استانادا قوعامدىق ورىننان ۆەلوسيپەدتەردى قولدى قىلعان ازاماتتار ۇستالدى, دەپ حابارلايدى astana-akshamy.kz
بايقوڭىر اۋدانىنىڭ پوليتسيا قىزمەتكەرلەرى جەدەل-ىزدەستىرۋ ءىس-شارالارى بارىسىندا ۆەلوسيپەد ۇرلاۋعا قاتىسى بار 44 جانە 48 جاستاعى ەكى ەر ادامدى ۇستادى. ماسەلەن, وزبەكستان رەسپۋبليكاسىنىڭ ازاماتى كۇندىزگى ۋاقىتتا كەنەسارى كوشەسىندەگى دۇكەننىڭ جانىندا تۇرعان قۇنى 139 مىڭ تەڭگە تۇراتىن Totem ۆەلوسيپەدىن كورگەن. ويلانباستان ونى ايداپ اكەتىپ, بازارعا دەيىن بارىپ ساتۋعا تىرىسقان. جەدەل قىزمەتكەرلەر ەر ادامدى ۇستاپ, قابىلداپ-تاراتۋ ورنىنا قامادى.
كەلەسى كۇنى ەلوردانىڭ 48 جاستاعى تۇرعىنى برۋسيلوۆسكي كوشەسىندەگى ءۇيدىڭ كىرەبەرىسىنىڭ جانىندا قۇنى 130 مىڭ تەڭگە بولاتىن ۆەلوسيپەدتى ۇرلاپ اكەتكەن. قازىرگى ۋاقىتتا كۇدىكتى ۇستالدى, زاتتاي دالەلدەمە تاركىلەندى. پوليتسەيلەر قىلمىس ورىندارىنان بەينەجازبالاردى الىپ, سول بويىنشا كۇدىكتىلەردى انىقتاۋعا مۇمكىندىك العان.
پوليتسەيلەر ازاماتتارعا ۇرلانعان زاتتى ساتىپ العانى ءۇشىن قر قك-ءنىڭ 196-بابى, قىلمىستىق جولمەن كورىنەۋ ءوندىرىپ الىنعان مۇلىكتى ساتىپ الۋ نەمەسە وتكىزۋ بويىنشا قىلمىستىق جاۋاپتىلىق كوزدەلگەنىن ەسكەرتەدى. باپتىڭ سانكتسياسى 160 اەك-كە دەيىنگى مولشەردە ايىپپۇل نەمەسە 5 جىلعا دەيىنگى مەرزىمگە باس بوستاندىعىنان ايىرۋدى كوزدەيدى.
