ۇڭگىردەگى بالالار تۇگەل قۇتقارىلدى
تايلاندتىڭ سولتۇستىگىندەگى سۋ باسىپ قالعان ۇڭگىردە قالعان بالالار تۇگەل قۇتقارىلدى.
«كورولدىك تەڭىز مىسىقتارى» – اسكەري ءسۇڭگۋىرلەر سەيسەنبىدە ءۇشىنشى, سوڭعى مارتە اتالمىش ۇڭگىرگە كىرىپ, وندا قالعان 4 بالا مەن ولاردىڭ جاتتىقتىرۋشىسىن جارىق دۇنيەگە الىپ شىققان. ولار سول بويدا تىكۇشاقپەن اۋرۋحاناعا جەتكىزىلدى. بۇعان دەيىن, جەكسەنبى جانە دۇيسەنبى كۇندەرى 8 بالا قۇتقارىلعان ەكەن.
وقيعا بىلاي بولعان. «جابايى قاباندار» اتتى بالالار فۋتبول كومانداسىنىڭ 11-16 جاس ارالىعىنداعى 12 مۇشەسى باپكەرلەرىمەن بىرگە چيانگراي پروۆينتسياسىنىڭ تاۋداعى پاركىندە ورنالاسقان ۇڭگىرگە ساياحات جاساپ بارادى. بىراق كەنەتتەن قۇيىپ كەتكەن ماۋسىمدىق نوسەر جاۋىننان كەيىنگى توپان سۋ ۇڭگىردىڭ اۋزىن باسىپ قالادى. ولاردىڭ جوعالىپ كەتكەنى تەك 10 كۇننەن كەيىن عانا بەلگىلى بولادى.
ۇڭگىردە قالعان بالالاردى قۇتقارۋعا ۇلىبريتانيا مەن اۆستراليادان كەلگەن ماماندار دا قاتىستى. مۇنىڭ اقىرى ءساتتى اياقتالدى. دەسە دە, وسى ىستە ءبىر قۇتقارۋشى قازا تاپتى.
رەسەي ءوزىنىڭ وففشورىن قۇرماقشى
ۇستىمىزدەگى جىلدىڭ كۇز ايلارىندا-اق رەسەيدىڭ ءوز وففشورلىق ايماعى جۇمىس جاساي باستايدى.
بۇل تۋرالى سەيسەنبى كۇنى ەكونوميكالىق دامۋ ءمينيسترى ماكسيم ورەشكين حابارلادى. مۇنداي ايماقتار كالينينگراد وبلىسىنداعى وكتيابر ارالى مەن پريمور ولكەسىندەگى رۋسسكي ارالىندا قانات جايماقشى.
ورەشكيننىڭ ايتۋىنشا, «ارنايى اكىمشىلىك اۋداندارى» بيىلعى جىلدىڭ قىركۇيەك-قازان ايلارىندا جۇمىس ىستەۋگە كىرىسەدى. بيلىكتىڭ ويىنشا, وففشورلاردىڭ رەسەيلىك نۇسقالارى ەلدىڭ باسقا مەملەكەتتەردە تىركەلگەن كومپانيالارىن ءوزىنىڭ قۇرىلىمدارىنا تارتىپ اكەلۋگە ءتيىس.
مينيستر سەيسەنبى كۇنى تاڭەرتەڭ مەملەكەتتىك دۋمادا «ەدينايا روسسيا» فراكتسياسىنىڭ وكىلدەرىمەن بىرگە رەسەيدىڭ وففشورلار جونىندەگى زاڭ جوباسىن تالقىلادى. ەندى دەپۋتاتتار شىلدەنىڭ اياعىنا دەيىن سول زاڭدى قابىلداعالى وتىر.
دجونسون نەگە وتستاۆكاعا كەتتى؟
ۇلىبريتانيانىڭ پرەمەر-ءمينيسترى تەرەزا مەي شىلدەنىڭ 9-ى كۇنى سىرتقى ىستەر ءمينيسترى
بوريس دجونسوندى قىزمەتىنەن بوساتتى.
ۇكىمەت باسشىسى ىلە-شالا ونىڭ ورنىنا 2012 جىلدان بەرى دەنساۋلىق ساقتاۋ سالاسىن باسقارىپ كەلگەن 51 جاستاعى دجەرەمي حانتتى تاعايىندادى. ونىڭ كانديداتۋراسىن ەليزاۆەتا پاتشايىم قولداعان كورىنەدى.
بۇدان الدىن, سول كۇنى تاڭەرتەڭ دجونسون ءوزىنىڭ وتستاۆكاعا كەتەتىنىن مالىمدەگەن بولاتىن. ول ءوزىنىڭ بۇل شەشىمىن بريتانيانىڭ ەۋرووداقتان شىعۋ جونىندە پرەمەر-ءمينيستردىڭ ۇستانعان باعىتىمەن كەلىسە الماۋىنان دەپ ءتۇسىندىردى. ءسويتىپ, سوڭعى كەزدەرى وزدەرىن جاپ-جاقسى تاندەم رەتىندە كورسەتىپ كەلگەن جۇپتىڭ شىرقى بۇزىلدى.
كەيىنىرەك دجونسون مەيگە ارناپ جازعان حاتىندا كەلىسپەۋشىلىك سەبەپتەرىن تۇگەل اشىپ كورسەتتى.
