جەتى جاسار ميلليونەر
رايان ەسىمدى جەتى جاسار گرۋزين بالاسى YouTube جەلىسىنە جۇكتەگەن ۆيدەولار ارقىلى قىرۋار قارجى تاۋىپ وتىر.
Forbes باسىلىمى راياننىڭ 2018 جىلى 21,5 ملن دوللار پايدا تاپقانىن حابارلادى. ال ونىڭ ارناسىنا 17,3 ملن ادام تىركەلىپتى. بۇگىنگە دەيىن جۇكتەلگەن روليكتەرى 26 ملرد رەت كورىلگەن ەكەن. ونىڭ كۇندەلىكتى شىعاتىن ۆيدەولارىنا ويىنشىقپەن ويناپ جۇرگەن ساتتەرى تۇسىرىلەدى.
جەتى جاسار ميلليونەردىڭ ايتۋىنشا, ءوزىن كوڭىلدى ۇستاۋى ارقىلى كورەرمەندەرىن باۋراپ الادى. سونىڭ ارقاسىندا ويىنشىق ساتاتىن ساۋداگەرلەردىڭ ساۋداسى ءجۇرىپ تۇرعان كورىنەدى. ال تابىسىنىڭ باسىم بولىگى تيىسىنشە جارناما ارقىلى تۇسەدى.
ۋكراينا رەسەيلىكتەرگە شەكتەۋ قويادى
كەرچ بۇعازىنداعى قاقتىعىستان كەيىن ۋكراينا رەسەيلىكتەردىڭ ەلگە كەلۋىنە تىيىم سالۋدى قولعا الدى.
– قازىر وتكىزۋ بەكەتتەرى كۇشەيتىلگەن رەجيمدە جۇمىس ىستەپ جاتىر. ەلگە شەتەلدىكتەردىڭ, ەڭ الدىمەن 16-60 جاس ارالىعىنداعى رەسەي فەدەراتسياسى ازاماتتارىنىڭ كىرۋىنە شەكتەۋ قويىلدى, – دەدى ۋكراينا شەكارا قىزمەتىنىڭ باسشىسى پەتر تسيگيكال.
BBC باسىلىمىنىڭ حابارلاۋىنشا, ديپلوماتيالىق قۇجاتى, ۋكراينادا تۇراقتى مەكەنجايى بار, سول سياقتى تۋىسقاندارىنىڭ قايتىس بولۋى سەبەپتى كەلگەن رەسەيلىكتەردىڭ كىرۋىنە عانا رۇقسات ەتىلەدى.
تۋريستەر كوپ باراتىن قالا
Euromonitor International اگەنتتىگى تۋريستەر كوپ باراتىن قالانى انىقتادى.
بەلگىلى بولعانداي گونكونگ, بانگكوك (تايلاند) جانە لوندون قالالارى ساياحاتشىلار اراسىندا اسا تانىمال. جىل باسىنان بەرى گونكونگقا 30 ملن ادام بارسا, تايلاند استاناسى 22,5 ملن قوناقتى قابىلداپتى. ال اعىلشىن استاناسىنا 20 ملن تۋريست بارعان. سونداي-اق ىستانبۇل قالاسىنا قاتىنايتىنداردىڭ قاتارى ارتىپ بارادى. بيىل تۇركيا ەلىنىڭ مادەنيەتىمەن 12 ملن ادام تانىسىپ قايتىپتى.
ساراپشىلار گونكونگ قالاسىنا باراتىن تۋريستەردىڭ ارتۋىن ەكى نارسەمەن بايلانىستىرادى. ناقتىراق ايتقاندا, ۇزىندىعى 55 شاقىرىم بولاتىن چجۋحاي-ماكاو-گونكونگ كوپىرىنىڭ اشىلۋى مەن جىلدام جۇرەتىن پويىزدىڭ ىسكە قوسىلۋى ۇلكەن ءرول اتقارىپ وتىر.
