كۇتكەن كەزدەسۋگە كەزەك كەلدى
سينگاپۋردە الەم جۇرتى كوپتەن قۇلاق تۇرگەن اقش جانە كحدر ليدەرلەرى اراسىنداعى سامميت باستالدى.
دونالد ترامپ پەن كيم چەن ىننىڭ «ارى تارت تا بەرى تارتپەن» سوزعان كۇپتى كەزدەسۋى بۇگىن تاڭەرتەڭ جەرگىلىكتى ساعات 09:00-دە (استانا ۋاقىتىمەن 06:00) سەنتوس ارالىنداعى Capella مەيمانحاناسىندا سورەدەن شىقتى.
ەكى تاراپ تا قالا-مەملەكەتكە جەكسەنبى, 10 ماۋسىم كۇنى جەتتى. Air China اۋە كومپانياسى ۇشاعىمەن كەلگەن كوممۋنيستىك كورەي ەلىنىڭ كوسەمى چانگي اەروپورتىنا قوندى. سول كۇنى سينگاپۋردىڭ پرەمەر-ءمينيسترى لي سيانلۋنمەن كەزدەستى. كەزدەسۋگە ەكى جاقتىڭ دا دەلەگاتسياسى قاتىستى. ال قۇراما شتاتتار پرەزيدەنتىنىڭ ۇشاعى سينگاپۋردەگى پايا لەبار اسكەري بازاسى اەرودرومىنا تابان تىرەدى.
اقش پەن كحدر قارىم-قاتىناسى تاريحىندا ءبىرىنشى رەت جۇزەگە اسىپ وتىرعان سامميتتە ەشقانداي قۇجاتقا قول قويىلمايدى. اق ءۇي قوجايىنىنىڭ ايتۋىنشا, كەزدەسۋ «ءىستى باستاپ كەتۋ» مەسەلىن عانا شەشىپ بەرەدى. بۇل ءبىر-بىرىمەن ءدۇرداراز ەكى ەلدىڭ كەلىسسوزى ازىرگە اۋىزشا جۇرگىزىلەتىنىن كورسەتەدى.
اتالمىش ءسامميتتى وتكىزۋ بارىسىنداعى قاۋىپسىزدىك شارالارى ءۇشىن سينگاپۋر جاعى 20 ملن دوللارعا جۋىق قارجىنى شىعىنداعالى وتىر.
«ۇلكەن جەتىلىككە» جىك ءتۇستى
كانادادا 8-9 ماۋسىم كۇندەرى وتكەن «ۇلكەن جەتىلىك» جيىنى اقش پەن ونىڭ قالعان مۇشەلەرى اراسىنداعى الاۋىزدىقتى كۇشەيتىپ جىبەردى.
كۆەبەك پروۆينتسياسىندا باس قوسقان دەرجاۆالار باسشىلارى ۆاشينگتون پوزيتسياسىن قولدامايتىندارىن بىردەن بايقاتتى. سوندىقتان دونالد ترامپ ءسامميتتىڭ قورىتىندى كومميۋنيكەسىنە قول قويعان جوق. ول بۇعان جان-جاقتى قارىم-قاتىناس جاساۋ ءتارتىبى بۇزىلعانىن, ەڭ نەگىزگىسى – ءوزى جاقىندا ەنگىزگەن باج سالىعىنىڭ تولەنبەي جاتقانىن نەگىزگە الدى. ساراپشىلار ونىڭ جيىندا وسى سەبەپتەن رەسەيدى G7 توبىنا قايتادان شاقىرىپ الۋدى ۇسىنعانىن ايتىپ وتىر.
بىراق بۇل مالىمدەمەنى امەريكا سەناتورلارىنىڭ ءبىر توبى اشۋ-ىزامەن قارسى الدى.
يزرايل يرانعا «كومەك» ۇسىندى
يزرايل پرەمەر-ءمينيسترى بينيامين نەتانياحۋ يراندى قۇرعاقشىلىقتان قۇتقارۋعا ۋادە بەردى. بىراق ونىڭ ارتىندا قيتۇرقىسى دا بار ەكەن.
ەۆرەي ەلىنىڭ باسشىسى وسىعان وراي سۋدى پايدالانۋ جونىندەگى وزىق تەحنولوگيانى پارسى تىلىنە اۋدارىپ, ينتەرنەتكە سالدىرىپ قوياتىنىن جەتكىزدى. بۇل ميلليونداعان يراندىقتىڭ سۋ تاپشىلىعىن جەڭىپ شىعىپ, اشىعۋدان امان قالۋلارىنا ىقپال ەتەدى. ول يران بيلىگى ايتىپ وتىرعان ەلدىڭ 96 پايىز كولەمىن قامتيتىن قۇرعاقشىلىق 50 ملن ادامعا اۋىر اپات اكەلەتىنىن ءبىلدىردى.
«يزرايل يراندى ەكولوگيالىق اپاتتان ساقتاپ قالۋدىڭ جولىن بىلەدى. مەن بىلگەنىمدى وسى ەلدىڭ حالقىمەن بولىسكىم كەلەدى… ءبىز ولارعا اعىن سۋدى قالاي جاساپ, استىقتى قالاي امان ساقتاۋعا, ءسويتىپ وتباسىلارىن اشىقتىرىپ الماۋعا بولاتىنىن ۇيرەتەمىز» دەدى نەتانياحۋ.
«يراننىڭ بيلىگى «يزرايلگە ءولىم كەلسىن» دەپ ۇرانداتىپ جاتىر, – دەدى ول بۇدان ءارى. – بۇعان يزرايل: «يران حالقىنىڭ ءومىرىن ساقتاپ قالايىق» دەپ جاۋاپ بەرەدى. يراننىڭ حالقى جاقسى دا ءمارت. حالىق رەجيمگە بىرەۋلەپ قارسى شىقپاۋى كەرەك. ءبىز سىزدەرمەن بىرگەمىز».
وسىلايشا يزرايل يراننىڭ حالقىن بيلىككە قارسى كوتەرىلۋگە اشىق شاقىرىپ وتىر. بۇدان كەيىن پارسى ەلىنىڭ باسشىلارى ءيزرايلدى قالاي جاقسى كورە قويسىن؟!
