ۆاشينگتون پحەنيانعا تالاپ قويدى
مۇنى كوپ كۇتۋدىڭ ورايى كەلگەن جوق. ۆاشينگتون ءوزىنىڭ پحەنياننان تالاپ ەتەتىن نارسەلەرىنىڭ ءتىزىمىن جاريالادى.
سينگاپۋردە 12 ماۋسىم كۇنى وتكەن اقش پرەزيدەنتى دونالد ترامپ پەن كحدر مەملەكەتتىك كەڭەسىنىڭ توراعاسى كيم چەن ىننىڭ تاريحي كەزدەسۋىنەن كەيىن ەكى جاق از دا بولسا ءبىر مامىلەگە كەلگەندەي كورىنگەن. ارادا 5 كۇن وتكەننەن كەيىن اقش كحدر-عا 47 پوزيتسيادان تۇراتىن تالاپتارىن ۇسىندى. ولاردىڭ اراسىندا ۇساق-تۇيەك نارسەلەردەن باستاپ, يادرولىق قارۋدان ءبىرجولا باس تارتۋعا دەيىنگى ماسەلەلەردىڭ ءبارى بار. جاپونيانىڭ سىرتقى ىستەر ءمينيسترى تارو كونونىڭ ايتۋىنشا, كحدر ليدەرى كورەي تۇبەگىن زالالدى قارۋدان تولىق ازات ەتۋگە كەلىسىم بەرگەن. الايدا اقش اكىمشىلىگى بۇل ۇدەرىستىڭ شەڭبەرىندە تەك يادرولىق قانا ەمەس, سونىمەن بىرگە جاپپاي قىرىپ-جوياتىن قارۋدىڭ بارلىق ءتۇرى, بالليستيكالىق راكەتالار مەن ءتيىستى نىساندار جويىلۋى كەرەك دەپ ەسەپتەيدى. «ەگەر تالاپ ورىندالماسا, سولتۇستىك كورەيادان سانكتسيالار الىنبايدى» دەدى جاپون ءمينيسترى. تاعى ءبىر ساراپشىلار مۇندا «ءىس جۇزىندە يرانعا جاسالعان ستسەناري قايتالانىپ» جاتقانىن العا تارتتى. «شىن مانىندە بۇل – ءدال سونداعىداي سولتۇستىك كورەياعا جاسالعان ۋلتيماتۋم» دەدى ساراپشى فرانتس كلينتسەۆيچ.
پوليتسەيلەردى قاققانى ءۇشىن – ءولىم جازاسى
يراندا ءۇش پوليتسەيدى باسىپ ولتىرگەن اۆتوبۋس جۇرگىزۋشىسى كەشە جۇرت الدىندا دارعا اسىلدى.
وقيعا تەگەراندا سوپىلار باس كوتەرىپ, تارتىپسىزدىك ورىن العان كەزدە بولعان. پروكۋراتۋرانىڭ دەرەگىنە سايكەس, موحامماد سالاس ەسىمدى اۆتوبۋس ايداۋشى اقپان ايىندا قاتتى اشۋ ۇستىندە كەلە جاتىپ, پاسداران كوشەسىنىڭ بويىندا قۇقىق قورعاۋ ورگاندارىنىڭ قىزمەتكەرلەرىنە قاساقانا تاپ بەرگەن. بۇدان بۇرىن حابارلانعانداي, سوپىلىق «دەرۆيشي گونابادي» ورگانى مۇشەلەرىنىڭ قاتىسۋلارىمەن ورىن العان تارتىپسىزدىك بارىسىندا بەس قۇقىق قورعاۋشى قازا تاپسا, ۇشەۋىنىڭ اجالى ايتىلعان جۇرگىزۋشىدەن كەلگەن. بۇدان باسقا, تاعى 30 پوليتسەي دەنە جاراقاتىن العان. قارسىلىق قوزعالىسى ءدىني وردەننىڭ ليدەرى نۋرالي تاباندە قاماۋعا الىنعاننان كەيىن باستالىپ كەتكەن.
ميگرانت ماسەلەسى ءمينيستردى اشىندىردى
گەرمانيا سىرتقى ىستەر ءمينيسترى حورست زەەحوفەر دۇيسەنبى كۇنى كانتسلەر انگەلا مەركەلگە ۋلتيماتۋم قويدى.
اتالمىش تۇلعا سونىمەن بىرگە مەركەل ەسەپتە تۇراتىن جانە ونى كانتسلەر ەتىپ سايلاعان حريستيان-سوتسيالدى وداعىن (حسس) باسقارادى. سوندىقتان ۇكىمەت باسشىسىنا قاندايدا ءبىر ماسەلە جونىنەن دە تالاپ قويا الادى. بۇل جولى ونىڭ اڭگىمەسى جاسىرىن ميگراتسياعا قارسى ارەكەت تۋراسىنان قوزعالىپتى. Bild باسىلىمىنىڭ جازۋىنشا, زەەحوفەر جالپى ەۋروپالىق بوسقىندار پروبلەماسىن شەشۋ ءۇشىن مەركەلگە ەكى اپتا مەرزىم بەرىپتى. حسس-تەگىلەر ەۋرووداقتىڭ جاقىن اراداعى سامميتىندە كانتسلەر شەتەلدىك ارىپتەستەرىمەن ميگرانتتاردىڭ تەڭىزدەن رۇقساتسىز ءجۇزىپ ءوتىپ, كەلە بەرۋلەرىنە توسقاۋىل قويۋدا ىمىراعا كەلە الادى دەپ ەسەپتەپ وتىر. بۇلاي بولماعان جاعدايدا ەونىڭ باسقا ەلدەرىندە تىركەلگەن ميگرانتتاردىڭ گەرمانيا جەرىنەن كۇشتەپ شىعارىلا باستايتىنى, ال جاڭا تولقىن كەلۋىنە جول بەرىلمەيتىنى ايتىلعان. زەەحوفەر بۇل ءۇشىن فەدەرالدى پوليتسياعا شەكارانى باقىلاۋعا الۋدى كۇشەيتىپ, گەرمانيا اۋماعىنان باسپانا بەرۋگە جاتپايتىن بوسقىنداردى شىعارا باستاۋدى مىندەتتەۋ كەرەك دەپ ەسەپتەيدى.
سەرىك ءپىرنازار
