ەكى وبلىستىڭ جارمەڭكەسى قىزدى

استاناداعى «حان شاتىر» سوو جانىنداعى الاڭدا باتىس قازاقستان جانە اتىراۋ وبلىسىنىڭ ازىق-تۇلىك جارمەڭكەسى وتۋدە.

باتىس قازاقستان وبلىسىنىڭ «نۇرجانار», «رودنيك», «يمانوۆسكي پولۋفابريكاتى» سياقتى جاۋاپكەرشىلىگى شەكتەۋلى سەرىكتەستىكتەر ونىمدەرى استانالىق تۇتىنۋشىلارعا دا جاقسى تانىمال. سوندىقتان بولار, «يمانوۆسكي پولۋفابريكاتى» جشس-نىڭ ەت شۇجىعى, پەلمەنى جانە تاعى باسقا ونىمدەرىن ساۋدالاۋشىلار كوپ بولدى. باتىس قازاقستان وبلىسى اكىمىنىڭ ءبىرىنشى ورىنباسارى ارمان وتەعۇلوۆتىڭ ايتۋىنشا, كاسىپورىننىڭ ەلوردا ءوز وكىلدىگى كوپتەن بەرى جۇمىس ىستەيدى ەكەن. سونداي-اق «كۋبلەي» جشس-نىڭ كونسەرۆلەنگەن ەت ونىمدەرىنە قاتىستى دا وسىلاي ايتۋعا بولادى. ەلوردا تۇرعىندارى پەلمەن العىسى كەلسە, ءبىرىنشى كەزەكتە «يمانوۆسكي» پەلمەندەرىن ىزدەيتىنىن ءوز كوزىمىزبەن دە تالاي كورگەنبىز. وبلىستاعى 12 اۋداننىڭ شارۋاشىلىقتارى ەلوردالىقتارعا كوكونىس تۇرلەرىن, ەت پەن ءسۇت ونىمدەرىن ۇسىنىپ قويماي, ۇن مەن ماكارون ونىمدەرىنە دە قارىق قىلدى. وبلىستا وسى باعىتتا جۇمىس ىستەيتىن «بەلەس اگرو» اق-نىڭ ونىمدەرى تەك قازاقستاندىقتارعا عانا ەمەس, الىس-جاقىن شەتەلدەرگە دە تانىمال. كاسىپورىننىڭ جوعارى سۇرىپتى ۇنىنىڭ ءبىر كەلىسى جارمەڭكەدە 120 تەڭگەدەن ساتىلدى.

اتىراۋ وبلىسى ەڭ ءبىرىنشى كەزەكتە استانالىقتاردى بالىق ونىمدەرىمەن ءتانتى ەتكەن ءوڭىر. «كاسپي-بالىق» وندىرىستىك كەشەنى الىپ كەلگەن ءتۇرلى بالىقتاردى استانالىقتار شۇباتىلعان كەزەككە تۇرىپ ساتىپ الىپ جاتتى. اتىراۋلىقتار سيىر, جىلقى, قوي ەتىن 1000-1100 تەڭگەدەن ۇسىنعان بولاتىن. بقو جارمەڭكەسىندە ەتتىڭ باعاسى ءسال قىمباتتاۋ بولدى. سيىر ەتى مىڭ تەڭگەدەن ساتىلعانىمەن, جىلقى ەتى 1300 تەڭگەدەن ساۋدالاندى. دەگەنمەن, بۇل باعا ءبارىبىر استانا بازارلارىنداعى باعادان ورتاشا ەسەپپەن العاندا10-15 پايىزعا ارزان. ەكىنشىدەن, قالاي دەگەنمەن جايلاۋدا ەركىن جايىلىپ وسكەن مالدىڭ ەتى. ەتتىڭ ساپاسىن ءبىر-ەكى قاراپ جىبەرگەننەن جاقسى شامالايتىن اعايىندار ساۋدا كورىگىن قىزدىرىپ, سول بويدا تالاپ اكەتىپ جاتتى. جارمەڭكەنىڭ قىزىعى ەرتەڭ كەشكە دەيىن جالعاسادى.

مەڭدوللا نۇرىمۇلى