ۆەنەسۋەلا پرەزيدەنتىنە قاستاندىق جاسالدى
كاراكاس قالاسىندا 4 تامىز كۇنى ۆەنەسۋەلا پرەزيدەنتى نيكولاس مادۋروعا قاستاندىق جاسالدى.
وقيعا بوليۆار ۇلتتىق گۆاردياسىنىڭ قۇرىلعان كۇنىنە ارنالعان شەرۋ كەزىندە ورىن الدى. مادۋرو مىنبەردە تۇرعاندا جارىلعىشى بار ءۇش درون شابۋىل جاساعان. بىراق پيلوتسىز ۇشۋ اپپاراتتارىن دەر كەزىندە اتىپ ءتۇسىرىپ, قاۋىپتىڭ بەتىن قايتارعان. كەيىن ۆەنەسۋەلانىڭ بايلانىس جانە اقپارات ءمينيسترى حورحە رودريگەس مالىمدەمە جاساپ, پرەزيدەنتتىڭ ءدىن امان ەكەنىن جانە جەتى اسكەريدىڭ جاراقات العانىن مالىمدەدى.
مادۋرونىڭ ءوزى بۇعان وپپوزيتسيا مەن كولۋمبيا بيلىگىن كىنالادى. ال كولۋمبيانىڭ سىرتقى ىستەر مينيسترلىگى وقيعاعا قاتىسى بارىن جوققا شىعاردى. مادۋروعا جاسالعان قاستاندىق ارەكەتىن «فلانەلدى ساربازدار» اتتى استىرتىن توپ موينىنا الدى.
يندونەزيادا جويقىن جەر سىلكىنىسى بولدى
جەكسەنبى كۇنى يندونەزيانىڭ لومبوك ارالىندا قاتتى جەر سىلكىنىسى تىركەلدى.
اپات سالدارىنان قازا تاپقان جەرگىلىكتى ادامدار سانى 91-گە جەتتى. جالپى, 200-دەن اسا ادام اۋىر جاراقات العان. قر سىرتقى ىستەر مينيسترلىگى بۇل جەردە زارداپ شەككەندەردىڭ اراسىندا قازاقستان ازاماتتارى جوق ەكەنىن مالىمدەدى.
ەۋروپالىق جەرورتا تەڭىزى سەيسمولوگيالىق ورتالىعىنىڭ ءمالىمەتىنشە, جەر سىلكىنىسى 6,6 بالعا جەتكەن. جەراستى ءدۇمپۋىنىڭ كىندىگى ماتارام قالاسىنىڭ سولتۇستىك-شىعىس جاعىنان 49 كيلومەترلىك جەردە ورنالاسقان.
قىتاي جاڭا ۇشۋ اپپاراتىن سىناپ كوردى
قىتاي «سينكۋن-2» («جۇلدىزدى اسپان») اتتى گيپەر دىبىستى ۇشۋ اپپاراتىن سىناقتان ءساتتى وتكىزدى.
سىناق جۇما كۇنى قىتايدىڭ سولتۇستىك-باتىسىنداعى پوليگونداردىڭ بىرىندە ءوتتى. اپپارات اۋەدە 10 مينۋت قالقىپ, 30 كيلومەتر بيىكتىكتە بىرنەشە مانەۆر جاسادى جانە بەلگىلەنگەن ايماققا ءساتتى قوندى.
بۇل جوباعا ءۇش جىل ۋاقىت كەتىپتى. ساراپشىلاردىڭ ايتۋىنشا, اپپارات يادرولىق قارۋلاردى تاسىمالداۋعا جانە ءوزىنىڭ جوعارى جىلدامدىعىنىڭ جانە كۇتپەگەن تراەكتورياسىنىڭ ارقاسىندا زىمىرانعا قارسى قورعانىس جۇيەسىندە كەز كەلگەن جاعدايعا توتەپ بەرۋگە قاۋقارلى.
دەرەككوزى: ria.r
