جەكەشەلەندىرۋدىڭ كەشەندى جوسپارىنا سايكەس استانادا بىرنەشە كاسىپورىندى باسەكەلەستىك ورتاعا بەرۋ ناۋقانى جۇرۋدە. بۇل ۇدەرىس بىرقاتار سپورت كلۋبتارىن ساۋداعا شىعارۋمەن باستالدى. وسى كۇندەرگە دەيىن اۋكتسيون ارقىلى كوممۋنالدىق مەنشىك نىساندارىنىڭ ساناتىنا جاتاتىن «قايسار» سپورت كلۋبى, «استانا» كوكپار كلۋبى, ح.س.وماروۆ اتىنداعى شاحمات كلۋبى جانە «استانا باتىرى» جەكپە-جەكتەر كلۋبى ساتىلدى.
وسىعان وراي استانا قالاسى اكىمىنىڭ ورىنباسارى اندرەي لۋكيننىڭ قاتىسۋىمەن ءباسپاسوز ءماسليحاتى ۇيىمداستىرىلىپ, وندا اتالمىش ناۋقاننىڭ بارىسى ەگجەي-تەگجەيلى ءتۇسىندىرىلدى.
«كوممۋنالدىق مەنشىككە كىرگەن كاسىپورىنداردى باسەكەلەستىك ورتاعا بەرۋدىڭ ناتيجەسىندە قالا بيۋدجەتىندە 500 ملن تەڭگەدەن ارتىق قارجى ۇنەمدەلەدى. بۇل اقشا الەۋمەتتىك سالاعا جاتاتىن يگىلىكتى ىستەرگە جۇمسالاتىن بولادى. ءتيىستى جوسپارعا سايكەس جىل سوڭىنا دەيىن تاعى دا بەس كوممۋنالدىق مەنشىك نىسانى ساۋداعا شىعارىلادى» دەيدى قالا باسشىسىنىڭ ورىنباسارى.
ونىڭ ايتۋىنشا, ساتىلعان سپورت كلۋبتارى وزدەرىنە اكىمدىك تاراپىنان بەكىتىلگەن مىندەتتى وسى كۇندەرگە دەيىن ورىندادى. وسى كاسىپورىنداردا جەكەمەنشىك عيمارات ەشقاشان بولماعان. ولار بەلگىلى ءبىر جايدى جالعا الىپ وتىرعان. سوندىقتان قارجىلاندىرۋشى تاراپقا ۇلكەن سالماق تۇسكەن. ماسەلەن, ءبىر كوممۋنالدىق نىساندى ۇستاۋ ءۇشىن ءجۇز ميلليونداعان اقشا جۇمسالعان. ال بۇل كاسىپورىنداردىڭ باسەكەلەستىك ورتاعا بەرىلۋىنەن اكىمدىكتىڭ ءوزىنىڭ دە, كلۋبتىڭ دا ۇتاتىن تۇستارى كوپ. اكىمدىك بيۋدجەت قارجىسىن ۇنەمدەسە, كاسىپورىندار جەكەمەنشىككە ءوتۋ ارقىلى كاسىپكەرلىك داميدى.
«استانا» كوكپار كلۋبى 198 مىڭ 096 تەڭگەگە ساتىلعانى تالايلارعا تاڭدانىس تۋدىرعانى بەلگىلى. كوپشىلىگى ونىڭ ارزان كەتكەنىنە تاڭدايلارىن قاقتى. ا.لۋكيننىڭ سوزىنشە, بۇل كلۋبتىڭ باستاپقى باعاسى 41 ملن 174 مىڭ تەڭگە بولعان. بۇل كلۋب ساۋدانى ءۇشىنشى رەت ۇيىمداستىرعاندا عانا ساتىلدى. كلۋبتىڭ جاڭا يەسى – جىلقى وسىرۋمەن اينالىساتىن باۋىرجان ءشارىپ دەيتىن كاسىپكەر. ول جوعارى اتالعان سوماعا كلۋبتى ساتىپ السا, باستاپقى سومانىڭ 15 پايىزى مولشەرىندەگى قايتارىمسىز كەپىلدىك سالىمدى قوسا ەسەپتەگەندە 3 ملن 630 مىڭ 346 تەڭگەنى جۇمساعان.
وزگە سپورت كلۋبتارى دا باستاپقى باعادان ەداۋىر ارزان ساتىلدى. ونىڭ سەبەبى, ءۇشىنشى ساۋدانىڭ شارتى جەكەشەلەندىرۋ نىسانى اۋكتسيونعا ەڭ تومەنگى باعانى بەلگىلەمەستەن باعانى تومەندەتۋ ءادىسىن پايدالانا وتىرىپ شىعارىلاتىندىعىندا.
«شىنىمدى ايتايىن, ساۋدانىڭ قورىتىندىلارى ءبىزدى دە تاڭداندىردى. قالا اكىمى اتالعان ماسەلەنى مۇقيات تەكسەرىپ, كاسىپورىنداردىڭ الەۋمەتتىك ماڭىزىنا سايكەس ساۋداعا قۇقىقتىق باعا بەرۋ ءۇشىن ماتەريالداردى استانا پروكۋراتۋراسىنا جولداۋدى تاپسىردى. ءبىز سولاي ىستەپ, پروكۋراتۋرادان جاۋاپ الدىق. وندا اۋكتسيوندى وتكىزۋ كەزىندە ەشقانداي قۇقىق بۇزۋشىلىق ورىن الماعانى, پروكۋرورلىق ارەكەتتىڭ قاجەتسىزدىگى ايتىلعان» دەيدى ا.لۋكين.
الايدا كاسىپورىندار ساتىلدى ەكەن دەپ, اكىمدىك بۇل سپورت كلۋبتارىن قولداۋدى توقتاتپايدى. مەملەكەتتىك الەۋمەتتىك تاپسىرىس نەگىزىندە مۇگەدەك جانە تۇرمىسى تومەن وتباسىلاردان شىققان بالالار تەگىن ساباقتارعا قاتىسا الادى. ول ءۇشىن بيۋدجەتتەن قارجى بولىنەدى.
كەشە جەكەشەلەندىرۋ جوسپارىنىڭ اياسىندا كەزەكتى ساۋدا اتقارىلدى. بۇل جولى استانا قالاسىنىڭ «كوڭىلدى تاپقىرلار تەاترى», «اقمولا ديىرمەن» جشس جانە «استانا» سۋ پولوسى سپورت كلۋبى اۋكتسيونعا شىعارىلدى.
امانعالي قالجانوۆ
