كورەيلەردىڭ باسى قوسىلدى
وڭتۇستىك كورەيا پرەزيدەنتى مۋن چجە ين سولتۇستىك كورەيا باسشىسى كيم چەن ىنمەن كەزدەسۋ ءۇشىن پحەنيان قالاسىنا باردى.
قوس ەل اراسىندا وتكەن سامميتتە كورەي تۇبەگىن يادرولىق قارۋدان ارىلتۋ ماسەلەسى قارالدى. كيم چەن ىن سامميت بارىسىندا تونچحانداعى يادرولىق پوليگوندى جابۋعا, ال يونبەندەگى نىساندى تولىقتاي دەمونتاج جاساۋعا ۋادە بەردى. بۇل جۇمىس شەتەلدىك مامانداردىڭ قاتىسۋىمەن جۇزەگە اسىرىلماق. بۇعان قوسا شيەلەنىستى ازايتۋ ءۇشىن بىرلەسكەن اسكەري كوميتەت قۇرىلاتىنى بەلگىلى بولدى. ونىڭ قۇرامىنا ەكى ەلدىڭ اسكەري قولباسشىلىعىنىڭ وكىلدەرى ەنەدى.
سونىمەن قاتار, بيىلدان باستاپ قوس كورەيا اراسىندا كولىك جانە پويىز جولى سالىناتىنى بەلگىلى بولدى.
سوڭعى ون جىلدا مۋن چجە ين سولتۇستىك كورەياعا العاش رەت رەسمي ساپارمەن بارىپ وتىر. ال جىل باسىنان بەرى ەكى ەل باسشىسى ءۇشىنشى مارتە كەزدەسىپ تۇر.
كونە قالانىڭ قۇنى – ءبىر پاتەر
اقش-تىڭ دجوردجيا شتاتىندا ورنالاسقان تۋمسبورو قالاسى تولىعىمەن ساتىلىمعا قويىلدى.
ساتىپ الۋشى تۇرعىن ۇيلەردەن بولەك مەيرامحانا, قوناق ءۇي, ديىرمەن, ءتىپتى جەكە وپەرا تەاترى سەكىلدى عيماراتتارعا يە بولدى. مۇنىڭ سىرتىندا بىرنەشە قۇرىلىس ورىندارى, بانكەت زالى, شاشتاراز, 1869 جىلى سالىنعان تەمىرجول دەپوسى, ەسكى بانك عيماراتى, جاساندى توعان بار.
Craigslist سايتىنىڭ حابارلاۋىنشا, تۋمسبورو قالاسىنىڭ قۇنى 1,7 ملن دوللاردى قۇرايدى. بۇل اقش-تىڭ نيۋ-يورك سەكىلدى ءىرى قالالارىنداعى ەليتالى اۋداندارىندا ورنالاسقان ءبىر پاتەردىڭ قۇنىنا تەڭ. ساتۋشىلاردىڭ ايتۋىنشا تۋمسبورونى مۋزىكالىق فەستيۆالدار وتەتىن نەمەسە فيلمدەر ءتۇسىرۋ ورنى رەتىندە پايدالانۋعا قولايلى.
ءبىر ايتا كەتەرلىگى, تۋمسبورو XIX عاسىردىڭ ەكىنشى جارتىسىندا تەمىرجول دەپوسى ماڭايىندا سالىنعان. ونىڭ جالپى اۋماعى 4,9 مىڭ شارشى شاقىرىمدى قۇرايدى.
تانزانياداعى اپات: 80 ادام وپات
بۇرناعى كۇنى افريكانىڭ تانزانيا مەملەكەتىندە پاروم اۋدارىلىپ, كوپ ادام وپات بولدى.
جەرگىلىكتى بۇقارالىق اقپارات قۇرالدارىنىڭ مالىمەتىنشە, جولاۋشىلار تاسىمالدايتىن پارومى تانزانيا, كەنيا جانە ۋگاندا ەلدەرى اۋماعىن الىپ جاتقان ۆيكتوريا كولىندە كەنەت اپاتقا ۇشىراعان.
ءسويتىپ, وسى وڭىردەگى ەڭ ءىرى تۇششى سۋ قويماسى تالاي جاندى تۇبىنە قاراي تارتىپ اكەتتى. تانزانيانىڭ مۆانزا ايماعىنىڭ گۋبەرناتورى دجون مونگەللا اپاتتان 79 ادامنىڭ قازا تاۋىپ, 37 ادام قۇتقارىلعانىن حابارلادى. سوڭعى مالىمەت بويىنشا, ونداعان ادام ءىز-ءتۇزسىز جوعالعاندار قاتارىندا.
وقيعا كەزىندە پارومدا ناقتى قانشا ادام بولعانى ازىرگە بەلگىسىز. مۇنداي پارومداردا كوپ جاعدايدا ادام لىق تولى بولادى جانە ول جۇزدەگەن جولاۋشى تاسيدى. بولجام بويىنشا, پاروم اپاتقا ۇشىراردا 300-دەن استام ادامدى تاسىمالداپ بارا جاتقان.
ايان ءابۋالي
