1 قىركۇيەكتەن باستاپ رەسپۋبليكا بويىنشا «ۋچاسكە» جەدەل الدىن الۋ ءىس-شاراسى وتكىزىلىپ جاتىر. شاراعا قر ءىىم ۇلتتىق ۇلان اسكەري قىزمەتكەرلەرى مەن ەلوردالىق ىشكى ىستەر دەپارتامەنتى بولىمشەلەرىنىڭ جەكە قۇرامى تارتىلدى. 1 جەلتوقسانعا دەيىن ۋچاسكەلىك ينسپەكتورلار پاتەرلەر مەن تۇرعىن ۇيلەردى ارالاپ, تۇرعىندار جايلى مالىمەت, سونداي-اق شاعىمدار مەن ۇسىنىستار جينايدى. اكتسيا باستالعالى پوليتسەيلەر 78 مىڭنان استام پاتەر مەن 10 400 جەكە مەنشىكتى تۇرعىن ۇيدە بولعان.
جەدەل الدىن الۋ ءىس-شاراسى بارىسىندا 260 استام تۇرعىلىقتى جەرى جوق تۇلعا ۇستالدى. سونداي-اق, اباتتاندىرۋ ەرەجەلەرىن بۇزۋدىڭ 1400 فاكتىسى تىركەلدى, ۇساق بۇزاقىلىق جاساۋ بويىنشا 600 استام, الكوگولدىك ىشىمدىكتەر ءىشۋ نەمەسە ماس كۇيدە قوعامدىق ورىندارعا كەلۋ بويىنشا 940 اكىمشىلىك حاتتاما تولتىرىلدى.
استانا قالاسىنىڭ ءىىد جەرگىلىكتى پوليتسيا قىزمەتىنىڭ حابارلاۋىنشا, ءىس-شارانىڭ باستى ماقساتى ۋچاسكەلىك ينسپەكتورلاردىڭ, كوشى-قون پوليتسياسىنىڭ, قىلمىستىق جانە پاترۋلدىك پوليتسيا قىزمەتكەرلەرىنىڭ, سونىڭ ىشىندە جەدەل ارەكەت ەتۋ بولىمشەلەرىنىڭ جانە ت.ب. قىزمەتتەردىڭ كۇشىمەن ءاربىر اكىمشىلىك اۋماقتا قۇقىق بۇزۋشىلىقتىڭ الدىن الۋ بويىنشا جۇمىستاردى بەلسەندىرۋ بولىپ تابىلادى. جالپى, شاراعا 400 جۋىق پوليتسيا قىزمەتكەرى مەن ۇلتتىق ۇلان اسكەري قىزمەتكەرلەرى تارتىلدى.
ۋچاسكەلىك ينسپەكتورلار ۇيلەردى ارالاپ, وزدەرىنىڭ بايلانىس تەلەفوندارىن قالدىرادى. سونىمەن قاتار, پوليتسيا قىزمەتكەرلەرى ساياجايلارعا, قۇرىلىس نىساندارىنا, بازارلار مەن باسقا دا ساۋدا ورىندارىنا بارادى.
ەگەر ادامدار پاتەر جالداپ تۇرىپ جاتسا, بۇل تۋرالى مالىمەتتەر استانا قالاسىنىڭ مەملەكەتتىك كىرىستەر دەپارتامەنتىنە جولدانادى. جىل باسىنان بەرى قالالىق جەرگىلىكتى پوليتسيا قىزمەتىمەن جالعا بەرىلگەن 4 مىڭنان استام پاتەر انىقتالدى, ولار بويىنشا اقپارات استانا قالاسىنىڭ مكد جىبەرىلدى.
astana.gov.kz
