ەلوردانىڭ «ۇركەر» تۇرعىن الابى ماڭايىندا, ەجەلگى بوزوق قالا جۇرتىنىڭ ورنىندا اشىق اسپان استىنداعى مۋزەي اشىلادى. ول شەتەلدىك تۋريستەردى تارتۋعا جاڭا سەرپىن بەرەتىن, تۋريستىك قالا رەتىندە ەلوردانىڭ باسەكەگە قابىلەتتى الەۋەتىن ارتتىراتىن تۋريستىك برەندكە اينالماق.
جاقىندا «بوزوق» مەملەكەتتىك تاريحي-مادەني مۋزەي-قورىعى نۇر-سۇلتان قالاسىنىڭ جەتەكشى ديزاينەرلەرىن شاقىرىپ, اشىق اسپان استىنداعى ۇلتتىق پاركتىڭ كەشەندى ماكەتىنە وزگەرىستەر مەن تولىقتىرۋلار ەنگىزۋ جونىندە كەڭەس وتكىزدى. جوبانىڭ ماڭىزدى مىندەتى – ەجەلگى بوزوق قالاشىعى نىساندارىنىڭ تۇپنۇسقالىعىن ساقتاۋ, تاريحي رەكونسترۋكتسيانى ەلدىڭ تاريحي-مادەني مۇراسىن زەرتتەۋدىڭ كورنەكى ءادىسى رەتىندە پايدالانۋ ەكەنىن ەسكەرە وتىرىپ, ءارتۇرلى كاسىبي قوعامداستىقتاردىڭ وكىلدەرىمەن ىنتىماقتاستىق ورناتۋ.
قازىر اشىق اسپان استىنداعى مۋزەي قۇرۋدىڭ تۇجىرىمداماسى دايىن. سوعان سايكەس مۋزەيدە تۇركى عيباداتحاناسى, قاعان ورداسى, مۇنارا سالىنادى. ەنەوليت داۋىرىندەگى بوتاي مادەنيەتىنە جەتەلەيتىن قازاقتىڭ اتقا ءمىنۋ مادەنيەتى دە كورىنىس تابادى. قولا جانە ەرتە تەمىر ءداۋىرى, اندرون مادەنيەتى, ەرتە كوشپەلى مادەنيەتى بەلگىلەرى, قازاقستان جەرىندەگى ەڭ كونە عيباداتحانا – بالاندى (شىرىك-رابات), مەتالل وڭدەۋ شەبەرحاناسى ماكەتتەرى, كونە مادەنيەتتەن حابار بەرەتىن باسقا دا بەلگىلەر قامتىلادى.
