تۇركيا اقش ارەكەتىن ايىپتادى
انكارا ۆاشينگتوننىڭ ءاردايىم ادىلدىك جاعىندا ەمەس, ءالدىنىڭ جاعىندا جۇرەتىنىن سىنعا الدى.
تۇركيا پرەزيدەنتىنىڭ كومەكشىسى يبراگيم كالىن مۇنى اقش بۇۇ قاۋىپسىزدىك كەڭەسىنىڭ يزرايل مەن گازا سەكتورى جونىندەگى قارارىنا ۆەتو قويعاننان كەيىن مالىمدەدى.
«قۇراما شتاتتار باسشىلىعىنىڭ بۇل قادامى كۇتپەگەن نارسە بولعان جوق. بۇل اقش-تىڭ ادىلدىك جاعىندا ەمەس, ءالدىنىڭ جاعىندا ەكەنىن تاعى دا تانىتىپ بەرىپ وتىر. بىراق پالەستينا حالقى جالعىز ەمەس. ءبىزدىڭ ولاردىڭ ءادىلدىك جولىنداعى كۇرەسىنە قولداۋ كورسەتۋىمىز جالعاسا بەرەدى» دەدى كالىن.
ايتا كەتەيىك, اقش مۇنىڭ الدىندا بۇۇ قاۋىپسىزدىك كەڭەسىنىڭ گازا سەكتورى مەن يزرايل باسىپ العان تەرريتورياداعى پالەستينالىقتاردىڭ حالىقارالىق قورعاۋعا ەنگىزۋ جونىندەگى قارارىن دا وتكىزبەي تاستاعان ەدى.
مەيدىڭ كوڭىلى قالا باستاپتى
ۇلىبريتانيانىڭ پرەمەر-ءمينيسترى تەرەزا مەي اقش-تىڭ ەۋرووداق ەلدەرىنە باج سالىعىن سالىپ جاتقانىنا رەنجىپ قالدى.
ماۋسىمنىڭ 1-ءى كۇنى البيون جەرىنىڭ باسشىسى لوندون مەن بريۋسسەلدىڭ سوققى استىندا قالعان ونەركاسىپ سەكتورىن قورعاۋ جولىندا بىرلەسە كۇرەس جۇرگىزەتىنىن مالىمدەدى.
«اقش, ەۋرووداق جانە ۇلىبريتانيا جاقىن وداقتاستار بولىپ تابىلادى, ولار بۇكىل الەمدە ساۋدانىڭ اشىقتىعى مەن تازالىعى جولىنداعى قۇندىلىقتار ءۇشىن كۇرەسىپ كەلدى, – دەپ سايرادى ول. – ۇلىبريتانيا ءۇشىن قورعانىس قۇيماسى مەن قالايى ونەركاسىبى قاشاننان اسا ماڭىزدى سالا, بۇل مەتالدار امەريكا ونەركاسىبى, سونىڭ ىشىندە ونىڭ قورعانىس نىساندارى ءۇشىن دە اسا قاجەت».
مۇنىڭ الدىندا ەۋرووداق امەريكا تاۋارلارىنا قاتىستى شەكتەۋلەر ەنگىزەتىنىن جاريالاعان بولاتىن. ول بۇعان قۇراما شتاتتار 1 ماۋسىمنان باستاپ ەو ەلدەرىنەن كەلەتىن بولات پەن قالايىعا ءوزىنىڭ باج سالىعىن سالاتىنىن مالىمدەگەننەن كەيىن ءوز كاسىپكەرلەرىن قورعاۋ ءۇشىن بارۋعا ءماجبۇر بولدى.
دۋتەرتە «شايتانعا» جۇمسادى
فيليپپين پرەزيدەنتى رودريگو دۋتەرتە بۇۇ-نىڭ ارنايى بايانداماشىسى ديەگو گارسيا-سايانۋعا «شايتانعا» بارۋعا كەڭەس بەردى.
دۋتەرتە مۇنى ساراپشىنىڭ فيليپپيندەگى سوت جۇيەسىنە قاتىستى بىلدىرگەن پىكىرىنە اشۋلانۋ ۇستىندە ايتىپ سالدى.
بۇدان بۇرىن مەملەكەت باسشىسى ەلدىڭ باس سۋدياسى ماريا لۋردەستى ءوزىنىڭ بىرقاتار ۇسىنىستارىن جۇزەگە اسىرۋدان باس تارتقانى ءۇشىن «جاۋ» دەپ جاريالاپ, وتستاۆكاعا جىبەرگەن بولاتىن. ارنايى بايانداماشى بولسا, سوتتار مەن ادۆوكاتتاردىڭ ءتاۋەلسىزدىگى تۋرالى ايتا كەلىپ, مۇنى سوتتىڭ تاۋەلسىزدىگىنە تونگەن قاۋىپ دەپ باعالاعان.
«ايتىڭدارشى اناعان, مەنىڭ ەلىمنىڭ ىشكى ىسىنە ارالاسپاسىن. كەتسىن ءارى شايتانعا» دەدى دۋتەرتە ونىڭ سوزىنە قاراي. پرەزيدەنت بۇعان ءوزىنىڭ بۇۇ بايانداماشىسى مارتەبەسىن مويىندامايتىنىن قوستى.
جالپى, فيليپپين باسشىسى بۇعان دەيىن دە ءوزىنىڭ ءارتۇرلى ورەسكەل ارەكەتتەرىمەن كوزگە ءتۇسىپ جۇرگەن بولاتىن. ايتالىق, ول بۇدان بىرنەشە جىل بۇرىن اقش-تىڭ پرەزيدەنتى باراك وبامانى «قانشىقتىڭ بالاسى», بۇۇ-نىڭ باس حاتشىسى پان گي مۋندى «اقىماق» دەپ تىلدەگەن ەدى. قۇراما شتاتتاردىڭ قازىرگى پرەزيدەنتى دونالد ترامپ تا ودان «اقىماق» دەگەن سوگىس ەستىپ قالدى.
