وتاندىق ساراپشىلاردىڭ پايىمىنشا, ەلىمىزدە تۇرعىن ءۇي باعاسى ارزانداپ كەلەدى. جىلجىمايتىن مۇلىك سالاسىنىڭ ماماندارى ەلدەگى داعدارىسقا قاراماستان, تۇرعىن ءۇي سالاسىنداعى ساۋدا تۇراقتى ەكەنىن العا تارتادى. رەسمي مالىمەت بويىنشا استانادا 2015 جىلدىڭ ماۋسىمى مەن 2016 جىلدىڭ ماۋسىمى ارالىعىندا ءۇيدىڭ شارشى مەترى 288 مىڭ تەڭگەدەن 344 مىڭعا دەيىن كوتەرىلگەن.
قازانداعى باعا
ال قازان ايىندا ءبىر شارشى مەتردىڭ ورتاشا باعاسى 338 800 تەڭگەنى قۇرادى. تاۋەلسىز ساراپشى باقىتبەك ءمۇسىلىمۇلىنىڭ پىكىرىنە سۇيەنسەك, استاناداعى جىلجىمايتىن مۇلىك قۇنىنىڭ ارزانداۋى جىل سوڭىنا دەيىن جالعاسا بەرەتىن بولادى.
– جالپى, استانادا تۇرعىن ءۇيدى ساتۋ جانە ساتىپ الۋ ءۇردىسىنىڭ تەپە-تەڭدىگى بايقالادى. قازان ايىنىڭ باسىندا ساتىلىمعا 38 مىڭنان استام پاتەر قويىلدى. ونىڭ 5 مىڭنان استامىن ءۇيدىڭ يەلەرى ۇسىنسا, قالعان بولىگىن ارناۋلى كومپانيالار مەن تۇرعىن ءۇيدى ساتۋمەن اينالىساتىن ماماندار ۇسىنعان. ءوزىمىزدىڭ زەرتتەۋىمىزگە سۇيەنسەك, ەڭ ارزان ۇيلەر – 1965-1970 جىلى تۇرعىزىلعان وڭ جاعالاۋداعى ەسكى جاتاقحانالار. سايكەسىنشە, ولاردىڭ شارشى مەترى كىشكەنتاي ءارى كۇردەلى جوندەۋدى قاجەت ەتەدى. ال قىمبات ۇيلەر, ارينە, ەسىلدىڭ سول جاعالاۋىندا. كەيدە قۇنى 2 ملرد تەڭگە بولاتىن ۇيلەر دە ساتىلىمعا شىعادى, – دەيدى ساراپشى.
ونىڭ ايتۋىنشا, تۇرعىن ءۇي باعاسىنىڭ ارزانداۋىنا بىرنەشە فاكتورلار اسەر ەتەدى. تۇرعىندار تاراپىنان ءۇي ساتىپ الۋعا دەگەن سۇرانىستىڭ ازايۋى نەمەسە ساتىلىمعا شىققان جاڭا وبەكتىلەردىڭ كوبەيۋى جانە ماۋسىمدىق كەزەڭدەر مىسال بولا الادى.
سونىمەن قاتار, تۇرعىن ءۇي ساۋداسىندا بارىنشا ءتيىمدى تاسىلدەر قولدانىسقا ەنىپ كەلەدى. ءتۇرلى اكتسيالار مەن جەڭىلدىكتەر, قولجەتىمدى يپوتەكالىق نەسيەلەندىرۋ جانە كليەنتتەرگە ارنالعان ءبولىپ تولەۋ باعدارلامالارىن ايتۋعا بولادى.
ارۋنا سەرالىقىزى,
جىلجىمايتىن مۇلىك جونىندەگى مامان:
– مەنىڭ ويىمشا, تۇرعىن ءۇيدىڭ باعاسى تۇراقتى. ءدال قازىر 34-46 شارشى مەتر بولاتىن ءبىر بولمەلى ۇيلەردىڭ قۇنى وڭ جاعالاۋدا 12-14 ملن بولسا, سول جاعالاۋدا 15 ميلليوننان جوعارى. ءساتى كەلىپ ساۋدالاسسا, 2 ميلليونعا دەيىن تۇسەتىندەر بار. ايتا كەتەيىن, ۇيلەردىڭ باعاسى تامىز ايىندا شامالى كوتەرىلدى. قازىر باستاپقى قالپىنا قايتا كەلدى.
تاجىريبەمنەن بىلەمىن, بىزدە سول جاعالاۋداعى ۇيلەرگە سۇرانىس كوپ. ويتكەنى مۇندا جاڭا ۇيلەر, اكىمشىلىك-ىسكەرلىك ورتالىقتار بار. ءبىزدىڭ ماماندار قىسقا قاراي باعانىڭ ارزاندايتىنىن ايتادى. بۇل – جىلداعى جاعداي. سوسىن كوكتەمگە قاراي قايتادان كوتەرىلەدى. ال تۋرا ءبىر جىلدان كەيىن, ياعني «ەكسپو-2017» كورمەسى اياقتالعاننان سوڭ, تۇرعىن ءۇيدىڭ باعاسى مىندەتتى تۇردە ارزاندايتىن بولادى دەپ ويلايمىن.
الۋان-الۋان بولجام بار…
استاناداعى تۇرعىن ءۇيدىڭ باعاسى تۋرالى بولجام ايتپاعان ساراپشى كەمدە-كەم. جىل باستالماي جاتىپ, تۇرعىن ءۇي سالاسىن زەرتتەۋمەن اينالىساتىن وتاندىق سايتتار مەن پورتالدار ءوز ويلارىن ورتاعا تاستادى. ولاردىڭ ءبىرى 2016 جىلى باعانىڭ قىمباتتاۋى بايقالمايدى دەسە, ەندى ءبىر ساراپشىلار 9 ايعا دەيىن قالىپتى بولاتىنىن قاداپ ايتقان.
ارينە, وتكەن جىلدىڭ تامىز ايىندا دوللار باعامىنىڭ كۇرت كوتەرىلۋى تۇرعىن ءۇي نارىعىنا تىكەلەي اسەر ەتكەنى بەلگىلى. مۇنداي جاعدايدى باقىلاۋعا العان كەيبىر كومپانيالار وبەكتىلەردى ساتۋدى ۋاقىتشا توقتاتتى. دەگەنمەن ساراپشىلار باعانىڭ ارزانداۋى نەمەسە قىمباتتاۋى اراسىندا ايىرماشىلىق شامالى عانا ەكەنىن مالىمدەگەن بولاتىن.
استانا الدىڭعى قاتاردا
ءۇيدىڭ باعاسىنان بولەك, قۇرىلىستىڭ قارقىنىنا توقتالساق, ارينە, استانا قالاسى كوش باستاپ تۇر.
جىل باسىنان بەرى ەلوردادا 1,3 ملن استام شارشى مەتر پايدالانۋعا بەرىلگەن. قالالىق ستاتيستيكا دەپارتامەنتىنىڭ مالىمەتىنە سۇيەنسەك, 2016 جىلدىڭ جەتى ايىندا تۇرعىن ءۇي قۇرىلىسىنا باعىتتالعان ينۆەستيتسيالار كولەمى 74 144,8 ملن تەڭگەنى قۇراعان. وسىلايشا نەگىزگى كاپيتالعا سالىنعان ينۆەستيتسيالاردىڭ جالپى كولەمىندە تۇرعىن ءۇي قۇرىلىسىندا يگەرىلگەن قاراجات ۇلەسى 19 پايىزدان اسادى.
ال استانا قالاسى اكىمىنىڭ ءبىرىنشى ورىنباسارى سەرگەي حوروشۋن 2030 جىلعا قاراي استانا قالاسىنىڭ تۇرعىن ءۇي قورى 37 ميلليون شارشى مەترگە جەتەتىنىن ايتقان. وتكەن جىلى قالادا 1 ميلليون 759 مىڭ شارشى مەتر تۇرعىن ءۇي پايدالانۋعا بەرىلسە, جوسپار بويىنشا بۇل كورسەتكىش اعىمداعى جىلى 2 ميلليون شارشى مەترگە دەيىن جەتكىزىلۋى مۇمكىن.
گۇلميرا ايماعانبەت
(سۋرەت فوتوگراف
ايبەك احانوۆتىڭ Instagram پاراقشاسىنان الىندى)
