كۇن سايىن قاۋىپپەن بەتپە-بەت كەلىپ, ءتىلسىز جاۋدى تىزگىندەپ, ادامداردى قۇتقارۋدى اسىل مىندەتى سانايتىن ماماندىق يەلەرى ءورت سوندىرۋشىلەر مەن قۇتقارۋشىلار ەكەنى ءسوزسىز. اسىرەسە نۇر-سۇلتان سىندى الىپ شاھاردا ولارعا استە بوساڭسۋعا بولمايدى. تاۋلىكتىڭ كەز كەلگەن ۋاقىتىندا دابىل قاعىلسا, وقيعا ورنىنا دەرەۋ جەتىپ, ءابجىل قيمىلداۋ قاجەت.
وتكەن اپتانىڭ سوڭىندا ەلوردالىق توتەنشە جاعداي دەپارتامەنتىنىڭ ءورت ءسوندىرۋ بولىمشەلەرى ماڭگىلىك ەل داڭعىلىنداعى كوپپاتەرلى تۇرعىن ۇيدە ءورت شىققاندىعىنان حابار الادى. كەلگەن ساتتە ورتكە قارسى قىزمەت ماماندارى ءۇشىنشى قاباتتا ورنالاسقان پاتەردىڭ جيھازى مەن زاتتارىن جالىن شارپىپ, جالپى 25 شارشى مەتر اۋماق ورتكە ورانعانىن كورەدى. شاپشاڭ ارەكەت ناتيجەسىندە ءورت اۋىزدىقتالىپ, ەۆاكۋاتسيا جۇمىستارى جۇرگىزىلگەن. ءورت سوندىرۋشىلەردىڭ كاسىبيلىگىنىڭ ارقاسىندا جوعارعى قاباتتاعى پاتەردەن قۇتقارۋ ماسكاسىنىڭ كومەگىمەن باسپالداق مارشى ارقىلى 1954 جىلعى ايەل كىسى قۇتقارىلدى.
ءورت سالدارىن جويۋ ءۇشىن قالالىق تجد جەكە قۇرامىنان 5 تەحنيكا مەن 27 ادام جۇمىلدىرىلعان. وقيعادان ءبىر كۇن بۇرىن اتالعان دەپارتامەنت قىزمەتكەرلەرى «ءورت قاۋىپسىزدىگى سەنبىلىگىن» وتكىزگەن بولاتىن. سەنبىلىك اياسىندا 200-دەن استام جەكە تۇرعىن ۇيلەردىڭ اۋلالارىن ارالاپ, حالىقتىڭ الەۋمەتتىك وسال توپتارىنا 12 ۋلى گازعا قارسى قۇرىلعى ورناتقان. سونىمەن قاتار الماتى اۋدانىنداعى ق.قۋانىشباەۆ اتىنداعى قازاق مەملەكەتتىك اكادەميالىق مۋزىكالىق-دراما تەاترىندا ورتكە قارسى جاتتىعۋ وتكەن.
وتكەن جىلدىڭ ەنشىسىندە 718 ءورت تۋرالى حابار تۇسكەن. سونىڭ سالدارىنان 20 ادام جاراقات الىپ, 11 ازامات قازا تاپقان. جالپى 179,6 ملن تەڭگە كولەمىندە ماتەريالدىق شىعىن كەلتىرىلگەن. ءورتتىڭ باسىم كوپشىلىگى جەكە سەكتورلاردا بولعان. ولاردىڭ سانى 330 بولسا, كولىك قۇرالدارىندا – 210, باقىلاۋداعى نىسانداردا 123-كە جەتكەن. جىل باسىنان 68 دەرەك تىركەلسە, 2 ادام جاراقات الىپ, 5 ادام قايتىس بولعان. بۇل تۋرالى مەملەكەتتىك ءورتتى باقىلاۋ باسقارماسىنىڭ باسشىسى ە.وتارعالىمۇلى مالىمدەپ وتىر. سونىمەن قاتار ول قالا تۇرعىندارىن بارىنشا ساقتىق شارالارىن ساقتاپ, ورتكە سوقتىراتىن سالداردى بولدىرماۋعا شاقىرىپ وتىر.
ءاسيا نۇربەكقىزى
