قاسىم-جومارت توقاەۆ قازاقستان سۋديالارىنىڭ ءVىىى سەزىنە قاتىسىپ, دەلەگاتتار الدىندا ءسوز سويلەدى. بەينە كونفەرەنتسيا رەجيمىندە وتكەن جيىنعا ەلىمىزدىڭ بۇكىل وڭىرلەرىنىڭ سۋديالارى, سونداي-اق شەتەلدىك ساراپشىلار قاتىستى.
پرەزيدەنت سويلەگەن سوزىندە سوت تورەلىگىنىڭ ءادىل جانە زاڭدى جۇزەگە اسىرىلۋىنا مەملەكەت تە, بۇكىل قوعام دا مۇددەلى ەكەنىن اتاپ ءوتتى.
قاسىم-جومارت توقاەۆ قازىرگى پاندەميا كەزىندە ەلىمىزدىڭ سوت جۇيەسى كۇردەلى سىناقتان وتكەنىنە توقتالدى. ونىڭ ايتۋىنشا, كارانتينگە قاراماستان ازاماتتاردىڭ قۇقىقتارى مەن بوستاندىعىن قامتاماسىز ەتۋ ماسەلەسى كۇن تارتىبىنەن تۇسكەن جوق. اقپاراتتىق تەحنولوگيانىڭ ارقاسىندا سوت پروتسەسىن قاشىقتان جۇرگىزۋ فورماتىنا جەدەل كوشىردىك. بۇل ۇتىمدى ءارى وڭتايلى شارا بولدى.
سونىمەن قاتار مەملەكەت باسشىسى قۇقىق قورعاۋ ورگاندارى مەن سوتتاردىڭ جۇمىسىنداعى بىرقاتار كەمشىلىكتەرگە نازار اۋداردى. اسىرەسە, بۇل ولقىلىقتار پاندەميا كەزىندە انىق بايقالدى.
قاسىم-جومارت توقاەۆ قازاقستان حالقىنا ارناعان بيىلعى جولداۋىندا قۇقىق قورعاۋ جانە سوت جۇيەسىن رەفورمالاۋعا باسا ءمان بەرىلگەنىن ەسكە سالدى. ونىڭ پىكىرىنشە, سوت جۇيەسىندەگى ۇدەرىستەرگە, ەڭ الدىمەن, ازامات, كاسىپكەر, ينۆەستور مۇددەسى تۇرعىسىنان قاراۋ كەرەك.
مەملەكەت باسشىسى سوت جۇيەسىن رەفورمالاۋ سالاسىندا ايتارلىقتاي ىلگەرىلەۋ بولۋ ءۇشىن سۋديالاردىڭ كاسىبيلىگىنە, سوت تورەلىگى مەن سوت ءىسىن باسقارۋدىڭ ساپاسىنا نەگىزدەلگەن تۇبەگەيلى جاڭا تاسىلدەرگە بەت بۇرۋ كەرەك دەپ سانايدى.
قاسىم-جومارت توقاەۆ ءوز سوزىندە العا قويعان ماقساتتارعا قول جەتكىزۋگە مۇمكىندىك بەرەتىن بىرقاتار باسىمدىقتاردى ايقىندادى.
قاسىم-جومارت توقاەۆتىڭ ايتۋىنشا, ءادىل سوت تورەلىگى جانە ازاماتتاردىڭ سوت بيلىگىنە دەگەن سەنىمىن ارتتىرۋ مىندەتتى شارت بولۋ كەرەك.
– وتاندىق جانە حالىقارالىق ساراپشىلار سۋديالاردىڭ ءالى دە بولسا, سوتتار مەن سوت القالارىنىڭ توراعالارىنا تاۋەلدى دەپ سانايدى. بۇل – ءتيىمسىز تاجىريبە. بۇدان قۇتىلۋ قاجەت. سۋديالاردىڭ قۇقىق قورعاۋ ورگاندارىنا تاۋەلدىلىگى – تۇيتكىلدى ماسەلە. سۋديالاردىڭ تاۋەلسىزدىگىنە قاتىستى ەشكىمدە كۇمان بولماۋعا ءتيىس. ازاماتتار, كاسىپكەرلەر جانە ينۆەستورلار قازاقستاندىق سۋديالاردىڭ بەيتاراپ ءارى ءادىل شەشىم شىعاراتىنىنا سەنىمدى بولۋى ءتيىس, – دەدى مەملەكەت باسشىسى.
سونىمەن قاتار پرەزيدەنت سۋديالارعا باق جانە الەۋمەتتىك جەلىلەر تاراپىنان قىسىم جاسالاتىن جاعدايلاردىڭ دا كەزدەسەتىنىنە نازار اۋداردى.
– تەرگەۋ ءالى جالعاسىپ جاتاتىن, ءىستىڭ سوتقا بەرىلمەگەن كەزدەرى بولادى. ال كەيبىر جۋرناليستەر مەن بلوگەرلەر جاعدايدى ۋشىقتىرىپ, سوت شەشىمىن الدىن الا بولجاي باستايدى. باق-تىڭ جاريالىلىعى, اشىقتىعى سوتقا قىسىم جاساۋ قۇرالى رەتىندە مۇلدە پايدالانىلماۋى ءتيىس. ادىلدىك سوت زالىندا جانە سوت پروتسەسىنىڭ قورىتىندىسى بويىنشا عانا ورناۋى كەرەك, – دەدى قاسىم-جومارت توقاەۆ.
مەملەكەت باسشىسى كاسىبي سۋديالار كورپۋسى بارشا سوت رەفورمالارىنىڭ شەشۋشى فاكتورى ەكەنىن اتاپ ءوتتى.
مەملەكەت باسشىسى سوت ۇدەرىستەرىن وڭتايلاندىرۋ جانە داۋ-دامايلاردى شەشۋ بارىسىندا بىتىمگەرشىلىك تەتىكتەرىن ەنگىزۋ ماسەلەسىنە دە نازار اۋداردى. وسى ماسەلەنىڭ ماڭىزى سوت ۇدەرىسىندە بيۋروكراتيانىڭ الدىن الۋعا مۇمكىندىك بەرەدى. بۇل رەتتە, سوت ىسىندەگى راسىمدەردى شەكتەن تىس رەگلامەنتتەۋ پروتسەستەردىڭ ۇزاققا سوزىلۋىنا الىپ كەلەدى جانە قوعام تاراپىنان ءادىل سىنعا ۇشىرايدى.
مەملەكەت باسشىسى ءسوزىن قورىتىندىلاي كەلە, اتالعان مىندەتتەردى ءتيىمدى شەشۋ ارقىلى سوت جۇيەسىندەگى وڭ وزگەرىستەرگە قول جەتكىزۋگە بولاتىنىن جانە ازاماتتاردىڭ سوتقا دەگەن سەنىمى ارتا تۇسەتىنىن اتاپ ءوتتى.
