ەلباسىنىڭ «بولاشاققا باعدار: رۋحاني جاڭعىرۋ» ماقالاسى اياسىندا قالالىق ىشكى ساياسات باسقارماسىنىڭ قولداۋىمەن «استانا تاريح تولقىنىندا» اتتى دوڭگەلەك ۇستەل ءماجىلىسى ءوتتى. جيىنعا عالىمدار, جوعارى وقۋ ورىندارىنىڭ وقىتۋشىلارى مەن ستۋدەنتتەرى قاتىستى.
بۇگىندە استانا – الەم تانىعان جاس قالا. جىل ساناپ ەمەس, كۇن ساناپ كوركەيىپ كەلە جاتقان شاھاردىڭ كەلەشەگى جارقىن. ەل ەكونوميكاسىنا جاڭا سەرپىن اكەلگەن قالانىڭ ابىرويى دا بيىك. رەسپۋبليكانىڭ ءار تارابىنان ارمان قۋىپ كەلگەن قانشاما جاس ءوز تاعدىرىن ەلوردامەن بايلانىستىردى. باس وردانىڭ دامۋىنا ءوز ۇلەسىن قوسۋدا. دوڭگەلەك ۇستەلدە بۇگىنگى استانا مەن كەشەگى اقمولانىڭ تاريحى ءسوز بولدى. قر بعم مەملەكەت تاريحى ينستيتۋتىنىڭ قىزمەتكەرى, پەداگوگيكا عىلىمدارىنىڭ كانديداتى جاباي قاليەۆ «استانا – قازاق ەلىنىڭ لوكوموتيۆى» دەگەن باعىتتا ءسوز سويلەسە, وسى ينستيتۋتتىڭ تاعى ءبىر عىلىمي قىزمەتكەرى قۇندىزاي ەرىمبەتوۆا «استانا تۇرعىندارى جانە باسەكەگە قابىلەتتىلىك» تاقىرىبىندا وي قوزعادى.
– استانا جاڭارعان ەلىمىزدىڭ كەلبەتىن كورسەتەدى. از ۋاقىتتا الەمدىك ماڭىزدى جيىندار وتەتىن قالادا قاراپايىم جۇمىسشىدان باستاپ, جوعارى ءبىلىمدى ماماندارعا دەيىن باسەكەگە قابىلەتتىلىك ورتا قالىپتاسىپ كەلەدى. بۇگىندە ەلوردا ميلليون تۇرعىنى بار مەگاپوليسكە اينالدى. ارينە, ماسەلە ساندا ەمەس, ساپالىق كورسەتكىشتە. بۇل جاعىنان دا جاقسى ناتيجەلەردى بايقايمىز, – دەدى تاريح عىلىمدارىنىڭ كانديداتى.
ال بەلسەندى ازامات جۇمامۇرات ءشامشى ءوز سوزىندە بۇگىندە باس شاھاردى تانىمايتىن ەل جوق ەكەندىگىن ايتىپ, جينالعاندارعا ەلوردانىڭ باسقالاردان ماڭىزدىلىعىن ەرەكشەلەدى. «استانا – شانحاي ىنتىماقتاستىق ۇيىمىنىڭ, الەمدىك دىندەردىڭ كوشباسشىلارى جينالاتىن ورداعا اينالدى. ماسەلەن, كەشەگى كۇنى سيرياداعى جاعداي دا باس قالادا جەتىنشى مارتە تالقىلاندى. الەمدى بىرلىككە, ىنتىماققا شاقىرۋداعى, قازاقتىڭ «تورتەۋ تۇگەل بولسا – توبەدەگى كەلەر» دەگەن قاعيداسىنا باعىتتالعان كوپۆەكتورلى ساياساتى ەلوردادا جۇزەگە اسۋدا» دەدى ول. س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ دوتسەنتى باۋىرجان ەڭسەپوۆ ەلىمىزدەگى استانالار تاريحىنا قىسقاشا شولۋ جاسادى.
قىسقاسى, جيىنعا قاتىسقان ءاربىر ازامات ەلوردانىڭ تاريحى مەن بۇگىنگى گۇلدەي جايقالعان بەينەسى جايىندا كوتەرىڭكى لەپپەن سويلەپ, ويلارىن ورتاعا سالىپ, پىكىر الىستى.
ا. قۇسايىن
