استانا اكىمى اسەت يسەكەشەۆ قالاداعى جاڭا بازارلار قاي اۋداندا سالىناتىنىن ايتتى, دەپ حابارلايدى ەلوردا ينفو.
«ءبىز تۇرعىنداردىڭ قالانىڭ ءبىر شەتىنەن ءبىر شەتىنە جۇرمەۋى ءۇشىن, بازارلاردىڭ جاياۋ ءجۇرىپ جەتۋىن قامتاماسىز ەتۋىنە تالداۋ جۇرگىزدىك. ماسەلەن, مەملەكەتتىك باعدارلامامەن سالىنعان ۇيلەردىڭ تۇرعىندارى قالانىڭ ءبىر شەتىنە قاتىناپ, قالادا كەپتەلىس تۋدىرماۋى ءۇشىن قازىر جاڭا بازارلاردىڭ قۇرىلىسىن سالۋدى جوسپارلاپ وتىرمىز», – دەدى اسەت يسەكەشەۆ.
بۇگىنگى كۇنى ەلوردادا جاڭا بازارلاردى سالاتىن ينۆەستورلارمەن جۇمىس اتقارىلىپ جاتىر. يسەكەشەۆتىڭ ايتۋىنشا, استانادا ەڭ كەمى جاڭا 5 بازار سالۋ كوزدەلىپ وتىر.
«ونىڭ بىرنەشەسىنىڭ قۇرىلىسى وسى جىلى باستالادى. اتاپ ايتقاندا, بەيسەكوۆا كوشەسى مەن «نۇرلى جول» تەمىرجول ۆوكزالى اۋدانىندا بولادى. ءبىزدىڭ مىندەتىمىز – قالا تۇرعىندارى ازىق-تۇلىك ءۇشىن قالانىڭ ءبىر شەتىنە سابىلىپ جۇرمەيتىندەي بازارمەن قامتاماسىز ەتۋ», – دەدى قالا باسشىسى.
