توكيو وليمپياداسىندا جاڭا جۇيە ەنگىزىلەدى
توكيو-2020 ۇيىمداستىرۋ كوميتەتى وليمپيادا جانە پاراليمپيادا ويىندارىندا سپورتشىلار مەن لاۋازىمدى تۇلعالاردىڭ, باق وكىلدەرى مەن وزگە دە قىزمەتكەرلەردىڭ بەت-ءجۇزىن تانۋ جۇيەسىن قولدانادى.
مۇنداي تەحنولوگيالاردى ەنگىزگەلى وتىرعان توكيونىڭ تاريحتا يننوۆاتسيالىق ويىنداردى وتكىزگەن العاشقى ەل بولۋعا تىرىسقانىن بايقاتادى. توكيو-2020 باستى سەرىكتەسى سانالاتىن NEC كورپوراتسياسى بەت-الپەتتى تانۋ جۇيەسىن ۇسىنادى. اككرەديتاتسيادان وتكەن ءاربىر ادامنىڭ فوتولارى الدىن الا جينالىپ, بازادا ساقتالادى. ولار اككرەديتاتسيا نۇكتەلەرىندە جەكە تۇلعانى تانۋ ءۇشىن قاجەت بولماق. بۇل جۇيە ويىنداردىڭ قاۋىپسىزدىگىن ودان ءارى ارتتىرا تۇسەدى. وزگەنىڭ اككرەديتاتسياسىن قولدانىپ, سپورت نىساندارىنا كىرۋگە مۇلدە بولمايدى. تەكسەرۋ اۆتوماتتى تۇردە جۇرگىزىلەدى.
اپتاپ ىستىقتان پويىزدار توقتاتىلدى
شۆەتسيانىڭ وڭتۇستىگىندە كۇننىڭ قاتتى ىسىپ كەتۋ سالدارىنان 12 پويىزدىڭ قوزعالىسى شەكتەلدى.
تەمىرجولشىلار پويىز جولدارى اپتاپ ىستىققا شىداماي, زاقىمدانۋى مۇمكىن دەپ قاۋىپتەنەدى. بۇل جاز ماۋسىمىندا مۇنداي شەشىم ەكىنشى ءمارتە قابىلدانىپ تۇر. ءشىلدەنىڭ سوڭىندا ءبىرنەشە باعىت بويىنشا قوزعالىس توقتاعان ەدى. وسى كۇندەرى ەلدىڭ وڭتۇستىگىندە اۋا تەمپەراتۋراسى 30-34 گرادۋسقا جەتەدى دەپ بولجانۋدا. وڭىردە ىستىق ءارى قۇرعاق اۋا رايى مامىر ايىنان بەرى ساقتالىپ تۇر. سينوپتيكتەر شىلدەنى شۆەتسياداعى سوڭعى بىرنەشە ونجىلدىقتاردىڭ ىشىندەگى ەڭ ىستىق اي دەپ اتاسا, ستوكگولمدە مۇنداي اۋا رايى 262 جىلدان بەرى بولماعان.
فرانتسيانىڭ وڭتۇستىگى نوسەردىڭ استىندا قالدى
فرانتسيا وڭتۇستىگىنىڭ ءۇش دەپارتامەنتىنەن قاتتى جاۋىن-شاشىننىڭ سالدارىنان 1600-گە جۋىق ادام قاۋىپسىز جەرگە كوشىرىلدى.
قۇتقارۋ جۇمىستارى دروم, اردەش جانە گار دەپارتامەنتتەرىندە ءجۇردى. بۇعان 400-دەن اسا ءورت ءسوندىرۋشى مەن جاندارم جۇمىلدىرىلدى. سونداي-اق 4 تىكۇشاق ايماقتى اۋەدەن باقىلاۋعا الدى.
قاۋىپسىز ايماققا كوشىرىلگەندەردىڭ ىشىندە سەن-جيۋلەن-دە-پەيرولانىڭ جازعى لاگەرىنەن 119 بالا بار. بۇلار گەرمانيادان كەلگەن بالالار ەكەن. ال ولاردىڭ جەتەكشىسى 70 جاستاعى گەرمانيا ازاماتى ءىز-ءتۇسسىز جوعالىپ كەتكەن. بەيسەنبى كۇنى فرانتسيانىڭ شىعىسىنداعى جانە وڭتۇستىك-شىعىسىنداعى 26 دەپارتامەنتتە تونگەن قاۋىپتىڭ سارى دەڭگەيى جاريالاندى.
دەرەككوزى: kazinform, ria.ru
