قر تۇڭعىش پرەزيدەنتى – ەلباسىنىڭ كىتاپحاناسى مۋزەيىنىڭ عيماراتىندا ومىردەن ەرتە وزعان دارىندى قىلقالام شەبەرى مۇراتبەك جولامانوۆتىڭ «رۋحپەن سىرلاسۋ» اتتى كورمەسى اشىلدى. ايتۋلى شارا «رۋحاني جاڭعىرۋ» باعدارلاماسىنىڭ اياسىندا ۇيىمداستىرىلدى.
كورمەگە سۋرەتشىنىڭ 30-دان اسا كارتيناسى قويىلدى. ونىڭ ءبارى دە اسىل قازىناعا اينالعان تۋىندىلار. شارانىڭ شىمىلدىعىن ەلباسى كىتاپحاناسى ديرەكتورىنىڭ ورىنباسارى ءامىرحان راحىمجانوۆ اشتى.
– اۆتوردىڭ تاريحي تاقىرىپتارعا قالام تارتقان تۋىندىلارى ءبىزدىڭ ۇلتتىق بىرەگەيلىگىمىز بەن تۋعان ەلگە دەگەن شىنايى پاتريوتتىق سەزىمىمىزدى ايشىقتاتا تۇسەدى. ول جارىق جۇلدىزداي وتاندىق بەينەلەۋ ونەرىندە ءىزىن قالدىردى. بۇل عاسىرلار توعىسىنداعى ەلىمىزدىڭ كوركەم ونەرىنىڭ ەرەكشە ءبىر قۇبىلىسى ەكەنى داۋسىز, – دەپ اقتارىلىپ سويلەدى.
شىندىعىندا, تالانتتى ازامات قامشىنىڭ سابىنداي قىسقا عۇمىرىندا تاريحي تاقىرىپتارعا كوبىرەك زەر سالعان. ءبىز ونى سۋرەتشىنىڭ «سىرىم باتىر», «قۇلاگەر», «رۋح شاقىرۋ», «ەدىل–جايىق», «كۇلتەگىن مەن بىلگە تۋرالى جىر», «سارىن», «قازانات», «تۇمار», «قورقىتتىڭ تەڭىزگە كەلۋى», «كەرەي–جانىبەك», «جامان ىرىم نەمەسە قاعاناتتىڭ قۇلاۋى», «قىزعىش قۇس», «جەكپە-جەك», «اتتيلانىڭ ەلەسى» سەكىلدى شىعارمالارىنان كورە الدىق. بۇلاردىڭ ءبارى دە تاريحتىڭ تەرەڭ قويناۋىنان سىر شەرتەدى. كارتينالاردان ۇلتتىق ەرەكشەلىكتى بىردەن بايقايسىز. بوياۋى قانىق. كورگەن ادامدى سەلت ەتكىزبەي قويمايدى. قانىڭىزدا رۋح اتويلاپ جونەلەدى. مەنى «قۇلاگەر» تۋىندىسى ەرەكشە تاڭعالدىردى. تۇياعى جەر تارپىپ, كوككە شاپشىپ تۇرعان تۇلپار. بۇل جۇمىستى قىلقالام شەبەرى جارتى كۇندە سالعان. ابدەن ميدا قايناپ, ءبىر دەمدە قۇيىلا قالعان شىعارما ەكەنىن ايتپاي تانيسىز. مۇراتبەكتىڭ ءوزى دە جىلقى جىلى تۋعاندىقتان با, ءتورت تۇلىكتىڭ تورەسىن جاقسى كورگەن. بۇگىندە جولامانوۆتىڭ جۇمىستارى تۇركيا, پولشا, ۇلىبريتانيا, كورەيانىڭ جەكە قورلارىندا ساقتاۋلى تۇر.
كورمەگە سۋرەتشىنىڭ جۇبايى گۇلجامىش جولامانوۆا دا قاتىسىپ, جولداسىنىڭ ەرەكشە تالانتى تۋرالى اڭگىمەلەدى. «ونىڭ كوركەمدىك الەمى – ءوز الدىنا بولەك دۇنيە. ارامىزدان كەتكەنىنە 18 جىل بولسا دا, ونىڭ ونەرى بۇگىنگى جاستارعا وتە قىزىق. كارتينا جازۋ مانەرى مەن تەحنيكاسى ءوز زامانىنان وزىق بولدى. ول ەشقاشان تاپسىرىسپەن جۇمىس ىستەگەن جوق» دەسە, قازاقستاننىڭ سۋرەتشىلەر وداعىنىڭ مۇشەسى, ونەردەگى ۇستازى سەمبىعالي سماعۇلوۆ: «مۇراتبەكتىڭ قىسقا, بىراق وتە جارىق عۇمىرى ىزدەنىستەر مەن باستامالارعا تولى بولدى. ول ءوزىن ءتۇرلى جانرلاردا بايقادى. ونى ۇلى تاريحي تۇلعالار قىزىقتىراتىن. ومىردەن ەرتە وتسە دە, ارتىنا مول مۇرا قالدىردى» دەپ شاكىرتى جايىندا شىنايى تولعانىسىن جەتكىزدى.
شارا بارىسىندا سۋرەتشىنىڭ باتىس قازاقستاننان كەلگەن جەرلەستەرى دە ءسوز الدى. قازىرگى كۇندە مۇراتبەكتىڭ تۋعان اۋىلىندا كەۋدە ءمۇسىنى قويىلىپ, ءوزى وسكەن ۇيگە تاقتا ورناتىلعان.
ايتا كەتەيىك, كورمە 27 ناۋرىزعا دەيىن جالعاسادى.
ازامات ەسەنجول
