قازىر جاھاننىڭ ءبىر كۇنى ەلدى ەلەڭ ەتكىزەتىن جاڭالىقتارسىز وتپەيتىن بولدى. سونىڭ ءبىرى – نيدەرلاندتا بەس ەلدىڭ وكىلى 2014 جىلى 17 شىلدەدە دونباسس ۇستىنەن ۇشىپ بارا جاتقان مالايزيا لاينەرىن رەسەي قارۋلى كۇشتەرى اتىپ ءتۇسىردى دەگەن شەشىمگە كەلدى. ال بۇدان ەكى اي عانا بۇرىن بۇعان ۋكراين اتقىشتارىنىڭ قاتىسى بار دەگەن تۇجىرىم جاسالىپ ەدى. البەتتە, بۇل جولعى بولجامعا رەسەي جاعى كەلىسىپ وتىرعان جوق.
تومەندە دۇنيەنى دۇربەلەڭگە سالىپ وتىرعان سونداي بىرنەشە وقيعا تۋرالى ءسوز ەتەمىز.
يۋليا سكريپال «جارىققا» شىقتى
الەم جۇرتشىلىعى بۇگىندە ءتىرى ەكەنىنە كۇمان كەلتىرە باستاعان رەسەيلىك ازاماتشا, بريتانياداعى «سولسبەري وقيعاسىنان» زارداپ شەگۋشىنىڭ ءبىرى يۋليا سكريپال 23 مامىر كۇنى «روسسيا» تەلەارناسىنىڭ «60 مينۋت» باعدارلاماسىنا شىعىپ, ءوزىنىڭ جايىنان ءبىرشاما ماعلۇمات بەردى. رەسەي بارلاۋ باسقارماسىنىڭ بۇرىنعى قىزمەتكەرى سەرگەي سكريپالدىڭ 33 جاستاعى قىزى ءوز سوزىندە «وتانعا ايتەۋىر ءبىر قايتا الاتىنىنا ءۇمىتتى» ەكەنىن ءبىلدىردى.
ءسويتىپ, كۇللى الەم «حيميالىق شابۋىلعا ۇشىرادى» دەپ جانى اۋىرىپ وتىرعان اكەلى-بالالى ەكەۋدىڭ كوڭىل جۇباتارلىق بولسا دا ءبىر جاقسى حابارى شىعىپ, قۇلاعى تۇرىك جۇرت ءبىر سەرپىلىپ قالدى.
بۇل وقيعا ناۋرىزدىڭ باسىندا باستالعان ەدى. ۇلىبريتانيا سوندا اكەلى-بالالى سكريپالدەرگە رەسەي جاعى «حيميالىق شابۋىل جاسادى» دەگەن ايىپ تاقتى. كەيىن ەكەۋى دە اۋرۋحانادا جاتىپ, ءولىم اۋزىنان قايتتى. ماسكەۋ مۇنىڭ ءبارىن لوندون ۆاشينگتونمەن بىرىگىپ, ءوزى جاسادى دەگەن تۇجىرىمدى سول بويدا-اق جاريالاعان بولاتىن.
پحەنيان پوليگونىن جارىپ جىبەردى
سولتۇستىك كورەيانىڭ بيلىگى 24 مامىر كۇنى ءوزىنىڭ پۋنگەريدەگى يادرولىق پوليگونى تۋننەلىندە جابدىقتاردى بۇزىپ الۋ جۇمىستارىن جۇرگىزدى. بۇل ۇدەرىس بىرقاتار شەتەلدىك بۇقارالىق اقپارات قۇرالدارى وكىلدەرىنىڭ قاتىسۋىمەن جۇزەگە اسىرىلدى.
سول كۇننىڭ كەشىندە اقش پرەزيدەنتى دونالد ترامپ كحدر ليدەرى كيم چەن ىنمەن 12 ماۋسىمدا سينگاپۋردە وتكىزۋگە كەلىسىلىپ قويىلعان كەزدەسۋدەن باس تارتاتىنىن مالىمدەپ ۇلگەردى. ول مۇنى سولتۇستىك كورەيا جەتەكشىسىنە جولداعان جولداۋىندا اتاپ كورسەتتى.
اق ءۇي قوجايىنىنىڭ مۇنداي شەشىمگە پحەنياندىق ارىپتەسىنىڭ سوڭعى كەزدەرى ەكى ارادا بولعان ءسوز قاقتىعىستارى كەزىندە ايتىپ سالعان پىكىرلەرىنە رەنجىگەننەن باردى ما, الدە پۋنگەريدەگى پوليگوننىڭ قيراتىلعانى تۋرالى اقپار كەلگەننەن كەيىن ادەيى جاساپ وتىر ما, – ول جاعى ازىرگە بەلگىسىز. بىراق ونىڭ قارسىلاسىنا وسى رەتتە امەريكانىڭ يادرولىق مۇمكىندىكتەرىنىڭ زور ءارى قۋاتتى ەكەنى سونداي, بۇلاردىڭ ىسكە قوسىلماۋىن تىلەۋى كەرەك ەكەنىن ايتىپ قورقىتقانى ونشالىقتى ۇناسىمدى بولىپ شىقپادى. سوعان قاراماستان, ترامپ ايتەۋىر ءبىر ۋاقىتتا كيم چەن ىنمەن بەتپە-بەت كەزدەسەتىن كۇن تۋاتىنىنا ءۇمىت ارتاتىنىن دا جاسىرمادى.
ءار مينۋتى 100 مىڭ دوللارلىق كەزدەسۋ
ۋكراينا پرەزيدەنتى پەتر پوروشەنكونىڭ اقش پرەزيدەنتى دونالد ترامپپەن كەزدەسۋىن ۇيىمداستىرۋ ءۇشىن بۇلاردىڭ سوڭعىسىنىڭ ادۆوكاتى مايكل كوەن كەمىندە 400 مىڭ دوللار پارا العان بولىپ شىقتى.
كەزدەسۋ ءۇشىن تولەم تولەۋ ەكى ورتادا جۇرگەن دەلدالدار ارقىلى جۇزەگە اسىرىلعان. ولار جوعارىدا ايتىلعان سوماداعى پارانى كوەنگە جەتكىزىپ بەرگەن. ال ەكى ليدەردىڭ كەزدەسۋى وتكەن جىلعى ماۋسىم ايىندا اق ۇيدە وتكەن. پەتر پوروشەنكو ەلىنە ورالعاننان كەيىن جەمقورلىققا قارسى ۆەدومستۆو ترامپتىڭ سايلاۋ الدى شتابىنىڭ بۇرىنعى باسشىسى پول مانافورتتىڭ ۇستىنەن قوزعالعان قىلمىستىق ءىستى توقتاتقان.
وسى دەرەكتى شىعارعان ۋكراينا قاۋىپسىزدىك قىزمەتىنىڭ جوعارى لاۋازىمدى قىزمەتكەرى رەسمي ەمەس كەزدەسۋدى ۇيىمداستىرۋعا جوعارعى رادانىڭ ءبىر دەپۋتاتى قاتىسقانىن ايتادى. ول ءوز كەزەگىندە ەۆرەيلەردىڭ نيۋ-يوركتەگى Chabad of Port Washington قايىرىمدىلىق ۇيىمى ارقىلى كوەنگە 400 مىڭ دوللار اپارىپ بەرگەن. كيەۆتەگى تاعى ءبىر دەرەك كوزى اقشا سوڭىندا 600 مىڭ دوللارعا جەتكىزىلدى دەپ وتىر. سوندا پوروشەنكونىڭ ترامپپەن كەزدەسۋىنىڭ ءاربىر مينۋتى ءۇشىن 100 مىڭ دوللار اقى تولەنگەن بولىپ شىعادى.
قازىر اقش بارلاۋ ۇيىمى تاراپىنان بۇل دەرەكتى تەكسەرۋ قولعا الىنىپ جاتىر.
