ەلباسى جانە مادەنيەت مەرەيى

ۇلتتىق مۋزەيدە ەلباسى كىتاپحاناسىنىڭ جيناعىنان جاساقتالعان «ەلباسى جانە مادەنيەت» كورمەسىنىڭ تۇساۋكەسەرى ءوتتى. اشىلۋ سالتاناتىنا قوعام جانە مەملەكەت قايراتكەرلەرى, شەتەلدىك ەلشىلەر, باق وكىلدەرى جانە جاستار قاتىستى.تۇڭعىش پرەزيدەنت كۇنىنە ورايلاستىرىلعان كورمە كوپۇلتتى قازاقستاندى قالىپتاستىرۋشى رەتىندە, حالقىنىڭ رۋحاني قۇندىلىقتارىن جاھاندىق دەڭگەيدە ىلگەرىلەتۋدە, مادەنيەت­تى قايتا جاڭعىرتۋداعى ەلباسى ن.ءا.نازارباەۆتىڭ تۇلعالىق بەينەسىن باياندايدى. جيناقتا ەلباسىنىڭ سويلەگەن سوزدەرى, مادەنيەت سالاسى جانە مادەني ساياسات تۋرالى ماقالالارى, زاڭ شىعارۋ بازاسى جيناقتالعان. كورمەدە تۇڭعىش پرەزيدەنتتىڭ مۇراجايىنان الىنعان ماتەريالدار, سونىمەن قاتار العاش رەت عىلىمي اينالىمعا ەنگىزىلىپ وتىرعان ەلباسىنىڭ ءوز بەلگىلەرى بار جەكە مۇراعاتىنان الىنعان ماتەريالدار – جالپى سانى 200-دەن استام تۋىندى قويىلدى. كورمەنىڭ جۇمىسى كەلەسى جىلدىڭ 5 قاڭتارىنا دەيىن جالعاسادى.
– كورمەنىڭ باستى ەرەكشەلىگى – ەلباسىنىڭ 1991 جىلدان بەرگى قىزمەتىنە قاتىستى جانە ونىڭ جەكە جيناعىنان ارحيۆتىك ماتەريالدار قويىلعان. ياعني ەلباسىنىڭ مەملەكەتتىك ساياساتتاعى بارلىق كەزەڭىنە تاريحي شولۋ دەپ ايتۋعا بولادى. مۇندا قويىلعان قۇجاتتاردىڭ 90 پايىزى بۇرىن ەش جەردە كورسەتىلمەگەن, – دەدى قر تۇڭعىش پرەزيدەنتى – ەلباسى كىتاپحاناسى ديرەكتورىنىڭ ورىنباسارى كۇلايشا اقتاەۆا.