نۇر-سۇلتان قالاسىنىڭ جاستار ساياساتى ماسەلەلەرى باسقارماسى ۇيىمداستىرعان جالپىقالالىق «ۇزدىك جاس وتباسى» سايىسى ءوز مارەسىنە جەتتى.
بايقاۋعا 100-گە جۋىق ەلوردالىق جاس وتباسىلار قاتىسقان. 3 كەزەڭنەن تۇراتىن ىرىكتەۋ اينالىمى كارانتيندىك جاعدايعا بايلانىستى ونلاين وتكىزىلدى. توپ جارعان 10 وتباسى فينالدا باق سىنادى.
«بۇل بايقاۋدىڭ نەگىزگى ماقساتى – وتباسى قۇندىلىقتارىن ناسيحاتتاۋ. بيىل جاس وتباسىلار سايىسقا بەلسەندى تۇردە قاتىستى. بايقاۋ 4 كەزەڭ بويىنشا ءوتتى. ءبىرىنشى كەزەڭدە قاتىسۋشىلار «نەگە ءبىز وسى بايقاۋدا جەڭىسكە جەتۋىمىز كەرەك؟» تاقىرىبىنا بەينە-ۆيزيتكا ءتۇسىردى. ىرىكتەۋ كەزەڭىنەن وتكەن 80 قاتىسۋشى وتباسى مەسسەندجەردىڭ جالپى چاتىندا بىرىكتىرىلىپ, ولارعا كەلەسى كەزەڭدەرگە تاپسىرمالار بەرىلدى. ەكىنشى كەزەڭدە «Birgemiz» ۆولونتەرلىك قوزعالىسىنىڭ جەتى باعىتىنىڭ ءبىرى بويىنشا يگى ءىس جاسادى. ال ءۇشىنشى كەزەڭدە «وتباسى – باقىت مەكەنى» تاقىرىبىندا ەسسە جازدى. ءادىل قازىلار القاسى جازىلعان جۇمىستاردىڭ كرەاتيۆتىلىگىن, ساۋاتتىلىعى مەن مازمۇنىن باعالادى. بايقاۋدىڭ جالپى جۇلدە قورى 1 ملن 800 مىڭ تەڭگەنى قۇرايدى. ءبىرىنشى ورىنعا – 500 مىڭ تەڭگە, ەكىنشى ورىنعا – 350 مىڭ تەڭگە, ءۇشىنشى ورىنعا 250 مىڭ تەڭگە جانە قالعان وتباسىلارعا جۇبانىش سىيلىعى رەتىندە 100 مىڭ تەڭگەدەن تاعايىندادىق» دەدى نۇر-سۇلتان قالاسىنىڭ جاستار ساياساتى ماسەلەلەرى باسقارماسىنىڭ ءبولىم باسشىسى باقىتجان جۇنىسبەكوۆ.
بايقاۋدىڭ قورىتىندى كەزەڭى كورەرمەنسىز ءوتتى. فينالدا ەڭ ۇزدىك جاس وتباسى اتاعى ءۇشىن سايىسكەرلەر ونەر كورسەتۋدەن, ەڭ كرەاتيۆتى ماحاببات سەزىمىن بىلدىرۋدەن جانە سەرىگىن جاڭىلماي تانۋ تەستىنەن تۇراتىن قوسىمشا ءۇش سايىستا باق سىنادى.
«ءبىزدىڭ وتباسى قۇرعانىمىزعا 5 جىل بولدى. ءبىر ۇل, ءبىر قىزىمىز ءوسىپ كەلەدى. جاس وتباسىلارعا ەرەكشە قولداۋ ءبىلدىرىپ وسىنداي ۇلكەن بايقاۋ وتكىزگەن ۇيىمداستىرۋشىلارعا العىس ايتامىز. بايقاۋدىڭ وتەتىنىن الەۋمەتتىك جەلىدەن بايقاپ قالىپ, باق سىناپ كورەيىك دەپ شەشتىك. سايىس كەزەڭدەرى دە قىزىقتى ءوتتى. اسىرەسە, ەرىكتى رەتىندە كوپبالالى اناعا ازىق-تۇلىك اپارىپ, العىسىن العانىمىز ەسىمىزدە قالدى» دەدى ۇزدىك جاس وتباسى اتانعان تلەۋبەكوۆتەر جانۇياسى.
ءادىل تورەلىك جاساعان قازىلار القاسىنىڭ قۇرامىندا «مەرەيلى وتباسى» ۇلتتىق بايقاۋىنىڭ جەڭىمپازى سەيىتجان قويباقوۆ, قۇرمەت وردەنىنىڭ يەگەرى قىدىرالى بولمانوۆ, «جاس ۇلان» بىرىڭعاي بالالار-جاسوسپىرىمدەر ۇيىمىنىڭ جەتەكشىسى دينارا سادۋاقاسوۆا, «نۇر وتان» پارتياسىنىڭ «بىرلىك» فيليالى توراعاسىنىڭ ءبىرىنشى ورىنباسارى شىڭعىسحان قوجاحمەتوۆ جانە 2018 جىلعى ۇزدىك جاس وتباسى ازات پەن ءاليا جۇماعۇلوۆتار بولدى.
بايقاۋ ناتيجەسى بويىنشا 1-ورىندى شىڭعىس تلەۋبەكۇلى مەن مادينا تلەۋبەكوۆا, 2-ورىندى نۇرگۇل تىرناحان مەن ايدوس مەرزامحان, 3-ورىندى سۇڭعات ايمامبەتوۆ پەن ارايلىم قايراتوۆا يەلەندى. اقتىق سىنعا وتكەن قالعان جەتى وتباسى دا كادەسىز قالعان جوق. جەڭىمپازدارعا سىياقى سەرتيفيكات تۇرىندە بەرىلدى. قالاداعى كەز كەلگەن دۇكەننەن وتباسىنا قاجەتتى تۇرمىستىق تەحنيكا الا الادى.
كوكتەم قارقىن
