اقش-كحدر سامميتىنە قاۋىپ ءتوندى
الداعى 12 ماۋسىم كۇنى سينگاپۋردە اقش پەن كحدر ليدەرلەرى اراسىندا بولۋعا ءتيىستى كەزدەسۋدىڭ وتپەي قالۋ قاۋپى ءتونىپ تۇر.
بۇعان اقش پرەزيدەنتىنىڭ كيبەرقاۋىپسىزدىك جونىندەگى كەڭەسشىسى رۋدي ءدجۋليانيدىڭ يزرايلدە وتكەن ينۆەستيتسيالىق كونفەرەنتسيادا كحدر باسشىسى كيم چەن ىن تىزەرلەپ تۇرىپ, اقش پرەزيدەنتىنەن سامميت وتكىزۋىن سۇرادى, دەپ مالىمدەۋى سەبەپ بولدى.
كەيىن Bloomberg اگەنتتىگىنە بەرگەن سۇحباتىندا دجۋلياني تاعى «بۇعان اقش پرەزيدەنتىنىڭ ەش قاتىسى جوق, بۇل ونىڭ ءوز جەكە پىكىرى» ەكەنىن ايتىپ اقتالدى. الايدا بۇل جونىندە ترامپتىڭ ءلام-ليم دەپ اۋىز اشپاۋى جۇرتتى تاڭعالدىرىپ وتىر.
ال كيم چەن ىن سينگاپۋرگە بارۋ باعىتىنان تايماسا, قىتايدىڭ ەكى يسترەبيتەلى ونىڭ ۇشۋ كەزىندەگى قاۋىپسىزدىگىن ساقتاۋ ءۇشىن قورشاپ اپاراتىن بولدى. سونىمەن بىرگە, مەملەكەت-قالادا ونىڭ قاۋىپسىزدىگى ءۇشىن شامامەن 34 وققاعار جاۋاپ بەرەدى.
گرەكتەر ماكەدونيانى وزگەگە قيمايدى
ماۋسىمنىڭ 6-سى كۇنى كەشكە گرەكيانىڭ 23 قالاسىندا «ماكەدونيا دەگەنىمىز – گرەكيا» دەگەن ۇرانمەن شەرۋ ءوتتى.
نارازىلىق شاراسىن ۇيىمداستىرۋشىلار اۋەلگىدە ونى, افينا مەن سالونيكيدى قوسپاعاندا, 13 قالادا وتكىزۋدى جوسپارلاعان. كەيىن ولاردىڭ قاتارى تاعى 10 قالاعا ۇلعايادى. سونىڭ ىشىندە 3-5 مىڭ ادامدى قۇراعان ەڭ ءىرى شەرۋلەر پەللا مەن ۆەريا ەلدى مەكەندەرىندە ورىن الدى.
كورشى مەملەكەتتىڭ «ماكەدونيا» دەپ اتالۋىنا قارسىلىق ءبىلدىرگەن شەرۋشىلەر بيلىكتەن بۇل تۋرالى سكوپەمەن جاسالعالى تۇرعان كەلىسىمشارتقا قول قويماۋدى تالاپ ەتتى. شەرۋ كەزىندە پوليتسيا قىزمەتكەرلەرىمەن ارادا بولعان قاقتىعىس سالدارىنان بىرنەشە ادام كىشىگىرىم جاراقات الدى. بىرنەشە ءجاسوسپىرىم ۇستالىپ, پوليتسيا بولىمشەسىنە جەتكىزىلدى.
شەرۋ كەشكى ساعات 10-دا اياقتالدى. كەلەسى ءىرى نارازىلىق شاراسى 8 شىلدەدە افيناداعى «سينتاگما» ورتالىق الاڭىندا وتەتىن بولدى. ونى سكوپە قالاسىنداعى گرەكتەر قۇقىقتارىن قورعاۋ كوميتەتى ۇيىمداستىرماق.
قىرعىزستاندا قاماۋعا الۋ باستالدى
قىرعىزستاندا بۇرىنعى پرەزيدەنتكە ەڭ جاقىن لاۋازىمدى تۇلعالاردى تۇتقىنداۋ باستالدى.
وسىعان بايلانىستى بۇرىنعى پرەمەر-مينيستر ساپار يساقوۆتىڭ, بىشكەكتىڭ ەكس-مەرى جانە مەملەكەتتىك كەدەن قىزمەتىنىڭ باسشىسى كۋبانىچبەك كۋلماتوۆتىڭ, پارلامەنت دەپۋتاتى وسمونبەك ارتىكباەۆتىڭ جانە دجالال-اباد قالاسىنىڭ ەكس-مەرى سالايدين اۆازوۆتىڭ ۇستەرىنەن قىلمىستىق ءىس قوزعالدى. بۇلاردىڭ الدىڭعى ەكەۋى بۇرناعى كۇنى تەرگەۋ امالدارى اياقتالعانشا وقشاۋ ۇستالاتىن بولىپ, قۇلىپ استىنا الىندى.
ەلدىڭ بۇرىنعى پرەزيدەنتى المازبەك اتامباەۆتىڭ ەڭ جاقىن ادامدارى بولىپ سانالاتىن بۇل تۇلعالارعا ءىرى كولەمدە پارا الۋدى ۇيىمداستىردى دەگەن كۇدىك تاڭىلىپ وتىر. ايتالىق, ساپار يساكوۆ 2014 جىلى قالانىڭ جىلۋ-ەلەكتر ورتالىعىن جاڭعىرتۋدا جەمقورلىققا ۇرىنعان. سول كەزدە شاھاردى باسقارعان كۋبانىچبەك كۋلماتوۆ وسى جۇمىس ءۇشىن بولىنگەن 2 ملن دوللارلىق گرانتتى تالان-تاراجعا سالعان.
البەتتە, المازبەك اتامباەۆ جاقتاستارىنىڭ قىلمىس جاساعاندارىنا كەلىسپەي, بۇعان بىردەن «ساياسي تاپسىرىس», «كەك قايتارۋ» دەگەن باعا بەردى.
دايىنداعان
گۇلبارام قۇراق,
ل.گۋميلەۆ اتىنداعى
ەۋرازيا ۇلتتىق
ۋنيۆەرسيتەتىنىڭ
2-كۋرس ستۋدەنتى
