مەملەكەتتىك ساتىپ الۋلار سالاسىندا جەمقورلار مەملەكەتكە 110 ملرد. تەڭگە شىعىن كەلتىردى. بۇل تۋرالى ورتالىق كوممۋنيكاتسيالار قىزمەتىندەگى بريفينگتە قر ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگى توراعاسىنىڭ ورىنباسارى مارات احمەتجانوۆ ءمالىم ەتتى.
«احۋالدىق ورتالىقتىڭ ساراپتامالىق ماتەريالدارىنىڭ نەگىزىندە كەلتىرىلگەن 110 ميلليارد تەڭگە زالال بويىنشا 516 قىلمىستىق ءىس قوزعالدى», – دەدى م. احمەتجانوۆ.
بىلتىردان بەرى اگەنتتىكتە احۋالدىق ورتالىق جۇمىس ىستەپ جاتقانىن ەسكە سالىپ وتكەن ول, ونىڭ قىزمەتكەرلەرى مەملەكەتتىك ورگاندار مەن وزگە دە اشىق اقپاراتتىق كوزدەردى پايدالانىپ, كەلىپ تۇسكەن مالىمەتتەرگە تالداۋ جاساپ, قۇقىق بۇزۋشىلىقتىڭ پروبلەمالىق ايماقتارىن انىقتاۋ تۇرعىسىندا ساراپتامالار جۇرگىزەتىنىن اتاپ ءوتتى. سونىمەن قاتار, ولار شاعىن جانە ورتا كاسىپكەرلىكتىڭ قىزمەتىنە ارالاسپايدى.
2013 جىلى قارجى پوليتسياسىندا ون مىڭنان استام قىلمىس تىركەلگەن. ال بيىلعى بەس ايدا وندىرىستە بەس مىڭعا جۋىق قىلمىس تىركەلىپ وتىر. ونىڭ ىشىندە 27 پايىزىن اۋىر جانە اسا اۋىر قىلمىستار قامتىدى. بارلىق قىلمىستاردىڭ ىشىندە 65 پايىزى (1,5 جىلدا) ەكونوميكالىق قىلمىستارعا قاتىستى, 21 پايىزدان استامى سىبايلاس جەمقورلىق قىلمىستارى بولسا, ال قالعاندارى وزگە قىلمىستارعا بايلانىستى. وتكەن جىل مەن بيىلعى بەس ايدا كەلتىرىلگەن شىعىندار بويىنشا انىقتالعان جالپى سوما 290 ملرد. تەڭگەنى قۇرادى. تەرگەۋ بارىسىندا قابىلدانعان شارالار كەزىندە ونىڭ 157 ملرد. تەڭگەسىن وتەۋ شارالارى جۇزەگە اسىرىلدى.
م.احمەتجانوۆتىڭ سوزىنە قاراعاندا, بىلتىردان باستاپ ەسەپتەگەندە بۇگىندە جەمقورلىق قىلمىستارى ءۇشىن ءتۇرلى دەڭگەيدەگى 300-گە تارتا باسشىلار قىلمىستىق جاۋاپكەرشىلىككە تارتىلدى. ونىڭ ىشىندە 22-ءسى – رەسپۋبليكالىق دەڭگەيدەگىلەر, 83-ءى – وبلىستىق, سونداي-اق قالعاندارى قالالىق جانە اۋداندىق دەڭگەيدەگى باسشىلار.
وسى ورايدا ول بۇرىنعى ەكى وبلىستىڭ اكىمدەرى مەن ۇلتتىق كومپانيالارداعى, ۆەدومستۆولارداعى بۇرىنعى لاۋازىمدى قىزمەتكەرلەرگە قاتىستى قوزعالعان قىلمىستىق ىستەر قوعامدىق رەزونانس تۋدىرعانىن اتاپ ءوتتى.
