قازىردەن باستاپ «EXPO-2017» حالىقارالىق كورمەسىنە كومپانيانىڭ قىزمەتكەرلەرىمەن قاتار قاراپايىم قالا جاستارى دا قىزۋ دايىندالىپ جاتىر. قالاي دەيسىز عوي؟ كورمەگە ەرىكتى بولۋ ءۇشىن ەلوردالىقتار اكىمدىككە قاراستى «استانا جاستارى» رەسۋرستىق ورتالىعىنا كەلىپ, ارنايى وقۋ باعدارلاماسىنان ءوتىپ ءجۇر. سەبەبى, شەتەلدەن كەلگەن قوناقتاردى جىلى قارسى الىپ, جول سىلتەۋ – ەرىكتىلەردىڭ باستى مىندەتى.
ارينە, الەمدىك دەڭگەيدەگى شارانىڭ باسى-قاسىندا ءجۇرەتىن جاستاردىڭ موينىندا ۇلكەن جاۋاپكەرشىلىك بار. ەرىكتى اتانۋ ءۇشىن قويىلاتىن تالاپتار دا جوعارى. 16 جاسقا تولعان ازامات قازاق, ورىس, اعىلشىن جانە وزگە شەت ءتىلدەرىن ءبىلۋى كەرەك. بىراق, ەڭ باستىسى – كورمەگە ۇلەس قوسۋعا ىستىق ىقىلاس تانىتۋ.
ەرىكتى اتقارعان جۇمىسى ءۇشىن ماتەريالدىق پايدا تاپپايتىنى بەلگىلى. دەگەنمەن, ەلىمىزدە ءتۇرلى شارالارعا قاتىسىپ, تەگىن جۇمىس ىستەيتىندەردىڭ قاتارى كوبەيىپ كەلەدى. «استانا جاستارى» ورتالىعىندا قوعام ومىرىنە بەلسەندى اتسالىسىپ جۇرگەن جاسوسپىرىمدەر شوعىرلانعان. وزدەرى ۇيىمداستىرعان فلەشموبقا بارعانىمىزدا, ولاردىڭ كەيبىرەۋىمەن اڭگىمەلەسۋدىڭ ءساتى ءتۇستى.
جاڭا دوستار تاپتىم
ع.قايىربەكوۆ اتىنداعى №2 مەكتەپ-گيمنازياسىنىڭ 9-سىنىپ وقۋشىسى دانيال كەلگىنباەۆ – ۇيىمعا جاڭادان كەلىپ قوسىلعانداردىڭ ءبىرى. ورتالىققا دوسى ەرتىپ كەلگەن ەكەن. «ءبىز كوبىنەسە فلەشموب مەن سەنبىلىكتەر ۇيىمداستىرىپ تۇرامىز. ءتالىمگەرىمىز قالاداعى ءارتۇرلى شارالارعا شاقىرادى. ماسەلەن, تاۋەلسىزدىك سارايىندا وتكەن مەنتالدى اريفمەتيكا بويىنشا وليمپيادادا بەلسەندىلىك تانىتتىق. وزگەگە شىن نيەتىڭمەن قول ۇشىن بەرگەندە, ءوزىڭدى جاقسى سەزىنەسىڭ. ال ءۇلكەندەر العىسىن جاۋدىرىپ, تىلەك ايتقاندا, جاقسىلىقتى ەسەلەپ جاساعىڭ كەلەدى. قوعاممەن ەتەنە جاقىن ارالاسا باستاعاننان مىنەزىم اشىلعانىن بايقادىم. قازىر تانىمايتىن اداممەن بىردەن ءتىل تابىسا كەتەمىن. ۇيىمعا كەلگەلى جاڭا دوستار تاپتىم» دەيدى ول.
باستى مىندەتىمىز – جاردەمدەسۋ
ال №46 مەكتەپ-گيمنازيانىڭ 11-سىنىپ وقۋشىسى باقىتجان ماقاەۆا ورتالىققا ەكى جىل بۇرىن كەلدى. كوپشىلىك سياقتى العاش ۇيىم تۋرالى ينتەرنەتتەن بىلگەن. «شارالاردىڭ فورماتى ءارتۇرلى, سوعان سايكەس اتقارىلاتىن جۇمىستار دا وزگەشە. مەن كوبىنەسە اۋدارمامەن اينالىسامىن. قالا كۇنىنە ارنايى ۇيىمداستىرىلعان Art Fest Festival ەرەكشە ەسىمدە قالدى. سپورتتىق سايىستارعا دا بەلسەندى قاتىسامىز» دەپ جۇمىس ءتارتىبىن ءتۇسىندىردى باقىتجان.
– مەن ءۇشىن ەرىكتى بولۋ دەگەنىمىز – جاقىنىڭا جاردەمدەسۋ, ەلىمىزدىڭ دامۋىنا تيتتەي دە بولسىن ۇلەس قوسۋ. «وڭ قولىڭ بەرگەندى سول قولىڭ كورمەسىن» دەيدى عوي قازاقتا. قولىڭنان كەلىپ تۇرعان ءىستى جاساۋ ءبىز سياقتى جاستار ءۇشىن تۇك قيىن ەمەس. جاڭادان دوس-جاران, پىكىرلەس, سۇحباتتاس ادامداردى تابۋىڭ ءوز الدىنا. ءالى وقۋ وقىپ جۇرگەن جاسوسپىرىمدەرگە بۇل تاجىريبە جيناقتاۋعا تاپتىرماس مۇمكىندىك. ۇيىمنىڭ ارقاسىندا قاي سالادا قارىم-قابىلەتىم بارىن ءبىلىپ قالدىم. قازىر شەت ءتىلىن جاقسى مەڭگەرسەم, بولاشاقتا اۋدارماشى بولعىم كەلەدى.
«EXPO-2017» حالىقارالىق كورمەسى تاريحتا قالاتىنداي وتكىزىلسە دەگەن ارمانىم بار. شەتەلدىك مەيماندار ەلىمىزدى جاقسى جاعىنان ءبىلىپ قايتسا دەيمىن. ال ءبىز سەنىپ تاپسىرىلاتىن شارۋالاردى تياناقتى ورىنداۋدى مىندەت سانايمىز, – دەپ اعىنان جارىلدى ول.
كەرەمەت كورمەنى كورەمىز
№8 ورتا مەكتەپتىڭ 10-سىنىپ وقۋشىسى ادەليا نىعماتۋلينا دا ورتالىققا 2015 جىلى كەلگەن. Instagram الەۋمەتتىك جەلىسىن پاراقتاپ وتىرىپ, ءبىرىن-ءبىرى تانىمايتىن دوستارىن فوتودا بايقاپ قالعان. سۇراستىرا كەلە, قۇربى-قۇرداستارى ءجيى باراتىن ورتالىق بارىن بىلگەن. ادەليا مەكەنجايدى الىپ, تۋرا ورتالىققا تارتقان. «ۇيىمعا مۇشە بولۋ ءۇشىن بار بولعانى ساۋالناما تولتىرىپ, باسشىلارمەن تىلدەستىم» دەيدى ول.
– وقۋعا مۇلدەم كەدەرگى كەلتىرمەيدى, كەيدە كەرىسىنشە وسى جەردە ءۇي جۇمىسىن جاساپ الامىز. قالالىق ءىس-شارالاردىڭ تۇگەلى دەرلىك ءبىزدىڭ نازارىمىزدان قالىس قالمايدى. مەرەكەلىك شارالاردا ەلىمىزگە تانىمال تۇلعالارمەن تىلدەسۋگە مۇمكىندىك بار. مەن ءۇشىن قالامىزدىڭ كۇننەن-كۇنگە كوركەيۋىنە كۋاگەر بولۋدىڭ ءوزى باقىت, – دەپ ءسوزىن اياقتادى ول.
جاستاردىڭ ىنتاسىن قولدايدى
جالعان پاتريوتتىقتان الشاق جاستاردى كورىپ, جانىمىز جىلىپ قالدى. ولار ورتالىققا ەرىككەندىكتەن كەلمەيدى, باسقالارعا كومەكتەسۋدى كوزدەيدى. EXPO كورمەسى – «استانا جاستارى» رەسۋرستىق ورتالىعىنداعى بارلىق ەرىكتىلەر ءۇشىن جىلدىڭ ەڭ باستى شاراسى دەسەك قاتەلەسپەيمىز. ءاربىر ەرىكتى كورمەگە بار كۇشىن سالىپ, قوناقتاردى جاقسى قارسى الۋعا نيەتتى.
قازىر ورتالىقتا 14 جاستان 50 جاسقا دەيىنگى 1500-گە جۋىق ەرىكتى بار. ۇيىمعا جاڭادان كەلىپ قوسىلعان ءاربىر ادامدى ەرىكتىلەر مەكتەبىندە دايىندايدى. وقۋ بارىسىندا ءجاسوسپىرىمدەر كورمە تاريحىمەن تانىسادى, ادامدارمەن ءتىل تابىسۋ جولدارىن مەڭگەرەدى. اسىرەسە, ءار ۇلتتىڭ مەنتاليتەتىن ۇعىنىپ, تولەرانتتىق تانىتۋدى ۇيرەنەدى.
بۇگىندە EXPO-2017 كورمەسىنە 4500-دەن استام ەرىكتى ىرىكتەلىنىپ الىندى. بۇل تۋرالى تاياۋدا كومپانيانىڭ كوممەرتسيالاندىرۋ دەپارتامەنتىنىڭ ديرەكتورى داۋلەت ەركىمباەۆ ءباسپاسوز ءماسليحاتىندا ءمالىمدەدى. ولار كۇندىزگى, كەشكى جانە تۇنگى اۋىسىم بويىنشا 8 ساعاتتان جۇمىس ىستەيتىن بولادى. ال ەرىكتىلەردىڭ تاماقتانۋىنا مەكەمەنىڭ ءوزى جاۋاپتى. ول ءۇشىن 1500 ورىنعا ارنالعان ارنايى 3 اسحانا ازىرلەنەدى. ادام باسىنا تاماقتانۋ ورتا ەسەپپەن 700-800 تەڭگەنى قۇرايدى. تاماقتانۋ كەستە بويىنشا جۇرگىزىلەدى. كومپانيا وكىلىنىڭ ايتۋىنشا, ەرىكتىلەردىڭ اراسىندا ءوز قارجىسىنا تاماقتاناتىندار دا بار. ال الەۋمەتتىك جاعدايى تومەن ازاماتتارعا جەڭىلدىكتەر قاراستىرىلعان.
كورمەگە ەرىكتىلەردى قابىلداۋ مەرزىمى ءالى دە جالعاسىپ جاتىر, سوندىقتان قاتارعا قوسىلام دەيتىن جاستار بولسا, مارحابات! سۇراقتار بويىنشا 8 (7172) 78 86 89 بايلانىس نومىرىنە xابارلاسۋعا بولادى.
گۇلدانا تالعاتقىزى
