يزرايل پارلامەنتىندە داعدارىس
يزرايل بيلىگىندە داعدارىس ورنادى. پارلامەنت-كنەسسەت مۇشەلەرىنىڭ تاراتىلاتىنى xابارلانىپ, مەرزىمىنەن بۇرىن وتەتىن سايلاۋ كۇنى بەلگىلەندى.
وعان بيلەۋشى كواليتسيالىق پارتيا مۇشەلەرىنىڭ اراسىنداعى شيەلەنىس سەبەپ بولعان. قاراشا ايىندا بايت يەحۋدي پارتياسى ءبىلىم ءمينيسترى نافتالي بەننەت قورعانىس ءمينيسترى لاۋازىمىنا تاعايىندالماسا, بيلەۋشى كواليتسيادان شىعاتىنىن ءمالىم ەتكەن.
Reuters باسىلىمىنىڭ حابارلاۋىنشا, يزرايل پرەمەر-ءمينيسترى بينيامين نەتانياحۋ كواليتسيا كوشباسشىلارىمەن بىرلەسە وتىرىپ, جاڭا سايلاۋ ءساۋىر ايىندا جوسپارلانىپ وتىرعانىن ءمالىم ەتتى. ەندى قازىرگى پارلامەنت 2 قاڭتارعا دەيىن عانا جۇمىس ىستەيدى.
بۇل ەلدە پارلامەنت سايلاۋى ءتورت جىلدا ءبىر رەت وتكىزىلەدى. كەزەكتى سايلاۋ 2019 جىلدىڭ قاراشا ايىندا ءبىر-اق وتكىزىلۋى ءتيىس ەدى.
حورۆاتيادا جۇمىس كۇشى جەتىسپەيدى
حورۆاتيا مەملەكەتى جۇمىس كۇشىنىڭ ازدىعىنان قيىندىق كورىپ وتىر. وسىنىڭ سالدارىنان ەل بيلىگى شەتەلدىك جۇمىسشىلارعا ارنالعان كۆوتانى 8 مىڭنان 15 مىڭعا دەيىن ءوسىردى.
نەبارى 4 ملن تۇرعىنى بار ەلدە 30 مىڭعا جۋىق ۆاكانسيا بار كورىنەدى. جاعدايدىڭ بۇلاي وربۋىنە جالاقى مولشەرىنىڭ ازدىعى سەبەپ بولىپ وتىر.
الەمدە 2 جۇمىس ورنىنا 5 ادامنان كەلسە, زاگرەبتەگى جاعداي مۇلدەم بولەك. حورۆاتيانىڭ ەڭبەك مينيسترلىگىنىڭ مالىمەتىنشە, ەندى بوس جۇمىس ورىندارىنا ميگرانتتاردى دا تارتۋ جوسپارلانعان. بۇل ولاردىڭ حورۆاتيادا زاڭدى تۇردە تۇرۋىنا مۇمكىندىك بەرەدى.
اقاۋدى انىقتايتىن روبوت
گارۆارد ۋنيۆەرسيتەتىنىڭ عالىمدارى تەحنيكانىڭ قوزعالتقىشى مەن ءتۇرلى اقاۋلارىن انىقتايتىن كىشكەنتاي روبوت ويلاپ شىعاردى.
كىشكەنتاي قۇرىلعىعا ماگنيت ورناتىلعان. سىرت كەلبەتى جاندىككە ۇقساس. Hi-news باسىلىمىنىڭ حابارلاۋىنشا, ول سىناقتان مۇدىرمەي ءوتىپ, 100 قادام باسىپ شىققان. سونداي-اق ول كولدەنەڭنەن جانە تىك ءجۇرىپ مامانداردىڭ بۇيرىعىن تولىعىمەن ورىنداعان. روبوتتىڭ قيسىق تۇستاردان قينالماي ءوتۋى ءۇشىن اياقتارى يىلگىش رەتىندە جاسالىپتى. ەندى ماماندار ونىڭ ءبىر زاتتى كوتەرۋىن ويلاپ, وسى ماقساتتا ءتيىستى جۇمىستار اتقارىپ جاتىر.
