وسى جىلدىڭ 1 تامىزىنا ەلوردا تۇرعىندارىنىڭ سانى 1 ملن 109 مىڭ 575 ادامدى قۇرادى. سونىڭ ىشىندە 566,3 مىڭ ادام ەكونوميكالىق بەلسەندى بولىپ سانالسا, ناقتى جۇمىس ىستەيتىن ادامداردىڭ سانى – 540,8 مىڭ. جۇمىسسىزدىق دەڭگەيى – 4,5 پايىز. نۇر-سۇلتان قالاسى ءماسليحاتىنىڭ بيۋدجەت, ەكونوميكا, ونەركاسىپ جانە كاسىپكەرلىك ماسەلەلەرى جونىندەگى تۇراقتى كوميسسيا وتىرىسىندا بۇل تۋرالى ايتقان قالالىق جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى ساۋلە نۇرعوجينا ەڭبەك نارىعىندا قالىپتاسقان جاعدايمەن تانىستىرىپ, الداعى جوسپارلارمەن ءبولىستى.
پورتالدا 7 مىڭنان اسا بوس جۇمىس ورنى بار
ونىڭ ايتۋىنشا, نەعۇرلىم كوپ ادامدى جۇمىسقا تۇرعىزۋ جانە جۇمىسپەن قامتۋ مۇمكىندىكتەرىن كەڭەيتۋ ماقساتىندا شاھاردا بىرقاتار شارالار قولعا الىنعان. اتاپ ايتقاندا, enbek.kz پورتالىنا بوس جۇمىس ورىندارى جاريالاندى. قازىرگى كەزدە وندا 841 جۇمىس بەرۋشىدەن 7 مىڭ 386 بوس ورىن بار. «ەڭبەك» ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى اياسىندا جۇمىسسىزدىقتان الەۋمەتتىك قورعاۋ شارالارىمەن 9 مىڭ ادام قامتىلدى.
جالپى بيىلعى توعىز ايدىڭ قورىتىندىسىندا جۇمىسپەن قامتۋ ورتالىعىنا 16 مىڭ 338 ادام جۇمىس ىزدەپ كەلگەن. سونىڭ 8 مىڭ 924-ءى نەمەسە 54,6 پايىزىنا ناقتى كومەك بەرىلدى. ياعني, ولار تۇراقتى جۇمىس ورىندارىنا تۇرعىزىلىپ, قوعامدىق جۇمىسقا, جاستار پراكتيكاسىنا, قىسقامەرزىمدىك كۋرستارعا جىبەرىلدى. سولاردىڭ اراسىندا جاڭا بيزنەس يدەيالارىن جۇزەگە اسىرۋعا گرانت العان ادامدار دا بار.
«بيىل قىسقامەرزىمدىك كۋرستارعا جىبەرىلەتىن ادامدار سانى كوبەيتىلىپ, ءتيىستى جوسپاردان اسىرا ورىندالدى. باستاپقىدا 770 ادامدى جىبەرۋدى ويلاساق, قازىر بۇل كورسەتكىش 1150 ادامعا جەتتى. وقىتۋ 51 ماماندىق بويىنشا 31 وقۋ ورتالىعىندا جۇرگىزىلىپ جاتىر. جاڭا بيزنەس يدەيالاردى جۇزەگە اسىرۋعا گرانت الاتىن ازاماتتاردىڭ سانى 900 بولدى. قازىرگى كۇنگە 49 گرانت بەرىلدى. 376 بيزنەس جوبا ماقۇلداندى. گرانت وسى قازان ايىندا بەرىلەدى» دەدى س.نۇرعوجينا.
جاڭا بيزنەس يدەيالارعا گرانت بەرىلەدى
قوعامدىق جۇمىسقا 2049 ادام, سونىڭ ىشىندە 451 جاس ازامات جىبەرىلدى. ولاردىڭ جالاقىسى دا ءوسىرىلىپ, ەكى ايدا 85 مىڭ تەڭگە قولدارىنا ءتيدى. جىل باسىنان بەرى «جاستار» سارايىندا التى رەت بوس جۇمىس ورىندارى جارمەڭكەسى مەن جۇمىسپەن قامتۋ ورتالىعىندا 14 شاعىن جارمەڭكە ۇيىمداستىرىلدى. بۇگىنگى كۇنگە 16298 تۇراقتى جاڭا جۇمىس ورنى قۇرىلدى. سونىڭ ىشىندە مەملەكەتتىك باعدارلامالار بويىنشا 1062 ورىن, شاعىن بيزنەس سالاسىندا 15 مىڭنان استام ورىن اشىلدى.
«بۇل جۇمىس جالعاسىپ جاتىر. 1 جەلتوقسانعا دەيىن 19 مىڭ جۇمىس ورنىن قۇرۋدى جوسپارلاپ وتىرمىز. قازىر كاسىپكەرلەر پالاتاسى مەن ينۆەستيتسيالار جانە كاسىپكەرلىكتى دامىتۋ باسقارماسىمەن بىرگە مونيتورينگ جۇرگىزىپ جاتىرمىز» دەدى باسقارما باسشىسى.
قالادا 8 ءموبيلدى جۇمىسپەن قامتۋ ورتالىعىن اشۋ بويىنشا قاناتقاقتى جوبا باستالدى. بۇل ورتالىقتار ساپارجاي, «ەتالون» بازارى, «ۆسترەچا» ايالداماسى, «ازيا پارك», «پرومىشلەننىي» تۇرعىن الابى اۋماعىندا اشىلدى. بۇگىنگى تاڭدا وسى ورتالىقتارعا 383 ادامنان وتىنىشتەر كەلىپ تۇسكەن. سونىڭ 203-ءى جۇمىستارىن جالاقىسى كوپتەۋ جەرگە اۋىستىرۋ ماقساتىندا جۇگىنگەن. ءوتىنىش بەرگەن 10 ادام قىسقامەرزىمدىك كۋرستارعا جىبەرىلدى.
مۇمكىندىگى شەكتەۋلى 539 ادام جۇمىسپەن قامتۋ شارالارىمەن قامتىلعان. سونىڭ 217-ءى تۇراقتى جۇمىسقا تۇرعىزىلدى. انيماتسيا مەن ۆيدەوگرافيكا, ەلەكتر جانە گازبەن دانەكەرلەۋشى, تىگىنشى ماماندىقتارىن يگەرۋگە 32 ازامات جىبەرىلدى. مۇمكىندىگى شەكتەۋلى ەكى ادام جاڭا بيزنەس يدەيالاردى جۇزەگە اسىرۋعا 100 اەك كولەمىندە گرانت الدى. جىل باسىنان بەرى پروباتسيا قىزمەتى ەسەبىندە تۇرعان 41 ادام, باس بوستاندىعىنان ايىرۋ ورىندارىنان بوساپ شىققان 29 ادام, بارلىعى 70 ادام جۇمىسپەن قامتۋ شارالارىمەن قامتىلعان.
قالاعا 170 پەداگوگ مامان كەرەك
قالاعا قازىر 170 پەداگوگ مامان جەتىسپەيدى. سونىڭ ىشىندە بالاباقشا تاربيەشىلەرى, باستاۋىش سىنىپ مۇعالىمدەرى, ورىس ءتىلى مەن ادەبيەتى, ماتەماتيكا ۇستازدارى, اعىلشىن تىلىندە پاندەردى وقىتاتىن ماماندار قاجەت. بۇل تۋرالى مالىمدەگەن ءبىلىم باسقارماسى باسشىسىنىڭ ورىنباسارى جاننا قۇلىشپاەۆا وسى جاعداي وقۋ ۇدەرىسىنە ەشقانداي اسەرىن تيگىزبەي وتىرعانىن ايتتى.
«ەكى جىل قاتارىنان باسقارما قىزمەتكەرلەرى مەن مەكتەپ ديرەكتورلارى ءتيىستى پەداگوگ مامانداردى ەلورداعا جۇمىسقا تارتۋ ماقساتىندا ايماقتارعا باردى. بىلتىر قالاعا اسا قاجەت 340 ءبىلىم سالاسى قىزمەتكەرىن دايارلاۋ ءۇشىن قارجى ءبولىندى. سوعان سايكەس 2022 وسى سالاعا كەلەتىن جاڭا كادرلاردى كۇتىپ وتىرمىز. وسى جىلى ءبىلىم جانە عىلىم مينيسترلىگىنىڭ باستاماسىمەن كوپبالالى جانە اتاۋلى الەۋمەتتىك كومەك الاتىن وتباسىلاردان شىققان بالالاردى وقىتۋعا 165 گرانت بولىنگەن ەدى. وندا دا پەداگوگيكالىق ماماندىقتار بار. كوللەدجدەر دە مۇعالىمدەردى دايارلايدى. مۇندا بيىل مەملەكەتتىك تاپسىرىس 4602 ورىنعا ورنالاستىرىلسا, سونىڭ 800-ءى – پەداگوگيكالىق ماماندىقتار» دەدى ول.
ونىڭ ايتۋىنشا, پەداگوگ مامانداردى ۇستاۋ ءۇشىن دە جاعدايلار جاسالىپ جاتىر. ماسەلەن, بيىل جاس ماماندارعا ارنالعان 350 ورىندىق جاتاقحانا اشىلدى. 242 پەداگوگكە تۇرعىن ءۇي سەرتيفيكاتتارى بەرىلدى. بۇعان قوسا, قالاعا وتە قاجەت ماماندار بويىنشا ساراپتاما جۇرگىزىلەدى. سوعان سايكەس كوللەدجدەردە جاڭا ماماندىقتار اشىلىپ جاتىر.
وسى ورايدا قالالىق ءماسليحاتتىڭ بيۋدجەت, ەكونوميكا, ونەركاسىپ جانە كاسىپكەرلىك ماسەلەلەرى جونىندەگى تۇراقتى كوميسسيا توراعاسى ميراس شەكەنوۆ بولاشاقتى دا بولجاي ءبىلىپ, الدا ەلورداعا كەرەك بولاتىن مامانداردى دايارلاۋعا نازار اۋداردى. ونىڭ پىكىرىنشە, قالاعا جاقىن جىلدارى گاز كەلەتىندىكتەن قازىردەن گازبەن جۇمىس ىستەيتىن مامانداردى دايارلاۋدى قولعا الۋ كەرەك.
وعان جاۋاپ بەرگەن ج.قۇلىشپاەۆا بيىل قالانىڭ پوليتەحنيكالىق كوللەدجىندە 9 جانە 11 سىنىپتار بازاسىندا گاز ماماندارىن وقىتۋ باستالعانىن, ەكى توپقا 25 بالادان قابىلدانعانىن, وقۋ مەرزىمى 1 جىل, 9 ايدى قۇرايتىنىن جەتكىزدى.
«ءابۋ-دابي پلازا» قاشان پايدالانۋعا بەرىلەدى؟
ينۆەستيتسيالار جانە كاسىپكەرلىكتى دامىتۋ باسقارماسىنىڭ مالىمەتىنشە, قالا كاسىپورىندارىندا 5,5 مىڭنان استام جۇمىس ورنى قۇرىلدى. بۇل مالىمەتتى ۇسىنعان اتالمىش باسقارما باسشىسىنىڭ ورىنباسارى جانار بەسكەمپىروۆا وسى مەكەمە حالىقتى جۇمىسپەن قامتۋ ماقساتىندا اتقارىپ وتىرعان شارالاردى باياندادى.
«كوشە ساۋداسى: 1000 ورىن» باعدارلاماسى بويىنشا قازىرگى تاڭدا 410-نان استام ساۋدا نىساندارى ورناتىلىپ, 1700-دەن اسا جۇمىس ورنى قۇرىلدى. وتكەن قىركۇيەك ايىندا الاش تاس جولىندا اۆتوكولىك ساتاتىن «كەرۋەن» بازارى اشىلدى. وندا 90 ساۋدا ورنى بار. قازىرگە كەزدە بازاردا 200-دەن استام جۇمىس ورنىن قۇرۋعا مۇمكىندىك اشىلىپ وتىر. كەلەسى جىلى بۇل بازاردا ساۋدا ورىندارى 250-گە جەتكىزىلمەك. ياعني قۇرىلىستىڭ ەكىنشى كەزەگى جۇرگىزىلەدى. جالپى العاندا, مۇندا 750 جۇمىس ورنىن قۇرۋ جوسپارلاندى» دەدى ج.بەسكەمپىروۆا.
جىل سوڭىنا دەيىن شاھاردا ءتورت ينۆەستيتسيالىق جوبانى جۇزەگە اسىرۋ جوسپارلانىپ وتىر. ينۆەستيتسيا كولەمى – 14,2 ملرد تەڭگە. بۇل ءوز كەزەگىندە 325-تەن استام جۇمىس ورنىن قۇرۋعا مۇمكىندىك بەرمەك.
«وسى جىلدىڭ سوڭىندا «ءابۋ-دابي پلازا» كوپفۋنكتسيونالدى تۇرعىن ءۇي كەشەنىنىڭ ەكىنشى بلوگى قۇرىلىسىن اياقتاۋ جوسپارلانۋدا. بۇل – ەكى قاباتتى ساۋدا ورتالىعى مەن ون ءتورت قاباتتى قوناق ءۇي. جوبا 1 مىڭ تۇراقتى جۇمىس ورنىن قۇرۋ الەۋەتىنە يە. جالپى كەشەندى 2020 جىلدىڭ مامىرىندا پايدالانۋعا بەرۋ جوسپارلانىپ وتىر» دەدى باسقارما باسشىسىنىڭ ورىنباسارى.
