پۋتين مەن ترامپ كەزدەستى
كەشە فينليانديا استاناسى – حەلسينكيدە ماسكەۋ ۋاقىتىمەن ساعات 14-تەن وتە اقش جانە رەسەي پرەزيدەنتتەرىنىڭ كەزدەسۋلەرى باستالدى.
جۇزدەسۋ الدىندا دونالد ترامپ پەن ۆلاديمير پۋتين ءبىر-بىرىنە قىسقاشا ءسوز ارنادى. اق ءۇيدىڭ قوجايىنى سول جەردە كرەمل باسشىسىن فۋتبولدان الەم چەمپيوناتىن جاقسى وتكىزۋىمەن جانە رەسەي قۇراماسىنىڭ ونداعى تابىسىمەن قۇتتىقتادى.
بۇدان ءارى ەكى پرەزيدەنت اڭگىمەنى سيريا توڭىرەگىندە قوردالانىپ قالعان ماسەلەلەرگە قاراي بۇرىپ, «سولتۇستىك تاسقىن-2» جوباسىن جۇزەگە اسىرۋ جايىنا, سونداي-اق, اقش پەن رەسەي اراسىنداعى قارىم-قاتىناستىڭ كەلەشەگىنە ارنادى.
ەكى ليدەردىڭ اۋدارماشىلاردىڭ قاتىسۋىمەن وتكەن كوپ قىرلى, كەڭ اۋقىمدى تاقىرىپتى ءبىرىنشى جەكە كەزدەسۋلەرىنەن كەيىن اڭگىمەگە رەسەي سىرتقى ىستەر ءمينيسترى سەرگەي لاۆروۆ پەن اقش مەملەكەتتىك حاتشىسى مايكل پومپەو قوسىلدى.
ءبىز كەزدەسۋدىڭ قورىتىندىسى تۋرالى كەلەسى جولى كەڭىنەن اڭگىمەلەپ بەرەمىز.
كۋبا جەكە مەنشىككە جول اشادى
كۋبانىڭ جاڭا كونستيتۋتسياسى ەلدە جەكە مەنشىكتىك قۇقىقتى مويىندايتىن بولادى.
بيلىكتىڭ رەسمي باسىلىمى – Granma گازەتىنىڭ جازۋىنا قاراعاندا, ەندى كەز كەلگەن مەملەكەت باسشىسىنىڭ قىزمەتى 5 جىلدىق ەكى مەرزىمنەن تۇرىپ, 10 جىلدان اسپايدى. بۇدان بولەك, رەسپۋبليكادا پرەزيدەنت جانە ۆيتسە-پرەزيدەنت لاۋازىمى ەنگىزىلەدى. بۇعان دەيىن مۇندا مەملەكەت باسشىسى قۇزىرەتىن مەملەكەتتىك كەڭەس پەن مينيسترلەر كەڭەسىنىڭ توراعاسى اتقارىپ كەلگەن ەدى. قازىر ول ورىنتاقتا بيىلعى ساۋىردە راۋل كاسترونى الماستىرعان ميگەل دياس-كانەل وتىر.
كونستيتۋتسيا ءماتىنى ءبىرىنشى رەت گەندەرلىك بەلگى بويىنشا قۋعىنعا ۇشىراتۋعا تىيىم سالادى, جەكە مەنشىك قۇقىعىن مويىندايدى. اتالعان قۇجاتقا 21-23 شىلدە كۇندەرى وتەتىن ەل پارلامەنتى – حالىق بيلىگى ۇلتتىق اسسامبلەياسىنىڭ وتىرىسىندا داۋىس بەرىلەدى. سودان كەيىن پارلامەنت وزگەرتكەن نۇسقا حالىقتىق رەفەرەندۋمعا ۇسىنىلادى.
اقش رەزەرۆتەگى مۇنايعا قول سالماقشى
اقش ستراتەگيالىق زاپاستا ساقتالعان مۇنايىن رىنوكقا شۇعىل شىعارۋ جايىن قاراستىرىپ جاتىر.
The Wall Street Journal باسىلىمىنىڭ جازۋىنشا, اقش پرەزيدەنتىنىڭ اكىمشىلىگى مۇنى مۇنايدىڭ باعاسى كۇرت كوتەرىلىپ كەتۋىنە جول بەرمەۋ ءۇشىن جاساپ جاتقانعا ۇقسايدى. ۆاشينگتون, سونىمەن بىرگە, مۇناي رىنوكتارىنداعى جوعارى سۇرانىستى ساقتاپ قالۋ ءۇشىن باسقا ەلدەردى دە كومىرتەگى ونىمدەرىن ءوندىرۋدى ۇلعايتۋعا شاقىرىپ جاتقان كورىنەدى.
ماۋسىم ايىنىڭ باسىندا ساۋد ارابياسى مەن رەسەي وپەك ەلدەرىنە مۇناي ءوندىرۋدى سوتكەسىنە 1,5 ملن باررەل دەڭگەيىنە دەيىن جەتكىزۋدى ۇسىنعان ەدى. تاراپتار ونى ۆەنەسۋەلادا مۇناي ءوندىرۋدىڭ ءتۇسىپ كەتۋىمەن جانە اقش-تىڭ سانكتسياسىنا وراي يران مۇنايى ءبىر بولىگىنىڭ رىنوكتان كەتۋ ىقتيمالدىلىعىمەن ءتۇسىندىردى. بىراق مۇنداي جوسپار يران, ۆەنەسۋەلا جانە يراك ەلدەرىن قاناعاتتاندىرعان جوق. مۇناي ءوندىرۋدى شەكتەۋ جونىندەگى كەلىسىم 2017 جىلدان بەرى جۇمىس ىستەپ كەلەدى. وعان وپەك-ءتىڭ 24 ەلى قوسىلعان بولاتىن.
