وتكەن ايدا 400-گە جۋىق جاعداي تىركەلسە, قازىر ونىڭ سانى 550-گە جەتتى, دەپ حابارلايدى astana-akshamy.kz
اۋىرعانداردىڭ باسىم بولىگى – بالالار. دەنساۋلىق ساقتاۋ مينيسترلىگى وكىلدەرىنىڭ ايتۋىنشا, كوبىنە دەرتكە ۆاكتسينا الماعاندار شالدىعادى.
ايدا اكماتوۆا – استانا قالاسىنىڭ تۇرعىنى. قازىر 4 جاسار بالاسىمەن اۋرۋحانادا جاتىر. 1 اي بۇرىن بالاسىنىڭ جوتەلى اسقىنىپ, ونى تۇماۋراتىپ ءجۇر دەپ ويلاعان. ءتىپتى ءوز بەتىنشە ەمدەۋگە تىرىسقان. الايدا دارىگەرگە بارعاندا عانا بالاسىنىڭ كوكجوتەلگە شالدىققانىن ءبىلىپتى.
«جوتەلى مينۋت سايىن بولدى. جەدەل جاردەم شاقىرتتىم, ءسويتىپ, ءبىزدى وسىندا اكەلدى. دارىگەر دياگنوزىمىز كوكجوتەل دەپ بەردى. بالانى بوسانعاننان كەيىن كوشىپ-قونىپ ءجۇردىم. سوندىقتان ۆاكتسينا الۋعا مۇمكىنشىلىگىم بولعان جوق. سولاي ءجۇرىپ, وسى جاسقا جەتىپ قالدى. ۆاكتسينا الماعاننىڭ زاردابىن كورىپ جاتىرمىز. سوندىقتان ۆاكتسينا الامىز, بۇيىرتسا», – دەيدى ول.
بالالاردىڭ العاشقى ۆاكتسيناتسياسى 2 ايىندا باستالادى. كەيىن 3, 4 جانە 18 ايلارىندا الۋى ءتيىس. ال رەۆاكتسيناتسيا بالا 6 جاسقا تولعاندا جۇرگىزىلەدى. ءار ءبۇلدىرشىن تۇرعىلىقتى مەكەنجايى بويىنشا تىركەلگەن ەمحانادا ەكپەنى تەگىن الۋعا مۇمكىندىگى بار.
«اۋىرعانداردىڭ 90%-ءى – ۋاقىتىندا ەكپە الماعاندار. ويتكەنى كوكجوتەل اۋا تامشى جولدارمەن بەرىلەدى. وتە جوعارى جۇقپالى اۋرۋ. بۇل ۆاكتسينامەن باسقارىلاتىن ينفەكتسيالاردىڭ قاتارىنان ورىن الادى. مۇنىڭ بىردەن-ءبىر جولى, تەك ۆاكتسينامەن ەمدەلەدى. كوكجوتەلدى تۇماۋمەن شاتاستىراتىندار جوق ەمەس. ونىمەن اۋىرعانداردىڭ جوتەلى بىرنەشە ايعا سوزىلۋى مۇمكىن. دەرت اسقىنسا, وكپە قابىنىپ, ميدىڭ گيپوكسياسىنا اكەلۋى ىقتيمال», – دەيدى دسم سانيتارلىق-ەپيدەميولوگيالىق باقىلاۋ كوميتەتىنىڭ باسقارما باسشىسى جاسۇلان الپىسباەۆ.
ال مەديتسينا عىلىمدارىنىڭ دوكتورى, پروفەسسور ءلاززات ەراليەۆا كوپتەگەن اتا-انا مۇنداي جۇقپالى اۋرۋلارعا نەمقۇرايلى قارايتىنىن ايتادى. ولاردىڭ كوپشىلىگى بالا اۋىرىپ تۇرىپ, يممۋنيتەتى قالىپساتادى دەپ ويلايدى ەكەن.
«بىراق ولار قاتەلەسەدى. كوكجوتەل تىنىس الۋعا كەدەرگى كەلتىرەدى. ميعا وتتەگى جەتىسپەيدى. سايكەسىنشە ولىمگە اكەلۋى مۇمكىن. سوندىقتان بالانىڭ دەنساۋلىعى ءۇشىن دارىگەرلەر ەكپە الۋعا شاقىرادى. 2022 جىلى ەلىمىزدە كوكجوتەل اۋرۋىنىڭ 3 جاعدايى تىركەلسە, بىلتىر 393 بالا وسى دەرتكە شالدىققان. بيىل ونىڭ سانى 550-گە جەتتى. دەنساۋلىق ساقتاۋ مينيسترلىگى: «سوڭعى ەكى جىلدا كوكجوتەل جۇقتىرعاندار 120 ەسەگە ارتتى», – دەپ وتىر», – دەيدى ول.
