ەلىمىزدىڭ ەڭ ءساندى جۇلدىزدارى
بەيبىتشىلىك جانە كەلىسىم سارايى ەلىمىزدىڭ ەڭ ءساندى جۇلدىزدارى شوعىرلانعان مەكەنگە اينالدى. وسىندا ELLE جۋرنالى ءسان الەمىندەگى ۇزدىكتەردى ۇكىلەدى. «ELLE Style Awards Kazakhstan» بايقاۋى – برەند پەن ترەند باعالاۋشىلارىن ماراپاتتاۋ سالتاناتى. استانا كۇنىنە وراي ەلوردادا العاش رەت ۇيىمداستىرىلعان شاراعا قالا اكىمدىگى قولداۋ كورسەتتى. ايتۋلى شاراعا استانا قالاسى اكىمىنىڭ ورىنباسارى ەرمەك امانشاەۆ قاتىستى.
– بارشاڭىزدى ەلوردامىزدىڭ ءتول مەرەكەسىمەن شىن جۇرەكتەن قۇتتىقتايمىن. استانا كۇنىن تويلاۋ قارساڭىندا ءارتۇرلى دەڭگەيدەگى شارالار وتكىزىلۋدە. باس قالامىزدا فەشن-جوبا جاساۋ كوپتەن بەرى كوكەيدە جۇرگەن ارمان ەدى. اتالعان ەرەكشە بايقاۋ ءسان الەمىندە ءوز ورنىن تاۋىپ, ءداستۇرلى تۇردە استانادا وتەدى دەگەن ۇمىتتەمىن, – دەدى ول.
ونلاين سايىسقا تۇسكەن ۇمىتكەرلەر تەك قانا ءساندى عانا ەمەس, كورەرمەن كوزايىمىنا اينالدى. سەبەبى, داۋىس بەرۋگە 11500-دەن استام ادام قاتىستى. ءبىر ايعا جۋىق ۋاقىتتا كورەرمەن سۇيىكتى ارتىسىنە, سانگەرىنە, ديزاينەرىنە داۋىس بەردى. 30 ماۋسىم كۇنى ۇزدىكتەردىڭ ەسىمى بەلگىلى بولدى.
سونىمەن, «ديزاينەر-تۇراقتى تابىس» اتالىمىندا اينۇر تۇرىسبەك توپ جاردى. بۇل نوميناتسياعا ىلىككەن ءاربىر ديزاينەر جارتى جىلدا ءبىر رەت ءوز جەكە توپتاماسىن ۇسىنىپ وتىرادى. ساتىلىمى جاعىنان دا وتە جاقسى كورسەتكىشتەرگە يە. «مودەل» اتالىمىندا ەڭ ۇزدىك قورلان مادي بولىپ تانىلدى. بولاشاعىنان كوپ ءۇمىت كۇتتىرەتىن ارۋدىڭ ەسىمى شەتەلگە دە تانىمال. ول Fendi, Bulgari ءcان ۇيلەرىمەن بىرلەسىپ جۇمىس ىستەدى. كەيىنگى كەزدەرى ءوزىنىڭ اكتەرلىك شەبەرلىگىن شىڭداپ ءجۇر.
– وتانعا ورالىپ, ەلوردامىزدىڭ كوركەيىپ جاتقانىن اڭعارۋ, ەلىمىزدىڭ شەتەلدەگى تانىمالدىعىنا كۋا بولۋ مەنى قۋانتادى. كەلە جاتقان قالا كۇنىمەن استانالىقتاردى قۇتتىقتايمىن, – دەدى ول.
كوپشىلىكتىڭ تاڭداۋى بويىنشا, جىل جوباسىنا «Astana Ballet» تەاترى يە بولدى. جاس تا بولسا دارىندى دانيار سارسەەۆ ۇزدىك فەشن-فوتوگراف اتاندى. ونىڭ جۇمىستارى الەمدىك باسىلىمداردا جارىق كورىپ ۇلگەردى.
«Elle Style Awards Kazakshtan» تۇڭعىش جۇلدەسىنىڭ تاريحىنا كوپكە ۇلگى بولاتىن «وتباسىلىق جۇپ» رەتىندە جۋرناليست, پۋبليتسيست دانا ورمانباەۆا مەن شوۋمەن داۋت شايحيسلاموۆ ەندى. ءتورت بالانى تاربيەلەپ وتىرعان جۇلدىزدى جۇپ شىعارماشىلىقتان بولەك, قايىرىمدىلىقپەن دە اينالىسادى.
ون جىلدىق تاريحى بار «كەشYou» مەن «رينگو» توپتارى ۇزدىكتەردىڭ قاتارىنان تابىلدى. ەلىمىزدىڭ ەڭ ءستيلدى شوۋمەن اتاعى تۇرسىنبەك قاباتوۆقا بەرىلدى. كورەرمەننىڭ ەڭ كوپ داۋىسىن جيناعان ايسۇلۋ ازىمباەۆا مەن سانجار ماديەۆ «تەاتر جانە كينو اكتەرلەرى» اتالىمىندا ۇزدىك اتاندى.
ۇزدىك «Startup» جوباسى دەپ AUA (Almaty Urban Air) سمارتفون قوسىمشاسى تاڭدالدى. بۇل قوسىمشا قالانىڭ كەز كەلگەن نۇكتەسىنەن اۋانىڭ لاستانۋ دەڭگەيىن انىقتاپ بەرەدى. سونداي-اق, اۋا تەمپەراتۋراسىن, ىلعالدىلىعىن جانە جاياۋ جۇرۋگە قولايلى جەردى تاڭداپ بەرۋگە مۇمكىندىگى بار. قۇراستىرۋشىسى – ءاسيا تولەسوۆا.
العاش رەت قازاقستاندىق ELLE جۋرنالىنىڭ جەڭىمپازدارى اراسىنان انسۇيەر قاۋىم ەكى داۋىستى تاڭدادى. جەڭىس تۇعىرىنان ءانشى ءالي وقاپوۆ پەن ديانا شاراپوۆا كورىندى.
ءسان الەمىندەگى جاڭا ەسىم – قازاقستاندىق ديزاينەر اسەل نۇسىپقوجانوۆا. كيىم ۇلگىلەرىندە ۇلتتىق كولوريتكە باسىمدىلىق بەرەتىن ول ساحناعا شىعىپ, قاتتى قۋانىپ, كوز جاسىنا ەرىك بەردى. اسەل «Mestiére» اتتى العاشقى توپتاماسىنىڭ ارقاسىندا تانىمال.
ماراپاتتاۋدىڭ تەلەۆيزيالىق نۇسقاسىن 5 شىلدە كۇنى «حابار» ارناسىنان تاماشالاي الاسىزدار.
گۇلدانا تالعاتقىزى