ەلوردادا قالا باعدارلارىندا قاتىنايتىن 100 ەلەكترواۆتوبۋستى ساتىپ الۋ كەلىسىمشارتى جاسالدى. Yutong ماركالى بۇل كولىكتەردى «سارىاركا اۆتوپروم» جشس شىعارعان.
ءبىر اۆتوبۋستىڭ باعاسى 146,7 ملن تەڭگەنى قۇرادى. ولاردى ليزينگكە جەتى جىل مەرزىمىنە ساتىپ الادى. كەلىسىمشارت بويىنشا مەردىگەر اۆتوبۋستاردى Astana LRT ءۇشىن جارتى جىل ىشىندە جەتكىزۋى كەرەك. الايدا نۇر-سۇلتان قالاسىنىڭ اكىمى التاي كولگىنوۆ ەلەكترواۆتوبۋستار جىل اياعىنا دەيىن قالا جولدارىنا شىعاتىنىن ايتقان بولاتىن.
«Astana LRT» جشس ءباسپاسوز قىزمەتىنىڭ حابارلاۋىنشا, وسى جىلدىڭ اقپان ايىندا №1 اۆتوپارك بازاسىندا ەلەكتروبۋس سىناقتان وتكىزىلگەن. ونىڭ باتارەياسى 250 شاقىرىمعا جەتەدى. باتارەيا 10 جىلعا شىدايدى. سىناق -38 گرادۋس تەمپەراتۋراسىندا وتكىزىلىپ, جاقسى ناتيجە كورسەتتى. ديزەلگە قاراعاندا ەلەكتروبۋستاردىڭ شىعىنى الدەقايدا تومەن بولادى.
ەلەكتروبۋستاردىڭ جالپى سىيىمدىلىعى 73 ادامنان كەم ەمەس بولادى. سونىڭ ىشىندە جولاۋشىلار وتىراتىن ورىندار 30-دان از ەمەس. كولىكتەر -45-تەن +45 گرادۋسقا دەيىنگى تەمپەراتۋرانى كوتەرۋى ءتيىس. قىزمەت ەتۋ مەرزىمى – 12 جىل.
ءار ورىندىقتىڭ جانىندا موبيلدىك قۇرىلعىلاردى قۋاتتايتىن USB-پورتتار ورناتىلادى. بۇعان قوسا, جولاۋشىلاردى تەگىن Wi-Fi جەلىسىمەن قامتاماسىز ەتۋگە تالاپ قويىلدى.
