڭ اياسىندا ەلوردا جۇرتىنىڭ 98,5 پايىزىن قۇرايتىن 700 مىڭنان استام تۇرعىندار قامتىلعان. ودان بولەك, الەۋمەتتىك جەلىلەردە ءمامس تۋرالى 15 مىڭنان اسا ماتەريال جاريالانىپ, 1 ملن-نان استام تۇسىندىرمە پاراعى تۇرعىندارعا تاراتىلعان.
– الداعى 19 جەلتوقسان كۇنى «ءىKOMEK» ورتالىعى ارقىلى حالىققا ءتۇسىندىرۋ جۇمىستارىن ۇيىمداستىراتىن بولامىز. جانە «جانۇيا» وتباسىن قولداۋ ورتالىعىندا دا ءمامس بويىنشا اقپاراتتىق ءتۇسىندىرۋ جۇمىستارىن قولعا الادى. تاعى ءبىر ايتىپ وتەتىن جايت, اتالعان جۇمىس بويىنشا مونيتورينگ جۇرگىزۋ ماقساتىندا ءبىزدىڭ باسقارمادا ءمامس بويىنشا كەڭەس قۇرۋدى جوسپارلاپ وتىرمىز, – دەدى نۇر-سۇلتان قالاسى قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا.
جيىندا اتاپ كورسەتىلگەندەي, ەلوردادا 105 مەديتسينالىق مەكەمە جاڭا جوبا اياسىندا كەلىسىمشارت جاساۋعا دايىن. بۇگىندە ولاردىڭ بارلىعى دا مەديتسينالىق-اقپاراتتاندىرۋ جۇيەسىمەن قامتىلعان. سول سياقتى ولاردىڭ 102-ءى دەنساۋلىق ساقتاۋ مينيسترلىگىنە كىرىكتىرىلگەن. قالعان ءۇش مەكەمە بويىنشا دا كىرىكتىرۋ جۇمىستارى ءجۇرىپ جاتىر, وسى ايدىڭ 15-ىنە اياقتاۋ كوزدەلۋدە.
سونىمەن بىرگە ءمامس اياسىندا كورسەتىلگەن قىزمەتكە تولەماقى جاساعىسى كەلگەن ءاربىر ازامات قالاداعى 28 مەديتسينالىق مەكەمەنىڭ 14-ىندە تولەم تەرمينالى ورناتىلعان.
