ۇگىت-ناسيحات تۋرىندا جۇرگەن پارتيالىقتاردىڭ حالىقپەن كەزدەسۋلەر كەستەسى كۇننەن-كۇنگە تىعىز بولا تۇسۋدە. جاقىندا رەسپۋبليكالىقتار ەلىمىزدىڭ ەكى ءوڭىرى – قوستاناي مەن اقتوبەدە ءبىر مەزگىلدە بىرنەشە ءىس-شارا وتكىزدى. وعان 800-گە جۋىق ازامات قاتىستى.
قوستانايداعى كەزدەسۋلەر الدىڭعى قاتارلى بىرقاتار ءوندىرىس ورىندارىنىڭ ەڭبەك ۇجىمىمەن وتكىزىلسە, اقتوبەدە پارتيا مۇشەلەرى مەن پارلامەنت ءماجىلىسى دەپۋتاتتىعىنا كانديداتتار وڭىردەگى جاستارمەن, سپورتشىلارمەن, قوعامدىق پىكىر كوشباسشىلارىمەن كەزدەستى. اتاپ ايتقاندا, پارلامەنت ءماجىلىسىنىڭ دەپۋتتاتىعىنا كانديدات دامير سۋەنتاەۆ «سارىارقا اۆتوپروم» جشس ۇجىمىنا باردى.
– قاجىرلى ەڭبەكتەرىڭىز ءۇشىن العىس ايتامىن. پارلامەنتكە كىرگەندە ارقاشان وتاندىق تاۋار وندىرۋشىلەردىڭ جانە ەڭبەك ادامدارىنىڭ مۇددەسىن قورعايتىن بولامىز. وڭىرلەردەن كەلگەن ازاماتتارىمىزدى قاشاندا ۇلگى ەتەمىز. قوستاناي جەرى ەرەكشە, حالقى دا جىگەرلى, – دەدى د.سۋەنتاەۆ.
ول ۇلتتىق كومپانيالار ديرەكتورلار كەڭەسىنىڭ ءتۇرلى وتىرىسىنا وتاندىق ماشينا جاساۋ سالاسىنىڭ زاڭگەرى جانە وكىلى رەتىندە بىرنەشە رەت قاتىسىپ, ءوندىرىستىڭ قالاي دامىپ جاتقانىن, باسشىلىقتىڭ ءوز قىزمەتكەرلەرىنە قالاي قامقورلىق جاسايتىنىن جانە قانداي تەحنولوگيالاردى قولداناتىنىن ءوز كوزىمەن كورىپ ءجۇر. ودان باسقا دا پارتيا وكىلدەرى وڭىردەگى ءسۇت وندىرىسىمەن تانىسىپ, «نوۆىي دەن» ساۋدا بەلگىسىمەن تانىلعان «ميلح» جشس سەرىكتەستىگىنىڭ ەڭبەك ۇجىمىمەن كەزدەستى.
سونىمەن قاتار, قوستاناي وبلىسىندا پارتيالىقتار كوكپار تارتۋ ويىنىنا قاتىستى. ويىندى پارتيا توراعاسى ايداربەك قوجانازاروۆ ۇيىمداستىردى. ول – قوستاناي وبلىستىق كوكپار فەدەراتسياسىنىڭ پرەزيدەنتى. وسى جىلدار ىشىندە ول ۇلتتىق ات ويىنىنىڭ تانىمال ۇلگىسىن كورسەتىپ, ونى ناسيحاتتاۋعا قوماقتى قارجى بولگەن. سونىمەن قاتار وسى اپتادا پارتيا وكىلدەرى ورال حالقىمەن كەزدەستى. جيىن سوڭى قازاق ەستراداسى انشىلەرىنىڭ كونتسەرتىمەن جالعاستى. ءىس-شاراعا 2500-دەي ادام قاتىستى.
