ماكەدونيا اتاۋىنىڭ وزگەرۋىنە قارسى
سكوپە قالاسىنداعى ماكەدونيا پارلامەنتىنىڭ الدىنا مىڭداعان ادام جينالىپ, مەملەكەتتىڭ اتاۋىن وزگەرتۋ ءىسىن توقتاتۋدى تالاپ ەتتى.
ماكەدونيانىڭ پارلامەنت دەپۋتاتتارى وتكەن ايدىڭ ورتاسىندا گرەكيامەن جاسالعان كەلىسىمشارت نەگىزىندە كونستيتۋتسياعا وزگەرتۋ ەنگىزۋگە داۋىس بەرگەن. ناتيجەسىندە 120 دەپۋتاتتىڭ 80-ءى قولداپ, ەندى وسى باعىت بويىنشا ءتيىستى جۇمىستار جۇرگىزىلىپ جاتىر.
ايتا كەتەيىك, ماكەدونيا مەملەكەتتىڭ اتىن وزگەرتۋ تۋرالى گرەكيامەن كەلىسىمگە كەلگەن. وعان ۇلكەن سەبەپ, گرەكيا ءوزىنىڭ ءبىر ايماعىنىڭ اتىمەن شاتاستىرماس ءۇشىن اتاۋىن وزگەرتۋدى تالاپ ەتىپ, ونىڭ ەۋرووداق پەن ناتو-عا مۇشە بولۋىنا مۇمكىندىك بەرمەي كەلگەن بولاتىن. وسىلايشا ۇزاق جىلدان بەرى توقتاماي كەلە جاتقان داۋ-دامايعا نۇكتە قويىلعان.
5G 2020 جىلعا دەيىن شىعادى
ستراسبۋرگ قالاسىندا وتكەن ەۋروپا پارلامەنتىنىڭ وتىرىسىندا 5G ينتەرنەتىنىڭ جاي-كۇيى تالقىلاندى.
بۇل باستاما ەۋروپا ەلدەرىندە 2020 جىلعا دەيىن قولدانىسقا ەنگىزىلۋى ءتيىس. سونىمەن قاتار Skype, WhatsApp سەكىلدى الەۋمەتتىك جەلىلەرى ءۇشىن قاۋىپسىزدىك تالاپتارى كۇشەيتىلەدى.
Reuters اگەنتتىگىنىڭ حابارلاۋىنشا, ەۋروپاداعى ءىرى تەلەكوممۋنيكاتسيالىق كومپانيا – Deutsche Telekom بۇل جوسپاردى جاقىن ۋاقىتتا جۇزەگە اسىرماق. شىعىن كولەمى 5,5 ملرد ەۋرونى قۇرايدى. ال قىتاي بۇل ءىستى بيىلدان قالدىرماي ورىنداۋدى كوزدەپ وتىر. قازىر China Mobile, China Telecom جانە China Unicom كومپانيالارى دايىن ەكەنىن حابارلادى.
جاساندى كوز جاساپ شىعاردى
رەسەيلىك ينجەنەرلەر جاساندى ينتەللەكت نەگىزىندە كوز جاساپ شىعاردى. بۇل تۋرالى «يزۆەستيا» باسىلىمى حابارلادى.
جاڭا اپپاراتتىڭ جۇمىسىمەن «بيزنەس بيۋرو» كومپانياسى اينالىسادى. بۇل كوزدىڭ ءبىر ەرەكشەلىگى, دىبىستى, بەينەنى ساقتاپ قالۋعا قابىلەتتى ميكروفون, بەينەكامەرا سەكىلدى قۇرىلعىلارى بار.
– بۇل زاماناۋي بيونيكالىق يمپلانت جۇيەسى بويىنشا جۇمىس ىستەيدى. ويعا العان جۇمىسىمىز جۋىق ارادا جۇزەگە اسىرىلادى دەپ ۇمىتتەنەمىن, – دەيدى جوبا جەتەكشىلەرىنىڭ ءبىرى دەنيس كۋلەشوۆ.
