استانا قالاسى اكىمدىگى جانىنداعى ءدىني بىرلەستىكتەرمەن بايلانىس جونىندەگى كەڭەستىڭ وتىرىسى ءوتتى.
استانا قالاسى اكىمىنىڭ ورىنباسارى ەرمەك امانشاەۆتىڭ توراعالىعىمەن وتكەن جيىنعا اۋدان اكىمدىكتەرىنىڭ قىزمەتكەرلەرى, جەرگىلىكتى مەملەكەتتىك مەكەمەلەردىڭ باسشىلارى, دەپۋتاتتار, ءدىني بىرلەستىكتەردىڭ جەتەكشىلەرى, قوعام قايراتكەرلەرى قاتىستى. وتىرىس بارىسىندا ەلوردامىزدا قالىپتاسىپ وتىرعان ءدىني احۋالعا جان-جاقتى باعا بەرىلىپ, شىنايى اڭگىمە قوزعالدى.
جيىن باسىندا قالا اكىمىنىڭ ورىنباسارى ە.امانشاەۆ استانا قالاسىندا ءدىني تۇرعىدا ەشقانداي كيكىلجىڭنىڭ ورىن الماعانىن اتاپ ءوتتى. بۇل رەتتە وسى باعىتتا جۇمىس جۇرگىزىپ وتىرعان مەملەكەتتىك مەكەمەلەر مەن ءدىني بىرلەستىكتەردىڭ جەتەكشىلەرى جاۋاپكەرشىلىك تانىتىپ كەلە جاتقانىن جەتكىزدى.
كەڭەس وتىرىسىندا ەكى ماسەلە قارالىپ, ءبىرىنشى كەزەكتە استانا قالاسىندا ەلىمىزدىڭ ءدىن سالاسىنداعى زاڭنامانىڭ بۇزىلۋىنىڭ الدىن الۋدا مەملەكەتتىك ورگانداردىڭ ءتيىمدى بىرلەسە جۇمىس ىستەۋى جانە دەسترۋكتيۆتى ءدىني اعىمداردىڭ يدەولوگياسىنىڭ الدىن الۋ جۇمىستارى تۋرالى بايانداما تىڭدالدى. ايتۋلى ماسەلە توڭىرەگىندە ءىىد ەكسترەميزممەن كۇرەس باسقارماسى باستىعىنىڭ ورىنباسارى ماديار ايتۋعانوۆ باسقارمانىڭ تاراپىنان جاسالعان ءىس-شارالار تۋرالى جان-جاقتى مالىمەت بەردى. استانادا ءدىني احۋالدىڭ تۇراقتى ەكەنىن ايتتى.
ەكىنشى سۇراق بويىنشا بايانداما جاساعان «نۇر-استانا» ورتالىق مەشىتىنىڭ نايب-يمامى قازاقستان مۇسىلماندارى ءدىني باسقارماسىنىڭ ۇيىمداستىرعان ءىس-شارالارى جونىندە حابارلاما جاسادى. قازىرگى تاڭدا استانا مەشىتتەرىندە قمدب تاراپىنان بەكىتىلگەن 45 ءدىن قىزمەتكەرى جۇمىس جاساۋدا. ناسيحات جۇمىستارىن جانداندىرۋ ماقساتىندا باس ءمۇفتيدىڭ بۇيرىعىمەن جىل باسىنان بەرى قالاداعى «نۇر استانا», «ءالجان انا», «ءال-عاني», «تولەباي» جانە «شەيح كۇنتا قاجى» مەشىتتەرىنە 9 بىلىكتى ءدىن مامانى قىزمەتكە تاعايىندالدى. الماتى قالاسىنداعى «نۇر مۇباراك» ەگيپەت يسلام ۋنيۆەرسيتەتىنەن قابىلبەك جۇمابەكوۆ ەسىمدى تەولوگ-مامان ارنايى شاقىرتىلىپ, كەلىسىمشارت نەگىزىندە جۇمىس جۇرگىزىلۋدە. استانا قالالىق ءدىن ىستەرى جونىندەگى باسقارماسى ءدىن پروبلەمالارىن زەرتتەۋ ورتالىعىمەن بىرلەسە وتىرىپ, وسى جىلدىڭ 25-29 ءساۋىرى كۇندەرى وتكەن رانت-تىڭ جۇمىسى اياسىندا قالا بويىنشا ءتۇرلى دەڭگەيدەگى 24 كەزدەسۋ ۇيىمداستىرىپ, وسى شارالارعا 10 470 ادام قامتىلدى.
استانا قالاسىنىڭ ءدىن ىستەرى جونىندەگى باسقارماسىنىڭ باسشىسى دانيار ەسين ءوزىنىڭ بايانداماسىندا كەڭەستىڭ ءدىن سالاسىنداعى مەملەكەتتىك ساياساتتى جۇرگىزۋدەگى ماڭىزدى ءرولىن اتاپ ءوتتى. سونىمەن قاتار, كەڭەس جانىنان ساراپشى توپ قۇرۋدى ۇسىندى. اتالعان توپقا عالىمدار, تەولوگتار, ءداستۇرلى ءدىن وكىلدەرى جانە ۇكىمەتتىك ەمەس ۇيىم مۇشەلەرىن تارتىپ, قالاداعى ءدىني احۋالدى زەرتتەۋمەن اينالىسۋ قاجەتتىلىگىن جەتكىزدى.
كەڭەس وتىرىسىن قورىتىندىلاعان استانا قالاسى اكىمىنىڭ ورىنباسارى ە.امانشاەۆ مەملەكەتتىك ورگاندارعا جانە كەڭەس مۇشەلەرىنە كەڭەستىڭ 2017 جىلعى جۇمىس جوسپارىنا ۇسىنىستار ەنگىزۋدى جانە اتالعان سۇراقتار بويىنشا ءتيىستى ءىس-شارالار ۇيىمداستىرۋدى تاپسىردى.
