استانا قالالىق ءماسليحاتتىڭ كەزەكتى تۇراقتى كوميسسيا وتىرىسى ءوتىپ, وندا قالانىڭ دامۋىنا سەرپىن بەرەتىن ماسەلەلەر تالقىلاندى.
الدىمەن ەلوردالىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ءالىبي جۇماەۆ قالالىق ءماسليحاتتىڭ 2015 جىلعى 11 جەلتوقسانداعى «استانا قالاسىنىڭ 2016-2018 جىلدارعا ارنالعان بيۋدجەتى تۋرالى» شەشىمىنە وزگەرىستەر ەنگىزۋ تۋرالى بايانداما جاسادى. ول ءوز سوزىندە بيىلعى جىلعى ەلوردانىڭ دامۋ دەڭگەيى ەسەلەنگەنىن ايتىپ, سالىق تۇسىمدەرى ارتقانىن جەتكىزدى. سونىمەن بىرگە, قارالىپ وتىرعان قوسىمشا قارجىلاردىڭ دەنى ەلوردانىڭ سانيتارلىق سالاسى مەن تازالىق شارالارىنا جانە مەرەكەگە بايلانىستى قالانى بەزەندىرۋگە باعىتتالىپ وتىرعانىن باياندادى. سونداي-اق, الەۋمەتتىك سالا دا نازاردان تىس قالمايتىندىعىن ايتتى.
كوميسسيا وتىرىسىندا مەملەكەتتىك قاجەتتىلىكتەر ءۇشىن جەر ۋچاسكەلەرىن جانە وندا ورنالاسقان جىلجىمايتىن مۇلىك وبەكتىلەرىن ساتىپ الۋ تۋرالى شارتتاردىڭ جوبالارىن كەلىسۋ تۋرالى جانە استانا اكىمدىگى جانىنداعى سىبايلاس جەمقورلىققا قارسى ic-قيمىل جونىندە ۆەدومستۆوارالىق كوميسسياسىنىڭ قۇرامى مەن ەلوردا اكىمدىگىنىڭ جانىنداعى مال شارۋاشىلىعى سالاسىنداعى ماسەلەلەر جونىندەگى كوميسسيانىڭ قۇرامى جايىندا اڭگىمە ءوربىدى.
جيىندا تاعى ءبىر ماڭىزدى ماسەلە ءسوز بولدى. ول – كەشە عانا پارلامەنتتىڭ قوس پالاتاسى قابىلداعان ەل ءۇشىن ەرەك, ساياسي مازمۇنى بولەك تاۋەلسىزدىگىمىزدىڭ 25 جىلدىعىنا ارنالعان دەكلاراتسيانىڭ قابىلدانۋى. ءماسليحات دەپۋتاتتارى بۇل ماڭىزدى قۇجاتتى ءبىراۋىزدان قولداپ, ءوز ويلارىمەن ءبولىستى.
– قر پارلامەنتى قابىرعاسىندا قابىلدانعان تاۋەلسىزدىك دەكلاراتسياسى بيىلعى تاريحي جىلدا قابىلدانىپ وتىرعان ماڭىزدى قۇجات دەپ باعالايمىن. تاۋەلسىزدىك – ەلدىڭ ۇلكەن باقىتى. ءبىزدىڭ مەملەكەتىمىز جاس قايراتتى جىگىتتىڭ جاسىنا كەلگەن ۋاقىتىندا قانشاما جەتىستىكتەرگە جەتىپ, الەم تانىعان ەلگە اينالدى. ەكونوميكامىزدىڭ قۋاتى ارتىپ, الەۋمەتتىك سالا دامىدى. جاڭا باعدارلامالار قابىلداندى. قازاقستاندى مەكەندەگەن ۇلتتاردىڭ بارلىعى ءبىر ماقساتقا بىرىگىپ, ەڭبەكتىڭ كورىگىن قىزدىردى. استانامىز كوز الدىمىزدا اسەم قالاعا اينالدى. قانشاما وقۋ ورىندارى اشىلدى. جاڭا مەكتەپتەر بوي كوتەردى. ءبىلىمدى جاستاردىڭ لەگى قالىپتاستى. سونىڭ بارلىعى ەلباسىنىڭ ساليقالى ساياساتىنىڭ جەمىسى دەپ بىلەمىن. سوندىقتان تاۋەلسىزدىك دەكلاراتسياسىن تولىق قولدايمىن! – دەدى ءماسليحات دەپۋتاتى زاۋرە ءجۇسىپوۆا.
ال ەلوردالىق ءماسليحاتتىڭ جاس دەپۋتاتى اسحات ورالوۆ ەگەمەندىكتىڭ 25 جىلدىق تاريحىندا قابىلدانعان تاۋەلسىزدىك دەكلاراتسياسىن جاستار دا قولدايتىندىعىن جەتكىزدى. «ەلىمىزدىڭ وسى ۋاقىت ارالىعىندا جەتكەن جەتىستىكتەرى مەن جەڭىستەرى قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ سارابدال ساياساتىنىڭ ارقاسىندا جۇزەگە استى دەپ سەنىممەن ايتا الامىز. سوندىقتان مەملەكەت باسشىسىنىڭ ەرىك-جىگەرى مەن كورەگەندىلىگى ەل دامۋىنىڭ تابىستى جولىن ايقىنداپ, رەسپۋبليكامىزدىڭ ءوسىپ-وركەندەۋىنە مۇمكىندىك بەردى» دەدى ول.
ازامات ەسەنجول
