ترامپ ازاماتتىق بەرۋگە قارسى
اقش پرەزيدەنتى دونالد ترامپ زاڭسىز كەلگەن بوسقىنداردىڭ قۇراما شتاتتاردا تۋعان بالالارىنا ازاماتتىق بەرۋ ىسىنە قارسىلىق ءبىلدىردى.
Axios باسىلىمى پرەزيدەنتتىڭ ويىنشا بۇل شەتەل ازاماتتارى مەن بوسقىنداردىڭ مۇنداي ارەكەتى مەملەكەتكە كەرى اسەرىن تيگىزەدى دەپ سانايتىنىن حابارلادى. ترامپ ءوز سوزىندە جىل سايىن ومىرگە كەلەتىن
سابيلەردىڭ 7,5 پايىزى (300 مىڭ) وسىنداي جولمەن تۋىلاتىنىن جەتكىزدى.
وسى جىلدىڭ تامىز ايىندا اقش پرەزيدەنتى ازاماتتىق الۋ مەن زاڭدى ميگرانتتارعا ارنالعان گرين-كارت جۇيەسىن كۇشەيتەتىنى حابارلانعان.
الەمدەگى ەڭ ۇلكەن ەسكەرتكىش
ءۇندىستاننىڭ گۋدجارات شتاتىندا الەمدەگى ەڭ بيىك ەسكەرتكىش اشىلدى. BBC مالىمەتى بويىنشا, ول بىرلىك ءمۇسىنى دەپ اتالادى.
ونى قوعام قايراتكەرى, ءۇندىستان شتاتتارىنىڭ باسىن ءبىر ارناعا قوسقان ۆاللابحاي پاتەليانىڭ قۇرمەتىنە تۇرعىزدى.
بىرلىك ەسكەرتكىشىنىڭ قۇرىلىسىنا 5 جىل ۋاقىت كەتىپ, 430 ملن دوللار قارجى جۇمسالدى. بيىكتىگى 182 مەتردى, ال استىنداعى تۇعىرىمەن قوسا ەسەپتەگەندە 240 مەتردى قۇرايدى. سالىستىرمالى تۇردە الار بولساق, ءۇندىستانداعى جاڭا نىسان نيۋ-يوركتەگى «ازاتتىق» ەسكەرتكىشىنەن ەكى ەسە, ال بۇگىنگە دەيىن ەڭ بيىك سانالىپ كەلگەن قىتايدىڭ حەنان پروۆينتسياسىندا تۇرعىزىلعان «بۋددادان» 54 مەترگە بيىك.
ارمەنيا پارلامەنتى تاراتىلدى
ارمەنيا پرەزيدەنتى ارمەن ساركيسيان ەل پارلامەنتىن تاراتۋ تۋرالى قاۋلىعا قول قويدى.
«2018 جىلدىڭ 9 جەلتوقسانىندا كەزەكتەن تىس سايلاۋ وتكىزىلسىن. قاۋلى جاريالانعان كۇننەن باستاپ كۇشىنە ەنگىزىلەدى» دەپ جازدى ارمەنيا پرەزيدەنتىنىڭ ءباسپاسوز قىزمەتى.
ايتا كەتەيىك, دەپۋتاتتار ەكىنشى مارتە نيكول پاشينياننىڭ كانديداتۋراسىنا داۋىس بەرمەدى. ونى قولداپ نەمەسە قارسى شىققان ەشكىم بولمادى. 13 ادام داۋىس بەرۋدەن باس تارتتى. ەندى كونستيتۋتسياعا بايلانىستى ارمەنيانىڭ پارلامەنتى تاراتىلدى.
ارمەنيانىڭ بۇرىنعى پرەمەر-ءمينيسترى نيكول پاشينيان 16 قازان كۇنى پارلامەنتتى
تاراتۋ ءۇشىن ءوزىنىڭ وتستاۆكاعا كەتەتىنىن مالىمدەگەن.
