كەشە, قاسيەتتى جۇما كۇنى, رامازان ايىنىڭ قارساڭىندا استانادا جاڭا مەشىت اشىلدى. ىرىسكەلدى قاجىنىڭ اتى بەرىلگەن اللاعا قۇلشىلىق ەتۋ ورنى ش.قوسشىعۇلۇلى كوشەسىنىڭ ماڭايىندا بوي كوتەردى.
«بۇگىن – كۇللى مۇسىلمان قاۋىمىنىڭ رۋحاني ومىرىندە تاريحي كۇن. قاسيەتتى رامازان ايىنىڭ قارساڭىندا ەلىمىزدە تۇڭعىش رەت پوستمودەرنيزم ستيلىندە سالىنعان مەشىت ەسىگىن ايقارا اشتى. بالامالى ەنەرگيا كوزدەرىمەن قامتاماسىز ەتىلگەن قۇتحانامىز قۇتتى بولسىن, ارداقتى اعايىن!» دەدى مەشىتتىڭ اشىلۋ سالتاناتىندا قازاقستان مۇسىلماندارى ءدىني باسقارماسىنىڭ توراعاسى-باس ءمۇفتي سەرىكباي قاجى وراز.
ودان كەيىن ءسوز العان قر ءدىن ىستەرى جانە ازاماتتىق قوعام ءمينيسترى دارحان كالەتاەۆ ەلىمىزدە وسى كۇندەرى 2600-دەن استام مەشىت بولسا, استانادا 8 مەشىت جۇمىس ىستەيتىنىن اتاپ ءوتتى. «ىرىسكەلدى قاجى» مەشىتى ەلورداداعى توعىزىنشى يماندىلىق ورنى بولىپ وتىر.
«ەگەمەندىك العان كۇننەن باستاپ ەلباسىمىز ەلىمىزدى رۋحاني دامۋعا, قوعامدىق كەلىسىمگە ارقاشاندا شاقىرادى. مەملەكەت باسشىسى ءداستۇرلى ءدىنىمىزدىڭ وركەندەۋىنە ۇنەمى قول ۇشىن بەرىپ, ۇكىمەت قولداۋ كورسەتەدى» دەدى مينيستر.
مەشىت جوباسىن ءبىر توپ ساۋلەتشى جاسادى. ولارعا باسشىلىق ەتكەن قازاقستاننىڭ قۇرمەتتى ساۋلەتشىسى, قر مەملەكەتتىك سىيلىعىنىڭ لاۋرەاتى ساعىندىق جانبولاتوۆتىڭ ايتۋىنشا, مەشىت زاماناۋي ستيلدە جوبالاندى. ساۋلەتشىلەر ءداستۇرلى مەشىتتەر ۇلگىسىنەن مۇلدە وزگە جوبانى دايىنداپ, جۇزەگە اسىردى. بەزەندىرىلۋىندە جاڭا ويۋ-ورنەكتەر قولدانىلدى. ءىشى-سىرتى اپپاق بولىپ جارقىراپ تۇرعان اللانىڭ ءۇيىنىڭ ءبىر ەرەكشەلىگى, جانىنا كۇن باتارەيالارى ورناتىلدى. ياعني, مەشىت ءوزىن-ءوزى 100 پايىز ەلەكتر قۋاتىمەن قامتاماسىز ەتىپ وتىر.
كۇمبەزى وزگەشە, 750 ادامعا ارنالعان مەشىت ءبىر جاعىنان كيىز ءۇيىمىزدى ەسكە تۇسىرەدى. مەشىتكە باس يمام بولىپ جاقيا قاجى يسمايل تاعايىندالدى. ونىڭ قولىنا باس ءمۇفتي قاسيەتتى قۇران-كارىم كىتابىن تاپسىردى. كەشە جاماعات العاشقى رەت «ىرىسكەلدى قاجى» مەشىتىندە جۇما نامازىن وقىدى.
